為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2018 年 03 月 15 日

泛民慘勝 建制力攻兩席 只打網戰少落區 姚松炎慘輸之謎

立法會第一輪補選落幕,泛民聲稱要團結、全取早前被DQ而失去嘅四議席,但選戰風雲色變,出戰新界東嘅范國威及香港島嘅區諾軒雖然能夠如願保住議席,但就形容今次只屬「慘勝」。最慘情莫過於「DQ4」中,由功能界別轉戰九西直選嘅姚松炎以二千四百多票之差,輸畀民建聯新將鄭泳舜,絕對可以用「飲恨」嚟形容。

飲恨事出有因,有幫姚松炎助選嘅泛民中人透露,唔少前線戰友一早都覺得佢勢頭危危地。「姚教授空降九西,無乜地區工作,亦都無直選經驗,我哋叫佢擺多啲街站,佢話唔使做咁多,只要網上宣傳做得好,就好有信心。」

皇帝唔急,但一班助選嘅要員就為佢着急,幫佢擺吓街站,但泛民中人話作用唔大,「擺街站策略都做得唔好,姚教授平日朝早九點後先擺站,選民都返晒工,喺條街行嘅又唔係當區居民,咁擺法有乜用?難得落區,佢就走去土瓜灣向無太多票在手嘅少數族裔拉票,做法同我哋做開嘅選舉工程真係爭好遠。」

最令班助選團無奈嘅,係一班泛民大佬喺選前都似乎「坐定粒六」,覺得九西呢個區實食無黐牙,「睇番一六年大選,泛民加埋本土及自決派嘅得票,佔全區得票嘅百分之五十七,相反對家得百分之三十六,就咁睇的確勝算好大。」

之不過,睇番今次得票,建制派嘅得票比率出乎意料地高,佔近五成,比一六年大選大增一成四,令泛民大感意外,而本刊翻查今次九西補選各個票站結果,姚松炎輸得最慘烈嘅包括啟德南、石硤尾同富昌呢三個由建制派揸莊嘅選區,令佢痛失近二千六百票。

被DQ後轉戰九西直選嘅姚松炎(左),最終以二千四百票之差敗給民建聯嘅鄭泳舜,分析認為係姚松炎錯誤評估形勢。

 

民協票倉唔過票

最令人估唔到嘅係原本被視為泛民票倉嘅選區,包括幸福、南山、大坑東及大坑西,同埋南昌西,竟然全部失守,白白送多四百幾票給對家。

睇番呢三個選區,其實都係民協票倉,分別係前民協女將、現投奔民主黨嘅鄒穎恒;民協元老譚國僑及民協黨員衞煥南嘅地盤。除此之外,民協馮檢基嘅「老巢」麗閣選區,姚松炎同樣輸八十幾票,令泛民中人都忍唔住問,民協今勻係咪因為初選時,馮檢基不敵姚松炎互生芥蒂,所以民協hea住幫姚松炎助選。

選舉當日,的確少見民協成員擺街站或現身為姚松炎站台,只見有「筍友」喺網上幫佢拉吓票,但初選同樣落選嘅荔枝角中區議員袁海文就落力得多,喺自己選區幫姚松炎攞超過二千六百票,大勝對手七百六十二票,同陣唔同心,真係難怪姚松炎嘅助選團聽到選舉結果之後,都忍唔住落淚,「如果真係因為唔齊心而輸,就真係好唔抵。」

據悉,泛民一直認為姚松炎頂住被DQ光環已經夠號召力,就算唔選功能組別、唔喺佢地頭嘅港島區出選,都已經夠打,點知佢哋錯誤評估形勢,戰略更錯到離晒譜,因為九西有唔少老區,擺街站、洗樓、見選民始終最受落,搞網上選舉工程行唔通。姚松炎今次輸咗,做番無議席、無教席「雙失」人士,唔能夠全部怪人哋,佢自己都要為選舉工程失敗負責。

今次選管會用了七個幾鐘進行點票,並在凌晨四點就九西六個票站進行重新點票,最終仍未能改寫姚松炎落選嘅事實。

 

姚松炎嘅團隊喺選舉當日下午起發告急通知,取消原定嘅巡遊活動,改為集中喺票倉拉票。

 

泛民翻盤失敗

另邊廂,建制派今次動員能力極高,經民聯同民建聯都相當落力為鄭泳舜谷票。而且鄭泳舜同姚松炎好唔同,佢喺當區做咗十幾年地區工作,選民對佢有基本認識,佢亦都有成績表畀人睇,拉票成效特別高。

今輪補選塵埃落定,泛民本來想藉此為重奪關鍵少數的「否決權」鋪路,惜最終夢碎。今次補選相當具決定性,因為喺立法會分組點票制度下,議員提出嘅議案,例如修改議事規則等,必須分別喺地區直選和功能組別點票中,獲得超過半數議員支持先能夠通過;至於政府提出嘅一般議案,只要全體一半議員、三十五人支持就能通過;重大議案,例如政改等,就要至少全體三分之二議員支持方可通過。

換言之,泛民只要喺地區直選搶到一半議席,以及佔全體三分一議席,就夠票否決所有議案。經歷兩輪DQ風波後,泛民主派喺地區直選失去五個議席,由原本嘅十九席減至十四席,比建制派嘅十六席少兩席,分組點票時完全處於捱打狀態。補選後,泛民主派喺地區直選補到兩席,同時建制進賬一席,泛民主派仍然比建制派少一席,未能「翻盤」改寫劣勢。

全體議員方面,泛民喺補選後有廿五席,建制有四十二席、佔超過一半,所以政府嘅一般議案要通過,基本上無懸念;至於重大議案,泛民仍佔超過三分一議席,仍夠票阻撓通過。

今次選舉結果雖然有點爆冷,但大部分結果都係建制派預料之內。佢哋都知道要完全搶走非建制派嘅否決權唔容易,所以補選前已乘機修改議事規則,泛民主派更難施展「拉布戰」。在新修訂嘅議事規則下,主席有權不經辯論便將投票鐘聲由五分鐘縮減至一分鐘,亦有權拒絕議員提出嘅中止會議或休會動議,主席喺休會後亦可隨時復會,使泛民未能再在議會內瘋狂拉布。

補選戰仍未終結,由於議會仍有兩個直選議席出缺,泛民必須全取先可以重奪「否決權」。據悉泛民現階段仍傾向透過初選搵合適人選出戰,姚松炎仍有機會再選,其餘人選還包括被DQ嘅劉小麗,但唔少泛民中人都擔心佢哋無必勝嘅把握。

香港眾志為區諾軒助選期間,一度與「同心護港」曹達明(左)展開罵戰,火藥味極濃。