為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 02 月 25 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

新年新視野

踏入狗年,我先祝大家身體健康、心想事成!要心想事成,最好梗係有多啲選擇!一六年熄機嘅亞洲電視(ATV),早前以手機App同OTT網絡電視方式復播,仲搵嚟多名猛人主持節目吸客,包括陶傑嘅《笑看風雲》,又有余宜發拍住陳宇琛(Sam)及張紋嘉(Crystal)主持嘅《激活音樂》。講到最矚目嘅,就梗係由陳志雲(Stephen)主持嘅《百萬富翁2018》,有咁多好節目拓闊視野,自然係觀眾之福!

狗年首個「Paco巨星飯堂」,我就帶以上嘅「新視力」,去到位於黃大仙嘅「御品」,品嘗特色嘅珍品中菜,呢個新年有新氣象又有食神,萬事如意啦!

亞視開台後嘅瀏覽人數向二千萬進軍,各個節目嘅主持,自然功不可沒,余宜發、陶傑、Stephen、Crystal同阿Sam,就梗係相當開心!

 

變身「陳百萬」

〇一年嘅《百萬富翁》,係ATV最受歡迎節目之一,當時人在TVB嘅Stephen,曾以鄭裕玲嘅《一筆Out銷》抗衡,但佢話買唔到《百萬富翁》,始終覺得有啲可惜。

不過有緣嘅話,兜轉過後佢都同呢個節目「相逢」。「有次吳雨大哥(亞洲電視數碼媒體行政總裁)約我食晏,佢有呢個構思(再做《百萬富翁》),我覺得超正,所以佢一問我做唔做主持,我即刻(口累)飯應。

「節目嘅設計好有特色,自九八年開始,今年係二十周年,所以有好多電視台,都重新包裝節目再推出。ATV都唔例外,而且仲可以配合新媒體嘅元素,觀眾不但可以睇,仲可以即時參與,玩『智取百萬Fun』同『百萬同步挑戰賽』,互動性強咗好多。」

Stephen仲呼籲大家填報名表參加,「唔好諗自己嘅學問夠唔夠闊,先填咗報名表參加,就有機會攞一百萬,因為有三個錦囊o架!」

我帶咁多位嘉賓,連同退休後仍因友情出山幫手嘅公關之父曾醒明(左一),去到位於黃大仙嘅「御品」,品嘗特色嘅珍品中菜。

 

即使《百萬富翁》嘅大眾認知度十足,但Stephen(右)跟吳雨(左)仍投入為節目宣傳。

 

白芷川弓天麻燉花錦鱔頭(半份$498/壹份$988供10-12位用),用約重十五斤越南野生花錦鱔炮製,鱔頭及其他配料隔水清燉八小時,湯水藥膳味香濃,驅頭風最好之良藥。

 

豉油皇獅頭鵝鵝腸($138/例牌),含豐富油膏,甘香,入口融化。

 

冰鎮野生南非鮑($28/兩),野生鮑魚約重二斤半,肉質鮮甜,突出鮑魚原有鮮味。

 

趣味讀「史片」

陶傑主持嘅節目《笑看風雲》,就係從有趣角度睇歷史。「香港啲中、小學生,讀歷史個個讀到喊,因為填鴨式教育同資料背誦,加上先生講得較為嚴肅少少,咁我哋就改用一個笑嘅角度,去重新分析同講解歷史。」

陶傑仲提到要讀「史片」,佢笑笑口話:「成日聽人講,你個衰仔讀書唔成不如讀屎片,我哋真係讀『史片』,不過係歷史加紀錄片,除咗書本上嘅知識,仲加埋影像,呢啲影像係一流嘅剪輯同一流嘅解說,於是讀『史片』呢個組合,會刺激到我哋嘅思維,所以狗年讀書要用新方法,讀書不如讀『史片』。」

Stephen即表示:「我對陶傑嘅節目有期望,因為如果講香港嘅檔案,有悠久歷史嘅ATV,應該係最齊全嘅。」

全方位綜藝,仲有余宜發拍住阿Sam同Cystal主持嘅音樂節目《激活音樂》,節目會搜羅世界各地唔同嘅音樂,余宜發話:「我哋平時睇或聽音樂節目,會揀選一啲自己嘅喜好,但今次我哋歡迎所有嘅音樂,無論係地下或街頭嘅,我哋都想邀請佢哋嚟到節目分享。」

「陳百萬」Stephen同才子陶傑各擅勝場,節目有佢哋坐陣,欣賞指數就更高!

 

有才子陶傑(左)執掌節目《陶傑笑看風雲》,令歷史不再沉悶死板。

 

音樂無語言、地域界限,《激活音樂》就集世界大成,向觀眾推廣唔同類型嘅音樂。

 

野生水魚($2800/隻、$1400/半隻),可作兩食:紅燒野生水魚(左)、鮑汁扣野生水魚裙邊(右),野生水魚約八斤,為可遇不可求、不可多得嘅食材,骨膠原豐富。

 

 

 

音樂匯全球

阿Sam補充:「我哋除咗講Local嘅音樂,亦有同騰訊合作,佢哋會有三個唔同嘅音樂平台,好多資料都可以喺嗰度得嚟,所以香港、台灣、內地同韓國嘅音樂榜我哋都會報,都係頗up-to-date嘅嘢。」

Crystal就話:「我哋最特別係,會介紹一啲唔同種類嘅音樂,例如我哋會訪問無伴奏音樂嘅人,分享佢哋嘅經歷,又會搵啲專業人士嚟講,等大家知多啲音樂知識。」

咁多新節目揀,最好就係食住賀年食品睇啦!o依家keep住小生身型嘅Stephen表示:「新年我就如常嘅,我好揀飲擇食o架,一定研究晒啲食品標籤,少糖少鹽少卡路里,不過一星期總會放縱吓,食得好似今日咁豐富嘅。」

余宜發、Crystal同阿Sam(左至右)都有音樂底子,係主持音樂節目嘅理想人選。

 

難得相聚,陶傑(左)同曾醒明都要合照留念。

 

胡椒巨無霸蟹($23/兩),用菲律賓紅樹林野生超級大肉蟹,肉質彈牙,海水味濃,配以白胡椒及秘製醬料,更能吊起蟹之鮮味。

 

大澳蝦干炒墨魚滑($118/例牌),採用U1頂級墨魚筒自家手打,超級彈牙,佐酒佳品。

 

生啫花錦鱔腩推廣價($398/份、供4-6位用),肉質彈牙,醬香味濃郁。

 

御品
地址:黃大仙銀鳳街9號鳳凰邨大廈地下3號舖
電話:28921848