現年廿七歲，被網民封為「嘉倩BB」的前無綫新聞主播陳嘉倩，去年十一月被本刊踢爆與凸腩兼有案底的陳志遠（Stephen）拍拖，但原來陳志遠一直有位正印女友「無綫藝人」朱婉禎。上周朱婉禎聲淚俱下向本刊踢爆陳嘉倩做第三者兼大話精，但陳嘉倩隨即否認自己是「小三」，更聲稱被滋擾並到中環警署備案，令這場「爭仔風波」愈演愈烈。

解鈴還須繫鈴人，本刊千辛萬苦找到「潛水」多時的男主角陳志遠，他承認自己一腳踏兩船之餘更自認賤男，直認陳嘉倩早知朱婉禎存在仍與他拍拖，但不明白對方近日上警署備案有何居心，他反而聲稱自己備受電話滋擾，汽車被損毀。

陳志遠以一身Mark哥造型現身，踢爆與陳嘉倩拍拖時，對方已知女友朱婉禎存在。

被爆做小三，但陳嘉倩否認，上星期隨即聲稱被滋擾要到警署備案，令陳志遠變成嫌疑人物。

還原真相

「爭仔風波」男主角陳志遠，日前下午，穿乾濕褸、梳了一個Mark哥頭，一臉從容親臨本刊，不過他明顯比之前消瘦，凸腩亦消失：「我冇減肥，搞成咁都冇胃口食嘢啦！」訪問期間，他對答有條不紊，大方直認一腳踏兩船，還自認衰佬：「錯唔係佢哋，無論我點講都好，我都係一個賤男嚟o架喇，咁做錯咪認囉，其次，我亦唔想再有各方面攻擊呢兩位小姐喇。咁要攻擊要話，話我就OK！」

陳志遠直認與陳嘉倩拍拖關係始於一六年八月，當時自己仍與拍拖三年的朱婉禎同居，認識陳嘉倩之初，女友朱婉禎並不知情，反而他曾向陳嘉倩表明有朱婉禎存在：「佢（陳嘉倩）有問過我，我有講過朱小姐呢個人o架嘛！佢都肯同我一齊。」至於陳嘉倩是否大話精？「每一個人都需要自己私隱，邊個係大話精，首先交畀讀者去分析，我只能夠講佢哋有訊息聯絡，個訊息係真嘅。」

去年八月，成功媾掂陳嘉倩，他指追求個幾月，食幾次飯，直接開口便一拍即合。

女神易媾

陳志遠表示去年是透過朋友聚會識陳嘉倩，先認識幾個月後才拍拖，對方在他心中印象是一個讀書好叻的女仔，吸引之處在於啱傾：「我好在乎另一半好鍾意同人傾偈，傾偈舒服咁好自然就會開始。我真係冇一個好特定原因，如果你話靚？通街啲女仔都靚！」

經過個多月追求，他終將陳嘉倩私有化，不過他強調沒有展開特別媾女攻勢，只是正常送花及接送，食過幾次飯後直接向對方表白，一講就一拍即合，還暗示對方並不難追：「如果我話難，咁就唔會追到，如果我話唔難，啲人就會話因為我已經追到！」

二人拍拖期間，陳志遠亦非常大膽，瞞住朱婉禎帶陳嘉倩見家長。其實陳嘉倩一直是網民心中的女神，不過在陳志遠心中只是一個普通女仔，他淡然地說：「女神？我唔覺得佢係女神，首先都係一個正常人，都係一個普通女仔，化咗妝個個都係女神啦！（你話佢落咗妝唔係女神？）唔係……唔係！女神定義係好大嘅！我自己心中無女神。」

與女友朱婉禎同居三年，但仍瞞住對方偷食，難怪他自認賤男。