為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 02 月 11 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

型過狗年

狗年將至,香港人就梗係要睇番啲傳統賀歲片,不過我哋與時並進,o依家睇就要睇升級版!今年其中一部賀歲鉅獻,係葉念琛執導嘅《我的情敵女婿》,電影集華哥任達華同嘉玲姐劉嘉玲兩大重量級人物於一戲,加上衛詩雅(Michelle)飾演嘉玲姐囡囡,仲有姜皓文同阿Bob(林盛斌)等實力綠葉,極具睇頭。

今次「Paco巨星飯堂」,我就邀請導演、華哥、Michelle、黑仔同阿Bob,去到位於中環嘅「宿宿醉」,品嘗特色越南Fusion菜,暢談呢部又型又sweet又爆笑嘅狗年賀歲片!

由華哥(右二)同嘉玲姐領軍,葉念琛(左一)執導嘅賀歲片《我的情敵女婿》,睇頭十足;加埋黑仔(左二)、阿Bob(中)同Michelle(右一),令電影更有聲有色。

 

嘉玲魅力

講到新作,導演阿琛笑稱:「今次碌爆晒人情卡,最開心係請到四哥,仲有喺內地紅到日日要開騷嘅MC Jin(歐陽靖),而最大張卡,當然係嘉玲姐啦!」

有嘉玲姐同華哥呢個巨鑽級「鐵膽」,加上引人入勝嘅故事,令電影全面upgrade。「我想個古仔貼地啲,而阿媽個舊情人鍾意咗舊情人個女,喺現代社會係會發生嘅事。而要搵一個令阿媽同阿女都會動心嘅男演員,除咗華哥我真係諗唔到仲有邊個。」

華哥嘅魅力梗係跨世代啦!而佢就話:「我見到嘉玲姐都暈得一陣陣o架!見佢愈嚟愈靚愈Charm,我都羨慕佢嘅另一半!哈哈!我記得有一幕,講我哋重逢去咗碼頭,飲紅酒談心,嘉玲姐不嬲酒量好,我就好少飲酒嘅,但係為咗嗰場戲嘅mood,我都有同佢真係飲,我哋喺有少少醉態嘅情況下拍嗰場戲,出嚟嘅效果都好好。」

我帶咁多位嘉賓,去到位於中環嘅「宿宿醉」,品嘗特色嘅越南Fusion菜,提早團年。

 

 

 

嘉玲姐飾演華哥嘅初戀情人兼「外母」,氣場十足。

 

越式自家製春卷($68/4件),將混入豬肉、粉絲同蝦米嘅自家製春卷炸至金黃,加上生菜同金不換包住嚟食,更加好味!

 

特强宿醉劑($188),即法式火車頭金邊粉,湯底每日用十五斤牛骨、五斤碎腩、五斤牛舌熬製,絕冇添加味精牛精,配以煙韌嘅越南金邊粉同大堆頭用料,加上華麗嘅器皿,絕對滿足晒視覺和味覺。

 

三色扎肉米紙卷($98/6件),選用三款貴價食材(鵝肝醬、帶子、黑松露),即叫即包嘅札肉米紙卷上,為傳統嘅米紙卷,添上一陣fusion味道。

 

華哥突破

華哥喺戲中講嘢尖酸兼涼薄,係名奸商,凡事算到盡兼賺到底,仲經常向一班下屬破口大罵,同現實中嘅佢好唔同,「今次都係我嘅突破嚟o架,加埋有Michelle呢個咁young咁靚嘅女朋友,真係冇試過!不過呢,我覺得要幫呢個『女朋友』搵番個男朋友,我覺得佢近年掛住拍戲嘞,拍呢部戲嗰陣,我feel到佢皮膚有啲乾。但要追Michelle就要識得游水先,因為佢識游蛙式,咁佢嘅另一半就要識游背泳,咁先可以一邊望住佢一邊游,做佢背後嘅男人。」

哈哈哈!見華哥話要幫自己搵男友,Michelle都唔執輸,嚟個大爆料。「華哥真係好好!我喺片場聽到佢同太太講電話,啲語氣好溫柔,我都覺得sweet;佢又唔好飲酒。我搵男友,都要提高要求,向佢呢個目標進發!」

首次同嘉玲姐合作,就要飾演對方嘅囡囡,Michelle話:「嘉玲姐真係好靚!我阿媽咁靚就好嘞!見到嘉玲姐,令我有多一個目標,就係第時自己要keep得好啲,但今次拍得趕,都冇時間請教嘉玲姐點樣keep得咁好。」

Keep得型keep得好嘅華哥,喺新戲同Michelle飾演情侶,仍相當具說服力。

 

華哥喺新作嘅角色有啲躁狂,難為咗出爐視后唐詩詠(右三)等下屬。

 

四哥謝賢友情客串一幕,不論導演定係嘉玲姐都好興奮。

 

法式燒紐西蘭喜洋洋架($258/3件),以黑椒及百里香等調味後,將羊架燒香,肉質嫩滑又唔羶!

 

燒豬頸肉撈檬($88),將大塊豬頸肉燒至外脆內軟配以彈牙檬粉,非常滋味。

 

西班牙杜洛克●毛茸茸豬架($258),將厚切杜洛克豬燒至7成熟,嫩滑多汁。

 

強勁綠葉

除咗主線劇情,戲中嘅綠葉、重量級客串卡士,一樣咁精采!被提名過角逐金像獎「最佳男配角」嘅黑仔,再投喜劇懷抱,飾演華哥嘅好兄弟。「唔係咁簡單o架!我仲係暗戀咗嘉玲姐好多年嘅兵仔,但礙於冇華哥咁型,我只可以將呢份感情埋藏喺心深處。拍呢部戲好好玩,我嘅對手主要係華哥同嘉玲姐,仲有泰臣、唐詩詠。拍賀歲喜劇,會令自己嘅正能量都強啲,好似提早過年咁。」

而嘉玲姐嗰邊,就有阿Bob分擔搞笑部份。「我飾演嘉玲姐嘅全方位助手,任勞任怨仲要聽佢嘅感情煩惱,能夠同影后有咁多對手戲,我開心之餘仲學到唔少嘢!」

見到阿Bob同黑仔呢個姿態,就預計到佢哋喺戲中將合力放笑彈。

 

阿琛近年係賀歲片常客,佢嘅新作自然令人期待。

 

新年梗係要大堆頭!開開心心嘅群戲,係指定動作。

 

越南巨咪大頭蝦($288),用混入蛋白及檸檬草嘅粗鹽,放喺來自越南湄公河嘅八吋長大頭蝦上烤焗,吃時再沾回粗鹽,即時提鮮!

 

美國斧頭幫($888),要將巨型40安士斧頭扒燒至「見紅唔見血」,非常考功夫,再配上白蘭地和鵝肝醬製成嘅燒汁,簡直係絕配!

 

宿宿醉
地址:中環閣麟街37號祥興商業大廈6樓
電話:34273718