為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2018 年 03 月 17 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

好股如好友

有句投資格言係唔好同股票談戀愛,但係唔做情侶做朋友又如何?我對於自己嘅愛股就好似同朋友嘅友情,愈耐愈醇,認識愈深愈能經歷考驗。港鐵(0066)(當年稱為地鐵)二○○○年上市後我一直持有,雖然數量不多,但留來作長期收息用。

講到港鐵不得不提公司非執行主席馬時亨(Fred)。佢同我一齊在一九七三年港大畢業,當時返學好隔涉,兩年前我在無綫《商.對論》節目訪問佢,同佢一齊坐港鐵返母校,先感受到依家咁方便。我同Fred真正認識係喺九十年代,我當時任職大褔證券,經常要出席公司上市儀式,就係咁認識咗當時係上市委員會委員嘅馬時亨。後來佢出任健康快車副主席,而我設計一款牛表推出,所得收益就捐畀呢個慈善組織,Fred仲現身撐場兼幫我做「男模」。

我長期支持港鐵,公司作為有地產特色嘅公用股,上市後股價穩步上升,派息亦不俗。睇返資料,港鐵當年透過發售10億股股份而進行私有化,除咗係政府首個私有化IPO,亦打破多項紀錄及開創先河。

例如,當年公司以招股價上限9.38元定價,但香港居民享有折扣優惠,可以8.88元認購,IPO有折扣,結果引來60多萬投資者入票,上市時公司登記股東數目達604,447名,係香港上市公司之冠,而由於超額認購政府最後要加碼共出售11.5億股。另外,港鐵係香港首個e-IPO,投資者可以網上申請配股。

港鐵上星期四出業績,總收入上升22.7%至554.4億元,基本盈利升11.3%至105.15億元;末期股息87仙,全年股息1.12元,上升4.7%。其中經常性業務,包括香港客運、車站商務、物業租賃及管理,以及國際鐵路、物業租賃及管理等較穩定業務嘅收入升10.5%。香港客運周日平均載客量增加3%,達576萬人次,部分由於觀塘綫延綫及南港島綫全年度營運。

原來港鐵在中國、英國、瑞典、澳洲等地嘅國際客運業務,舊年周日平均乘客量有649萬人次,已超越香港。公用股以穩定為主,但港鐵客運業務未來有兩大增長點,包括預計今年第三季通車嘅高鐵香港段和正與政府商討修訂造價估算嘅沙中線,兩條線已分別完成98.6%及81.2%。

二○一七年收入增幅,主要來自中國內地物業發展收入,包括深圳天頌嘅銷售款項入賬,令呢個業務分類收入共上升56.48億元。香港方面,物業發展錄得10.97億元利潤,來自西鐵匯璽、海之戀、柏傲灣、全.城滙及朗屏8號等存貨單位。而日出康城晉海及MALIBU正在預售,發展項目有黃竹坑站和錦上路站上蓋物業,可望維持銷售動力。

我覺得港鐵二○一七年表現唔錯,亦有增加派息,公司上市十七年多,業績同股價都平穩向好,難怪成為港人愛股之一。我期待高鐵通車,物業發展持續,國際業務繼續拓展,並維持漸進式增加派息,真正做到人見人愛,車見車載。

馬時亨(左)現身支持陸叔設計的陀飛輪「牛表」。