主頁 > 專欄 > Paco巨星飯堂 > 拍檔賀元宵 2018 年 03 月 04 日

黃栢高

黃栢高(Paco)，金牌經理人，叱吒樂壇三十年，炮製無數金曲，捧紅不少歌手。近年涉足電影，《行運超人》、《龍咁威》、《殺破狼》等，皆叫好叫座。最新動作，除於本刊主持《Paco巨星飯堂》，每逢周一更在《頭條日報》主持「名人會」專欄，專訪城中名人、紅星。

拍檔賀元宵

元宵佳節將至，連「Paco巨星飯堂」都要走溫馨風，今次請嚟三位嘉賓：張兆輝、陳敏之同唐文龍，係兩對來自唔同劇集嘅couple，分別喺《性在有情》同《溏心風暴3》，令觀眾留下深刻印象。

台前嘅好拍檔，幕後則係好朋友，我帶三位嘉賓去到位於中環嘅「禮賓傅」，一邊品嘗精緻嘅中菜，一邊暢談新一年大計。

趁住元宵佳節即將來臨，嚟自兩套電視劇嘅CP：文龍、敏之同輝哥，都要聚首一堂，暢談合作趣事同新一年嘅大計。

難得好對手

敏之先後喺《性在有情》同《溏心3》，跟輝哥同文龍有唔少親密演出，兩名男士都盛讚拍檔，令佢哋演得無後顧之憂，輝哥話：「我最初要演親密戲嘅時候，會一早同對手講定我演嘅步驟，舉例就係一拖手、二右手攬住、三左手搭膊、四就錫咁，但演戲期間未必順序做，冇順序時我就好驚，唔知對手會唔會覺得我係揩油o架！但敏之就令我冇呢種恐懼，我哋事前溝通得好好，佢令我可以順住個故事去演。」

文龍同敏之嘅「肉搏」就更加激烈，「我覺得唔少人都誤以為，男女演員拍親密戲，男演員就着數晒，其實一定唔係，男演員都好脆弱，好似輝哥話齋，驚對手唔知點諗，以為係抽水。但係敏之會話俾我知，佢好信任我，同埋會同我有互動，令出嚟嘅效果更加好。」

我帶三位嘉賓去到位於中環嘅「禮賓傅」飯敍，佢哋都客氣地送上限量靚酒，仲有自家出品嘅曲奇禮盒作禮，喜氣洋洋。

文龍同敏之喺《溏心3》嘅火辣親密戲，一度成為全城熱話。

喺《性在有情》中，輝哥同敏之嘅投入演繹，令觀眾睇得開心。

鵝肝蝦多士（$88/位），原隻新鮮大蝦放上多士，鵝肝脂肪喺炸嘅過程融入多士，充滿鵝肝油香又唔會太過滯膩。多士炸得香脆，蝦肉結實彈牙。

羊城鴿鬆（$138），先拆出鴿肉，切成肉末輕輕炒香，再放於脆嫩整齊嘅生菜葉上，香而不膩。

桂花鮑魚炒素翅（$298），選用素翅，加入了鮑魚絲以增加口感，以大火炒蛋黃及銀芽，散成一絲絲的桂花狀，再上銀箔作裝飾，高貴大方。

新歲新計劃

得到兩位拍檔激讚，敏之就話：「我喺輝哥同文龍身上都學到唔少嘢，其實演親密戲，我都會信我嘅對手，而我喺《性在》同輝哥係兩夫婦、喺《溏心3》就好愛文龍，咁親熱起上嚟冇理由會就住就住，所以一定要全情投入。演戲係互動嘅，有佢哋兩個好拍檔，我就百份百放心！」

正值新正頭，三位嘉賓喺狗年都有大計，輝哥話：「近年我主力喺內地拍戲，TVB嘅製作我都會拍，但要睇咗劇本先去決定，拍《性在》就係因為香港好少呢類型嘅喜劇。」
敏之就表示：「今年我會拍唔同嘅新劇，同時會兼顧我嘅曲奇生意。講到最開心就一定係我個仔啦！佢叫我一聲『媽咪』，我就即刻冧晒！」

至於文龍就向另一方向發展：「我讀設計出身，今年就打算出自己設計嘅產品，平面同product都有，好似太陽眼鏡咁，o依家喺初步階段。」

合作過後，文龍同敏之惺惺相惜，戲外都成為好友。

幸福人妻敏之抱住十四個月嘅囝囝雷冬至，一臉滿足。

人氣急升嘅文龍，keep住操肌保持最佳狀態。

酥炸安格斯牛腩配咖喱汁（$298），採用優質安格斯牛腩，表面炸至金黃色，安牛腩軟熟而肉味濃，再配上師傅自家調製嘅咖哩汁，相當惹味。

五色羅漢（$198），用上不同顏色及具有豐富營養價值嘅五款蔬菜，包括紫椰菜、椰菜花、西蘭花、雲耳及蟲草花，加以爆炒，色香味俱全。

隱藏型廚神

逐步實踐新大計之時，我要為讀者謀福利，輝哥同文龍一樣咁fit，梗係要請教吓佢哋嘅keep fit秘訣。輝哥表示：「要開工嘅時候，我就咩都食嘅，尤其是冬天喺內地開工，一定要食飯先有力演戲。之前我喺加拿大拍戲，雖然啲膳食好豐富，但係就冇熱騰騰嘅飯或者麵，於是我趁住空檔，去咗食碗越南湯河，食完嗰刻真係好滿足。

「不過點食都好，我都keep住做運動，有入有出吖嘛！通常都係跑步，做完運動成個人都醒神啲，o依家習慣咗做，唔做反而唔舒服。」

文龍就話：「我都係keep住做運動，做gym保持好睇嘅線條。食嘢反而冇特別拘束，我煮嘢食都OK嘅，以前我爸爸喺外國開餐館，我好細個就已經去幫手，炒小菜都係用鑊去炒，但係近幾年就少煮咗好多，因為我冇女朋友，自己煮俾自己食又好無趣。」

哈哈哈！咁預祝文龍喺明年元宵前，可以覓得有情人同佢共度佳節啦！