為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2018 年 03 月 22 日

為年輕人前景着急 何柱國:京官建議監獄北移 釋逾百公頃地建屋

全國政協常委、星島新聞集團主席何柱國剛出席完全國政協會議返港。今次北京之行,佢接觸嘅唔少中央領導官員,發現中央對本港貴到離晒譜嘅樓價好關心,佢認為香港政府有必要喺搵地方面加把勁,「世界時時變,希望港府睇住時勢轉變而變通」,佢提出一個非常創新嘅建議,就係將全港監獄搬晒去內地,騰出用地起樓。

何柱國本周日接受無綫電視《講清講楚》訪問時表示,中央注重香港年輕人嘅前途及樓市「發燒」嘅問題。

向來敢言嘅何柱國直斥,土地供應專責小組係「廢柴」,討論將粉嶺高爾夫球場用地改建房屋嘅建議係弊多於利,「得半塊地用得,起得幾多個單位?」佢解釋,香港唔少外資需要運動、娛樂及交際場所,「(小組)為咗攞分,改建高爾夫球場會扼殺外資來港!」

 

 

建議來自京官

何柱國反建議,將全港監獄搬返內地,既可以騰出土地起樓,又可以防止囚犯逃獄。佢嘅諗法不無道理,目前全港有廿多個監獄設施,佔地逾百公頃,同粉嶺高球場相若,部分監獄地價可觀,例如赤柱監獄嘅地皮估值幾百億元。將監獄改建,以及將囚犯運出境服刑,喺國際上亦有例子,好似挪威就將大批囚犯「出口」去荷蘭監獄服刑。

對於為何有咁嘅建議,何柱國向本刊解釋:「我邊有咁高水平?其實係有北京官員建議,我不過覆述咋。」

何柱國又為政府獻計對抗高企嘅樓價,建議給予十八歲永久性居民提供首置稅務優惠,佢又批評o依家針對外來人士買樓嘅「辣招」唔夠辣,應該倍增先o岩,「如果畀我做……加到百分之五百(印花稅)都夠膽,我為咗香港的後生年輕人。」對於最近討論得熱烘烘嘅「空置稅」,佢表示支持。

赤柱監獄距離赤柱市中心不遠,保守估計該地皮市值數百億元。

佢話,今次在北京同官員接觸時,收到兩大訊息,「政府要嚴守承諾,決不能新官不理舊賬,給積極做事者撐腰鼓勁,對庸政懶政者要嚴肅問責。」佢話呢個係一個好大嘅官同佢講嘅說話。

之後佢意有所指話:「呢條問題可能係同財爺陳茂波講。」外界於是捕風捉影,以為阿爺不滿財爺。知情人士就話,其實係針對成個特區政府,特別希望特首支持陳茂波做嘢。

對於近年本地年輕人對中央缺乏信任,佢認為係年輕人「聽錯人講嘢」,直言:「聽啲失敗嘅人講嘢……咩中國學者……只會是死路一條。」佢希望香港年輕人認清中國特色社會主義嘅成功,把握機遇,千祈唔好到六十歲先嚟後悔。

佢建議,中央為港人提供平等嘅國民待遇,方便港青「走出去」,「係一國,點解唔畀香港年輕人平等待遇?如果港人擁有平等待遇,條路會更加闊。」他解釋,「馬雲(阿里巴巴創辦人)和馬化騰(騰訊創辦人),如果佢哋只局限喺香港七百萬人嘅市場,能否有今天嘅成功?絕對不可能!」兩人之所以有今日嘅成就,全因佢哋擁有十三億人嘅市場。

佢以o岩o岩退休嘅長和集團主席李嘉誠及順豐快遞創辦人王衛為例子,指出「走出去」好重要。「王衛走出去,到內地市場才會成功……如果他局限在香港,送信件由尖沙咀送去深水埗……必定不會發達。」佢期望特首林鄭月娥盡力為港人向國家爭取國民待遇,讓青年人能夠「海闊天空」。

每當有新樓盤開售都吸引青年參觀,但往往得個睇字,根本買唔起,何柱國促請政府協助青年「上車」。

 

順豐快遞創辦人王衛走出去,到內地市場闖,才有今日嘅成就。

 

何柱國認為,如果馬化騰只局限喺香港七百萬人嘅市場,絕對不可能成功。