為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2018 年 01 月 17 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

贏在價值觀

有學院做過調查,北美家族企業僅有三成能由第一代傳到第二代,東方家族企業更只有一成半。內地財富傳承則出現跨代矛盾,七成創一代想傳畀子孫,但只有三成半二代願承繼父業。不過亦有報告指香港仍有不少家族企業成功傳承,包括利豐、新世界、永安百貨等。分析此等企業成功傳承秘訣,包含三個元素:擁有可持續商業模式、平衡嘅中西方價值觀、無過度分散擁有權。

我認識嘅中港企業大多由創一代開始,包括曾工作過嘅新世界集團,並高興見到公司成功傳承到第三代。對於「富二代」,有人會覺得佢哋贏在起跑線,唔使努力都能夠享有成功事業。不過,我最近認識前海香江金融創辦人兼董事長劉根森(Sam),雖然大家年紀相差一大截,但佢令我對年輕一代嘅營商理念有新睇法。

Sam年紀輕輕,家族係內地知名民企香江集團,美國波士頓大學畢業後入德銀工作,高大靚仔,係典型高富帥,但傾開偈又感覺到佢打破咗我對富二代嘅固有諗法。首先,我問佢最感謝父母乜嘢,佢答話多謝父母畀佢好好嘅價值觀,令佢做人做事「行得正、企得正」,而且抗逆能力較強。

例如,佢小時候無零用錢,到高中最後一年父母至畀零用錢食飯,養成節儉和不拘小節嘅隨和習慣,到美國讀書時父母買屋畀佢住,佢計下條數決定將間屋租出去收租,自己住宿舍,唔只識慳仲識搵錢!到今日,佢主理百億基金和投資生意,但與同事出差都係坐經濟艙。二○一六年創立香港公司時連自己只得五位員工,租用500呎辦公室,兩年間增加到50人,雖然已經租埋隔離,但係地方不敷應用,佢同拍檔一間房兩張檯最後有七個人用。

Sam父母灌輸畀佢另一重要價值觀係利用財富和影響力行善。香江集團一九九○年創立,但過去十多年家族捐咗十幾億人民幣,劉母翟美卿更加在二○○五年獲批成立001號中國第一家非公募慈善基金會「香江社會救助基金會」。Sam認為做業務要慳做慈善更加要「慳」,不過唔係慳捐助,而係自己組織團隊處理事務,節省行政費用可以幫更多人。佢亦利用投資知識,建議開設醫院從富裕階層賺錢然後為有需要病人提供醫療。呢個做法可以令慈善基金永續發展,我好贊同亦希望盡快成事。除咗幫家族處理慈善事務,Sam亦有參與深圳市同心俱樂部。

年輕人做事犯錯免不了,但好少能做到每事反思、修正、再出發,所以我好欣賞Sam能夠從錯誤和挫折中學習。好似佢讀緊大學時已經膽粗粗和同學一齊創業,打算依託家族旗下傢俬業務發展北美市場,但去到酒店推介集團時就發覺對方唔認識,上網站又無詳盡英文解說,後來唔成功而呢間公司亦結束咗。不過呢個短暫嘅創業旅程令佢反思,企業在內地成功仍要不斷進步,要開拓市場先要畀人專業、國際化嘅形象。至於佢日後在挫折中成長,原來有位同樣年輕有為嘅師友從旁教導,下星期再講。

前海香江金融控股集團有限公司創辦人兼董事長劉根森(Sam)(左)雖然屬於富二代,但從小由父母灌輸節儉的觀念。