李錦聯背妻冧吻魏秋樺

亞視早前「重生」，並由無綫前高層、英皇娛樂前行政總裁吳雨，擔任行政總裁一職；而佢一就位就招兵買馬，之但係大部分都係起用無綫嘅舊人。

另一邊廂，由亞視花旦魏秋樺、亞視前執行董事葉家寶搞嘅「亞洲會」，唔經唔覺已經成立五周年。早排，佢哋仲喺佐敦嘅一間酒樓，搞咗個周年晚會，東姑都有幸出席。呢晚，大家都異口同聲話亞視復台，當然係想入返去幫手拍劇同做綜藝節目，會長魏秋樺仲同東姑講：「你哋幫手同吳雨大哥講，應該叫番我哋呢班舊亞視班底返去啦！我哋為亞視效力咗咁多年，心繫公司，梗係想參予喇！」

呢晚雖然係「亞洲會」之夜，但係前無綫廚神李錦聯，竟然都係席上客，因乜解究呢？原來呢間酒樓佢都有股份，加上佢話因為秋樺姐太索，所以靚女去到邊，佢就要跟到去邊喎。當晚，飲大兩杯嘅佢，仲話當晚係佢同秋樺姐嘅「開心大好日子」，叫大家要高興啲飲多兩杯；跟住，佢就捉住女方隻玉手親吻，「美魔女」 魏秋樺真係魅力沒法擋！李錦聯小心返屋企畀老婆扭耳仔呀。

「亞洲會」會長魏秋樺呢晚盛裝出席，艷壓全場，令到廚神李錦聯神魂顛倒。

飲大兩杯的李錦聯，力讚魏秋樺身材好， 捉住佢嘅玉手親吻唔肯放，睇到葉家寶O嘴。

黃夏蕙為咗爭妍鬥麗，呢晚準備咗對七吋高嘅boot，仲當場叫契女歐陽凱旋幫手着，搞到旋旋差啲春光乍洩。

 

呢晚，宮雪花以呢套七千蚊嘅膠衫上陣，仲捉住魏秋樺狂影自拍照。