驚畀人煮嚟食 先知八爪魚揀德國贏季軍 西班牙奪冠
八爪魚睇好西班牙
今年世界盃賽果出人意表，不少球迷都話輸波輸到匿埋喺屋企喊、刀仔插大髀。雖然賽果估佢唔到，但德國奧柏侯遜水族館的八爪魚先生保羅，就場場估中，連啱啱西班牙戰勝德國的世界盃賽事，八爪魚都可以估中西班牙勝，即時搞到不少喜歡德國的球迷，紛紛話要搵八爪魚尋仇，煮咗佢嚟食咁話喎！
呢個來自德國的八爪魚保羅成功預測到連場世界盃賽果，如6月27日德國對英格蘭一場，牠就成功預測到德國贏，之後7月3日德國對阿根廷一戰，牠又估中德國大勝，至7月8日西班牙對德國，保羅就唔睇好德國，一個瞓身瞓喺代表西班牙的盒子上。結果德國落敗，西班牙大勝！八爪魚保羅貼士勁，保羅的facebook有三萬多個fans支持，twitter上亦有不少fans，雖然大人愛戴，但亦有不少德國fans話德國輸咗嬲到爆，話要煮咗佢嚟食。連城中藝人，如蔡卓妍都笑言︰「我想八爪魚很快變燒八爪魚，預測太準了吧！」梁靜茹就話︰「我不開心，最近都別讓我看到八爪魚，哭！」
可能保羅預知自己生命有危險，為保住條命仔，於7月9日下午五時，牠為季軍戰預測時，就在德國和烏拉圭之間做徘徊片刻後，就走到德國的一邊打開個箱內撈起入面的食物吞入口中，即表示德國是牠的季軍心水，再次揀德國。之後，水族館再問保羅7月12日荷蘭對西班牙賽果，牠就毫不猶豫地揀西班牙。
網友惡搞八爪魚
八爪魚保羅成功預測到連場世界盃賽果，即時魚氣急升，有網友為牠繪漫畫。
雖然保羅料事如神，但有不少德國fans和阿根廷fans都話要煮咗佢嚟食。
有不少人認為八爪魚是久經訓練的藝魚，但講真一句，訓練到牠，更叻到估中晒啲賽果，走去買波，發咗達啦！
連球員都變埋八爪魚，睇真啲，呢個仁兄咁似《魔盜王》入面的八爪魚鬼船長O既？
八爪魚場場貼中，世界盃南非吉祥物豹仔都無眼睇。
