為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2018 年 01 月 18 日

毛孟靜住所疑擅改用途 民主派護短

律政司司長鄭若驊甫履新即爆僭建風波,民主派咬實唔放,與此同時立法會議員毛孟靜被人翻舊賬,揭露佢住所疑擅改用途,但民主派卻護短無聲出,被指對僭建存「雙重標準」。

事緣,毛孟靜於八五年喺淺水灣道買入一個一樓連地下車房嘅單位,八年前被人發現車房改建做房間,到o依家仲未還原。日前記者再到現場,發現地下開放式嘅車房加建咗圍牆、窗戶及大門,疑似變成住宅用途;佢隔籬屋嘅車房疑似係原則,無圍封。

佢咁改建法似乎屋宇署都無符,屋宇署發言人回覆傳媒查詢時表示,根據批准圖則,上址原本係用作開敞式車房,署方人員曾於一○年八月到現場視察過,發現車房部分加建圍封牆等,近日署方再次派員到場了解,發現情況同八年前相若。

由於呢啲加建工程係喺建築物內進行,又唔涉及樓宇結構,屬於豁免審批嘅工程。發言人續指,呢個情況屬於改變用途,對樓宇結構及消防安全未構成明顯危險,唔屬於執法政策下須取締嘅類別。署方無計劃採取進一步行動,但已經發信畀業主,勸喻盡早恢復原有用途。

更改用途屬於地政總署管轄嘅範圍,本刊本周一向地政總署查詢,但截稿前未獲回覆。專業測量師謝偉銓指出,將泊車位改作其他用途,需要同政府部門申請,確保符合地契嘅規定。「你改變用途,就算唔會改變結構,都可能同條例有牴觸,地契問題要地政總署把關,唔明點解地政唔做嘢。」

佢又批評,毛孟靜喺立法會內理直氣壯批評鄭若驊僭建問題,但對於自己寓所嘅僭建物,毛孟靜表現得好閃縮,「唔公開交代,係咪代表心中有鬼?」佢促請毛孟靜開放寓所,讓政府人員視察,「如果最後真係無問題,都算還佢一個清白。」

面對各方批評,毛孟靜回應傳媒查詢,表示未收到屋宇署嘅勸喻信,佢聲稱八五年購入嘅時候,涉事建築物已經密封咗,當時已經唔係用作車房。佢又話詢問緊律師意見,但認為:「既然屋宇署表明唔採取進一步行動,則代表呢個唔係僭建啦!」佢仲話唔知根據乜嘢圖則還原,更可能違反大廈公契。

記者到毛孟靜嘅寓所視察,發現地下開放式嘅車房加建咗圍牆、窗戶及大門,疑似變成住宅用途;佢隔籬屋嘅車房疑似係原則,無圍封到。

 

毛孟靜表示未收到屋宇署嘅勸喻信,又認為:「既然屋宇署表明唔採取進一步行動,則代表呢個唔係僭建啦!」

 

民主派對律政司司長鄭若驊嘅僭建風波咬實唔放,但對盟友毛孟靜住所疑擅改用途,民主派就有護短之嫌,被指對僭建存「雙重標準」。