為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2018 年 01 月 10 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

我的眼科醫生

我同林順潮醫生淵源甚深,佢除咗係我中學、大學雙重師弟外,仲係我嘅眼科醫生,多年來一直照顧我雙眼,我女兒多年前做激光矯視亦係由林醫生主理。最近佢創立嘅希瑪眼科醫療控股(3309)招股上市,我梗係揾佢分享發展大計。

我每次去睇眼見到中心排滿人,都知道香港眼科市場大有錢途。原來二○一六年香港私營市場規模已達到34.6億港元,林順潮係眼科名醫,佢喺香港嘅眼科中心以及衛星診所佔私營市場份額4.7%,在業內排行第二。在港穩佔一席位之餘,師弟一直積極發展內地眼科醫療市場。希瑪喺深圳設有一間眼科醫院,北京醫院亦即將開幕,係唯一根據CEPA喺內地設立嘅港資私營醫院。事實上,二○一六年內地私營眼科服務市場收入高達141億元人民幣,而且發展未及香港成熟,所以增長空間更龐大。

希瑪上市前已經獲得新地(0016)及「蘭桂坊之父」盛智文入股,招股又獲騰訊(0700)主席馬化騰、思捷(0330)主要股東邢李㷧以基礎投資者身份認購。除咗係林順潮嘅人脈關係,亦都反映公司實力及潛力。

坦白講,林醫生同希瑪賺錢能力驚人,點解揀呢個時候上市?師弟分析,香港擁有優質醫療人才及技術,唔應該局限於本地,而內地經濟發展之下,對優質醫療嘅需求日趨殷切,所以佢覺得應該把握時機將香港優質醫療服務投射至內地,將服務人口由香港700萬,擴大至以億計的內地病患者。希瑪喺二○一三年在深圳開設醫院,理念係將內地醫院嘅管理同國際專業水平接軌,當時係小試牛刀,結果證實市場非常接受,短短幾年收益已在廣東省私營市場中排名第三,因此上市後會進一步擴展內地網絡。

我好早認識林順潮,但真正熟絡係二○○○年英皇書院舉辦千禧論壇,我同籌委會邀請佢主持其中一節,佢爽快答應,當時仲一齊返母校同學生影相,見到紅磚牆勾起唔少回憶。後來佢搵我幫醫管局講ORSO之下嘅投資方法,而二○○八年我出書時亦將部分版稅收益捐畀佢創立嘅亮睛工程,當然我定期要搵佢睇眼,見到佢無論公職、慈善及眼科醫療事業都蒸蒸日上,好戥佢高興。

師弟總結佢工作主要分三個層面,第一係透過亮睛工程照顧農村眼疾患者,令無能力負擔醫療費用嘅病人都能夠得到治療;第二係通過即將上市嘅希瑪為城市人口提供眼科醫療服務;最後係利用本身喺世界及亞太多個學會嘅公職推動香港眼科醫療嘅領導地位,令業界不斷提升專業水平。心繫中港,放眼國際,難怪林順潮被選為世界眼科影響力人物100強。

我笑問林醫生上市後仲得唔得閒睇我雙眼?佢講笑話我嘅「眼光」好重要,所以一定會幫我重點保護。估唔到畀師弟玩返轉頭㖭。

二○○八年陸叔出版《我「筆」講股》,籌得超過八十萬港元,分別捐贈「亮睛工程慈善基金會」、「天比高創作伙伴」及「聯合國兒童基金」。