許紹雄為老婆爭上頭炷香
新年流流，好多善信都會去廟宇拜神祈福，祈求新一年行好運。喺大年初一，最好第一時間上到頭炷香，就更顯神心。
今年，踏入大年初一嘅凌晨，東姑就喺九龍塘嘅省善真堂見到許紹雄（Benz雄），見佢一個人手持一大束香枝，點燃之後，就逐個佛堂誠心咁去上香參拜，個樣非常虔誠。 其實，差唔多每年初一凌晨，佢都會嚟到省善真堂爭上頭炷香；不過，佢曾經透露自己係天主教徒，又信耶穌又拜神佛，咁多心？佢就解釋係老婆信佛，而佢就係「入屋叫人，入廟拜神」喎！之但係見佢年年必到，神心到咁，又唔似係尊重老婆嘅宗教咁簡單囉。
Benz雄帶晒香蠋祭品，到九龍塘省善真堂，燒香拜神祈福。
佢燒咗大束香枝，跟住逐個佛堂上香參拜，個樣仲非常虔誠。
