林奕匡老婆大解放

三十二歲嘅唱作歌手林奕匡（Phil），憑住一首〈高山低谷〉唱到街知巷聞；而呢首歌正係憑歌寄意，感謝同佢拍拖十年、陪佢捱過人生高山低谷嘅另一半。

去年八月，Phil返溫哥華，同前TVB財經主播兼體育主持女友李靄璣（Rikko） 結束十年嘅愛情長跑，喺佢母校UBC大學校園舉行婚禮，啱啱喺今個星期二（三月六日），佢哋再喺香港補擺酒，認真恭喜恭喜！

不過，東姑上周喺社交網就發現，既已成為人妻嘅Rikko，啱啱去完泰國布吉度假返嚟，居然人妻大解放，將佢喺當地享受陽光與海灘時，着晒三點式嘅泳裝照放上網，張張都噴晒血大騷火辣嘅身材，搞到唔少朋友都紛紛留言，大讚佢sexy同埋hot。

其中，佢嘅閨密鄧佩儀，仲講笑話佢老公Phil應該好想暫停老婆個社交網。Phil隨即火速回應，貼咗三個冇眼睇嘅表情符號，睇嚟佢對新婚太太Rikko咁賣大包網上派福利，亦感覺酸溜溜，仲隔空同老婆耍下花槍，無聲「詐型」添！

去年八月，Phil同Rikko結束十年嘅愛情長跑，仲喺加拿大溫哥華舉行婚禮。

早喺六歲成家移民加拿大嘅Rikko，可能鬼妹仔性格，喺網上晒性感泳照，向網民豪派福利。

喺泰國布吉旅行時，Rikko着泳衣嘅相火辣辣超性感，唔少朋友都留言讚佢sexy。

雖然Rikko已為人妻，但人妻照樣大解放，唔怕老公Phil會詐型。

曾任職TVB財經主播兼體育主持嘅Rikko，其後以自由身接活動司儀嘅工作。