為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2018 年 03 月 24 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

外匯教父與麥哲倫

農曆年過後一連串春茗,在飲宴場合大家當然係閒話家常,但係最近承亨達集團邀請出席新春晚宴,見到創辦人鄧予立,聽佢分析當前世界改變,應如何大膽創新,又要合作共享,既佩服鄧翁能不斷衝出自己嘅舒適區(comfort zone),又欣賞佢能夠放手畀年輕一代管理公司嘅胸襟。

傳媒稱鄧翁為「外匯教父」,事實上佢真係香港第一代外匯評論專家,早年在銀行工作已開始接受媒體訪問論市。有一件事佢至今津津樂道,就係佢創業初期經常要四處飛,但應承咗商台做一個定期嘅早上環節,佢一直信守承諾,無論在地球邊個角落都計準時間,揾個電話打返來做評論,維持咗成十年。唔知係咪外匯呢行二十四小時運作,所以佢無論去到邊,同事揾佢唔使問幾點,電話響三聲之內佢一定接聽。

外匯教父鄧予立(右)已放手公司的管理實務,一年有大部分時間周遊列國。

今時今日,要揾鄧翁唔使打電話喇,用whatsapp、微信,甚至在facebook或Instagram留言都可以即時通訊。正如鄧翁講,世界正在加速改變,已經走到一個生活型態轉換嘅臨界點。過去三年,手機支付系統造就新商業模式,更對下一代金融服務業嘅發展方向有新啟示。未來十年,機械人很可能成為我哋公司,甚至家庭成員之一,取代部分工作,到時無人機、無人車等機械人技術已臻成熟,人類嘅生活型態,包括商業交易模式、工作方式、城市面貌,以及社會嘅運轉等將會變成點,真係難以估計。

鄧翁認為呢啲劇變,並非基於由上而下嘅政策調整,而係好似科學與工業革命咁,由下而上,由科技到生產,再到經濟與生活,進而改變社會,最後改變政策與法律。如果你覺得今日嘅改變好快,其實歷史上係有先例嘅,好似一八六四年美國南北戰爭後短短五十年間,出現咗卡內基鋼鐵、洛克菲勒石油、福特汽車、勝家縫紉機,以及創造現代金融體系嘅J.P.摩根等,當時變化之大,擊退所有抗拒改變嘅既得利益者,開創咗現代經濟。

正因為世界改變無法抗衡,鄧翁好早就部署亨達集團嘅換代接班。好多老行尊都怕同後生仔工作,但係鄧翁話未來三年,亨達嘅主要管理團隊將全面由年輕新世代接班。佢認為要永續經營一個企業,必須敢於放手畀年輕世代參加管理,接受佢哋嘅新思維,先可以趕上新形勢。

唔好以為鄧翁放手管理實務之後好得閒,佢一年有三百日都在海外,表面係遊歷世界,其實同時幫公司發掘商機。早前佢自己踏足第129個旅遊國家地區,而亨達今年初就在尼日利亞及瓦努阿圖設立公司。所以佢寄語年輕管理層要好似麥哲倫那一代航海家,有乘風破浪,跨越洲際嘅勇氣。我四十幾年前在滙豐做管理實習生時曾到瓦努阿圖生活過七個月,之後一直無機會返去,唔知會唔會有機會跟鄧翁一齊重返南太平洋?未有機會學鄧翁嘅航海家精神之前,先讀讀佢嘅最新著作《老玩童闖印度》,從中找尋啟示。