為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2018 年 03 月 03 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

狗年Walk the Dog Buy or Bye?

新正頭,我祝各位投資致富!雞年股市暢旺,但雞尾出現調整,踏入狗年,到底係雞犬皆升(連升兩年)定係雞飛狗走(雞年入貨狗年走貨)?我會一連兩期同八位股評人講股兼派利是。

首先由永豐金融研究部主管涂國彬(Mark)打頭陣,佢祝大家股場出入平安。我問佢點解唔係買咗至沽,入出平安?Mark認為出咗先入定入咗先出都好,最緊要識睇時機,唔需要由頭揸到尾。今年會有好多短炒機會,投資者要動如脫兔以捕捉機會,狗仔要跑來跑去,唔可以懶。波動來源在於實體經濟復甦,但資產價格走得前已經升咗,而金融海嘯至今回歸正常,全球資產價格亦會回復到正常嘅有上有落,甚至大上大落。今年Mark派嘅利是股都係實力之選滙控(0005)和銀娛(0027)。

興證國際資產管理副總裁阮子曦(Harry)就覺得大家嘅信心可能畀雞尾動搖咗,佢認為如果手揸優質股就一動不如一靜,但亦唔好當股份係門口狗,間中要walk the dog,少量嘅出入少不免。大市有機會試落27,000點接近250天線,呢個時候投資者除咗持倉要有部署,心理都要有準備,若所持企業盈利無改變估值又偏低,就唔好被市場波動影響,已坐貨的話下試27,000低位不妨考慮溝貨。呢位個股主義者繼續以股為先,今年睇好中銀香港(2388)、和記電訊香港(0215)。

富昌證券研究部總監譚蔚朗 (Stevan)一直係大好友,但今年好市之中會有較多波動及要加上條件假設,佢特別關注如後市持續受困30,000點,咁上半年真係會沉一沉,下方支持位睇二○一五年高位28,588,甚至33,000高位回落兩成約27,000。至於上方佢只係睇33,000,因為今年市場對加息反應較大,而且大市曾急升急跌,對後市信心確實冇咁強。至於利是股,佢睇好紫金礦業(2899)和綠葉製藥(2186)。

光大新鴻基財富管理策略師溫傑(Kenny)今年維持審慎樂觀展望。從基本因素出發,二○一七年港股盈利估計上升33%,就算在高基數效應之下,狗年港股盈利相信仍有雙位數增長。另外在估值方面,港股仍然偏低,現時只有俄羅斯、伊斯坦堡等股市估值比香港低。因此,盈利增長加上估值膨脹,有機會令恒指上升到34,000點,但要小心波幅較大。Kenny用熊市紅綠燈,包括盈利增長、估值、信貸息差等來判別牛熊。二○○○年及二○○七年時八盞燈着咗七盞紅燈以上,之後都有大調整,目前只着一盞紅一盞黃,所以仍然睇係升市中嘅調整,中長線可以在低位吸納優質盈利好嘅股份,如建行(0939)、平保(2318)。

綜合四位意見都較謹慎,但暫時唔使say bye住,不過就要做足避震。我個人就繼續睇長線,睇好大市嘅觀點不變,只係大市嘅調整來得急,本來一個多月完成嘅調整在一、兩個星期內發生,所以令投資者信心動搖。過年過節我繼續派利是,而且見到大家都無推介新經濟股,我就buy騰訊(0700),另外仲有平保 (2318)、復星(0656)、中石化(0386),原因下期再講。

阮子曦、涂國彬、陸叔、譚蔚朗和溫傑(由左至右)向讀者拜年,並推介狗年利是股。