為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2018 年 02 月 24 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

鑼鼓齊鳴喊第一口金 中外開市趣事陸續講

此文刊登之日已經係年初六,但係截稿日仍未過年,所以未知今年會否開紅盤。金融界一向較注重傳統習俗,我入行咁多年,真係唔記得為幾多頭獅點過睛,切過幾多隻燒豬,而農曆新年更加要出席唔同機構,包括我公司座大廈嘅開市儀式,負責舞獅嘅師傅見到我都講笑話我點睛經驗豐富,唔使教我點做。新年流流,就陸續講吓新年開市嘅趣事。

最特別當然係金銀業貿易場嘅開市儀式,因為佢係全球唯一仍保留公開喊價買賣九九兩裝金嘅交易所,每年啟市除咗有傳統新春團拜和拜地主之外,上年雞年首個交易由正、副理事長以競價形式成咗第一口金,作為「意頭價」,當日九九金以每両11,188港元成交,張德熙理事長為金市開個發完又發嘅好意頭價。當日場上仲展示超過100條金條,認真金光耀眼。

我本業係證券,開年當然要去香港交易所,呢邊無咁閃,不過交易所每年都約埋一班業界代表一齊祝酒,上年雞年都揾幾十人打中國鼓助興,一樣咁有氣勢。

股票投資者可能會關心開唔開紅盤,不過我粗略統計過,由一九九九兔年到二○一七雞年,一共19個農曆年開市,其中17年係開紅盤,只有二○一四馬年和二○一六猴年係所謂開黑盤,而且仲係低收,即係所謂收黑盤。咁呢兩個農曆年份股市係咪好差?睇返紀錄又唔係喎,二○一四馬年當年升12.7%,二○一六猴年升21.11%。

呢19個農曆年中,13年全年計係升市(包括上年雞年估計都係升市年),6年係跌市年,同當年開紅盤定黑盤又有冇關聯?睇落又似乎冇乜。好似最大升幅嘅兩年係一九九九兔年(紅盤低收),全個農曆年升咗69.8%,係19年之冠,第二係二○○九牛年(紅盤高收),全年升61.1%。最大跌市係二○○八鼠年(紅盤低收),跌46.4%,其次係二○○一蛇年(紅盤高收),跌32.5%。睇數據,紅盤同全年升跌冇乜關係,只係意頭,大家毋須太認真。

香港有新春開市,倫敦紐約當然冇呢個儀式,但係呢兩個交易所每日都有響鐘。倫敦歷來在交易大堂都會響鐘顯示開市,但到一九八六年由於市場解除管制和交易大堂解散,響鐘傳統就停止咗。直到二○一一年,倫敦交易所至安返新裝置,將響鐘變成新舊上市公司、交易所成員,以及慈善團體慶祝嘅儀式。

紐約交易所都有響鐘,而且出名大聲,原來響鐘在一八七○年有連續交易之後至開始,不過最初係用中國嘅銅鑼,直至一九○三年交易所搬到現址至改用一個大型電銅鐘,並一直相安無事。八十年代後期,紐約交易所決定修整銅鐘,想買多一個做後備,好辛苦揾返80多年前嘅鐘匠,但係呢間公司已經唔再做18吋直徑咁大同咁響嘅銅鐘,最後惟有請已退休嘅老員工出山幫忙。

我自己一向年中無休,年初一都要開工做節目,所以一向冇初幾開市嘅習慣。香港人大多勤力,多勞多得,我就祝大家狗年大旺。

新年最特別係金銀業貿易場嘅開市儀式,因為係全球唯一仍保留公開喊價 買賣九九兩裝金的交易所。