有緣相聚已經係相當難得，今次「Paco巨星飯堂」嘅五位嘉賓：陳煒、岑麗香、王卓淇、袁文傑同楊明，有緣喺新劇《果欄中的江湖大嫂》中合作，而劇集首周嘅跨平台收視又錄得佳績，直情係難能可貴！

我帶五位嘉賓，去到位於銅鑼灣嘅「重慶劉一手火鍋」，品嘗最正宗嘅重慶味道以外，仲細說佢哋喺「江湖」相知嘅二三事。

挑戰性角色

所謂「江湖大嫂」，今次並非指咩社團話事人，而係指新一代嘅女強人。煒哥話：「我飾演原本已經嫁咗人嘅過氣演員，因負債返港，仲同姪女香香計劃搶番家族果欄攤檔嘅業權，因而與黃光亮同黃浩然，成為鬥氣冤家。

「期間我仲對飾演議員嘅袁文傑產生好感，雖然我哋身份地位懸殊，但最後我仲主動追求佢添！喺劇中我係一個好強嘅人，所以場場戲我唔係鬧人，就係大大聲講嘢，但其實我好斯文o架，所以呢個角色都幾難演。」

香香都話，今次嘅演出好有挑戰性。「之前我通常都係做啲好sweet同好乖女嘅角色，成日被人保護，但係今次就好有正義感，一見到無理嘅事就會出聲，所以我個角色都幾煩o架！哈哈！」

《果欄中的江湖大嫂》集香香、煒哥（前左至右）、楊明、卓淇同袁文傑（後左至右）等紅人於一劇，首周跨平台收視就錄得28點佳績，屬近期熱煲新作。

我帶五位嘉賓，去到位於銅鑼灣嘅「重慶劉一手火鍋」，品嘗最正宗嘅重慶味道，細說「江湖」二三事。

煒哥同袁文傑一齊出道，時隔多年再次合演情侶，佢哋都話好易有默契。

久違再合作

煒哥喺劇中嘅談情對象袁文傑，喺現實中就同拍檔多次合作。「但係演情侶就少啲嘞！我喺劇中係一個好有抱負嘅議員，成日想改革果欄，過程中認識到煒哥，覺得佢充滿幹勁，又有諗法；開頭諗住利用佢，點知合作期間發生咗感情，同埋其實我唔係好慣人哋做主動追我囉。」

同舊對手合作，煒哥不諱言：「我哋同時間出道o架！雖然好耐冇合作，但係我第一套劇都係同佢演情侶，今次除咗勾起少少回憶，我仲發現同袁文傑好快搵到默契。仲有亮哥（黃光亮），今次我哋飾演競爭對手，但其實我哋好老友，所以拍嘅過程好開心。

「至於我個大嫂角色，都好有層次。佢後生時啱啱讀完書出嚟係做三、四線演員，後尾嫁俾江湖大佬就息影，但十幾年後返番果欄，由頭開始，要立足已經唔容易，但佢喺咁困難嘅環境都唔放棄，真係好正面。」

劇中兩位「煩人」楊明同香香，都希望觀眾接受佢哋突破性嘅演出，卓淇就話跟住一眾前輩演戲，獲益良多。

果欄係其中一個代表香港嘅文化，煒哥同劇中拍檔們都瞓身演繹呢個貼地「群組」，讓觀眾產生共鳴。

 

樂見新勢力

年輕一輩嘅卓淇，同劇中媽媽甄詠珊都好搶鏡。「劇中我同甄詠珊關係好差，但現實中，我同媽咪好少嗌交，所以要幻想好多衝突出嚟，再諗吓點演。」

楊明一樣同長輩有衝突。「我劇中老竇劉老師（劉江），係果欄商會嘅會長，有個好大嘅果欄，因為佢係潮州人好重男輕女，所以佢就好想將事業交俾我，但我對生果敏感，於是就幫唔到佢，仲因為我做社工要幫啲工人討回公道，成日同佢對立。」

劇情豐富，香香對其中一幕，印象深刻。「有場戲講我同黃浩然啱啱開始有火花，大家唔知鍾唔鍾意大家，嗰場戲一開始我整蠱佢，要佢用木頭車推我喺成個油麻地走一轉，之後佢想整蠱番我，喺斜路好快咁衝落去。拍嘅時候要吊威吔好刺激，到架車慢慢停落嚟我哋互相對望，我覺得好浪漫。」

卓淇就話：「我第一次喺劇入面着泳衣，自從選完港姐之後，我就唔想再着泳衣，因為我覺得自己太瘦，於是為咗視覺效果好啲，我特登食多啲嘢，結果肥咗喺塊面度，好在出嚟嘅效果都OK，係健康嘅性感。」

議員同大嫂嘅感情線，係劇集嘅焦點之一。

卓淇同甄詠珊飾演嘅母女，係真有其人事，而坊間對呢兩個角色，迴響甚大，令卓淇喜出望外。

煒哥喺戲中嘅另一位對手黃光亮，亦因為二人之前喺《火線下的江湖大佬》合作過，而成為好友，今次就梗係繼續擦出火花啦！

三位年輕嘅演員，喺劇中都有唔少發揮嘅機會，佢哋都視之為突破自己嘅作品。

正宗重慶麻辣鍋（全鍋$168/半鍋$84、左），可選大、中或小辣，用料全由重慶空運抵港，夠晒正宗。椰子滑雞鍋（全鍋$228/半鍋$114、右），味道鮮甜，相當滋陰。

華麗天梯（$338），包括海鯊魚翅、海寶福袋等配料，好睇又好食。

極上海鮮盛（$1888）有鮮鮑魚、鮮貝等新鮮海鮮，樣樣鮮甜。

招牌劉毛肚（$138），爽口彈牙。

炸重慶酥肉（$58），皮薄肉嫩，入口既麻且辣，佐酒一流。

老重慶鮮鵝腸（$138），入口爽脆。

紅糖糍粑（$58），煙靭彈牙。

重慶劉一手火鍋 地址：銅鑼灣渣甸街66號Aura on Pennington地下及1樓 電話：21108889