為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 01 月 14 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

首導心思

製作電影嘅吸引力之大,自〇二年監製《行運超人》後嘅我,有好深嘅體會。近年有位新力軍「入坑」,由台前加入製作嘅行列,佢就係李思捷!而思捷首次執導嘅作品《一家大晒》,將喺今年農曆賀歲首檔上映,為咗呢個「BB」,佢費盡心思,由撰寫劇本、選角、取景,全部親力親為,一絲不苟。

今次「Paco巨星飯堂」,我就邀請思捷,聯同佢挑選嘅「大佬」林敏驄,去到位於尖沙咀嘅「OM Tapas」,品嘗傳統嘅西班牙菜式,暢談「BB」背後嘅故事。

思捷首次執導嘅電影《一家大晒》,除咗請得實力前輩狄龍同元秋演出,仲有鬼才阿驄落力參演,值得捧場!

 

搞鬼龍哥

思捷呢個「BB」,早喺我上一次同佢飯敍嘅時候,已有腹稿。「其實部戲嘅劇本,我已經同編劇揼咗六年。一直我都想拍一部關於road trip嘅戲,呢個題材喺美國好普遍,但係香港太細,好難拍到相關嘅題材,今次我就以一家人去camp為主題,就啱晒賀歲一家大細睇。」

緣份令電影喺賀歲檔期上映,正正為思捷達成夢想。「做導演係我嘅夢想,而做賀歲片嘅導演,就滿足到我另一個夢想,我對賀歲片有一個情意結,會令我諗起細個嘅時候,一家人一齊去戲院睇賀歲片,然後全部人睇完都好開心、滿足。我覺得o依家嘅家庭比以前疏離咗,好多時一家人坐低食飯,有啲人會掛住撳電話,真實嘅溝通少咗,所以我都想借部戲,令一家人嘅關係close番。」

以合家歡為大前提嘅喜劇,故事主軸都係圍繞一家人,今次思捷成功邀得影帝級嘅狄龍大哥,同霸氣逼人嘅元秋,飾演佢嘅銀幕父母,龍哥仲係從影以來首次主演喜劇,原來背後係有故事。「我主持《今晚睇李》嘅時候,龍哥有次為咗宣傳同任賢齊演出嘅《落跑吧愛情》,上咗嚟做嘉賓,即場跳舞、搞笑,好似個小朋友咁!我完全未見過佢呢一面,於是我就同龍嫂講(阿驄:「龍嫂一唔喺度,龍哥就好openo架嘞!」),唔係,我同龍嫂講,我有部喜劇想請龍哥演出,之後龍嫂睇完劇本,覺得OK就俾龍哥睇,龍哥睇完都OK,於是就有佢嘅搞鬼演出。」

我帶兩位嘉賓,去到位於尖沙咀嘅「OM Tapas」,品嘗傳統嘅西班牙菜,細說呢部合家歡電影背後嘅故事。

 

邀得龍哥(左)突破性地參演喜劇,展現搞笑一面,思捷(中)要先過龍嫂陶敏明(右)一關,劇本都要先經龍嫂審閱o架!

 

另一杯Gin Tonic雞尾酒HENDRICK’S($128),美酒中加入青瓜、檸檬及薄荷,感覺更醒神。

 

近年西班牙掀起Gin Tonic熱潮,而西班牙人重視感觀享受,佢哋嘅Gin Tonic最大特色係,改用類似葡萄酒杯嘅Balloon Glass嚟盛載,先從視覺同嗅覺享受,再以味覺品嘗飲品,呢杯LONDON NO.1($118),除Gin、Tonic外,仲有肉桂、藍莓同香橙,滿足「三覺」享受。

 

西班牙海膽鮮茄烘包($108),係西班牙品嘗海膽嘅經典食法之變奏,將麵包與海膽嘅組合,配上番茄茸,中和口味較重嘅西班牙海膽。

爆肚大佬

至於「一家人」嘅其他成員,仲有公認嘅演技派蘇玉華,飾演思捷嘅太太;錢小豪飾演思捷嘅情敵⋯⋯不能數漏嘅,梗係音樂鬼才阿驄啦!「Paco你唔搞音樂之後,我都唔掂音樂嘞!拍戲都好好玩!今次仲有龍哥呢個影帝做我老竇,都學到唔少嘢!思捷喺現場好認真,真係睇佢唔出o架!」

思捷都對呢個「大佬」讚不絕口,「戲入面嘅麻煩大佬嘅角色,我第一個諗到嘅人選就係阿驄,佢轉數咁快,同一班演員嘅化學反應好強!爆肚就係預計之內嘅,好似句對白係:『個蛋糕幾好食喎。』,佢就會講咗:『個蛋膠幾好實喎。』,少少百厭啫。

「後來我專登為佢加番條(阿驄:「加條咩吖?」)感情線呀!俾佢談吓情,對手係內地演員錢瑩,佢喺內地做咗好耐處境喜劇,好有經驗,最緊要係接到阿驄啲爆肚,好有chemistry。」

除咗自導自演嘅電影成為首檔嘅賀歲片,思捷喺三月將會同祖藍、祥仔合體,喺紅館舉行演唱會,慶祝「福祿壽」十周年。

 

一張劇照已雲集眾多高手,內地資深演員錢瑩(右二)就係阿驄(右一)嘅談情對象。

 

演藝高手仲有小豪哥(左)、家英哥(右)同阿燦廖偉雄等,全為實力保證。

 

慢煮伊比利亞豬面頰夾包、開心果、醃菜($118),係一道中西合璧嘅菜式。主廚以慢煮烹調令本來已經屬嫩滑嘅豬面頰肉更鬆化,有入口即溶嘅感覺;配上刈包及酸菜,有減低油膩感嘅神奇化學作用。

 

輕煎西班牙紅蝦($178),選用居於西班牙深海二千米嘅紅蝦,用橄欖油輕輕煎香外殼,蝦肉保留生生哋,最能帶出紅蝦嘅真鮮味,只以海鹽及番荽吊味,令食材原味更突出。

 

西班牙海鮮飯($298),以龍蝦餚製嘅濃湯加上紅花粉,將西班牙米煮成熟飯,中段放入各式海鮮同煮,整鑊飯帶著濃濃化不開嘅鮮味,令人欲罷不能。

 

阿壽廚房

思捷嘅演藝道路,相當多元化,除導、演以外,最具大眾認知度嘅,近十年就非「福祿壽」莫屬。轉眼間,呢個為觀眾帶來歡樂嘅組合,今年三月就踏上紅館舞台,開演唱會慶祝十周年。「同我嘅電影一樣,『福祿壽』就係為咗令觀眾開心,咁多年嚟我哋都扮咗好多人物,所以我、祖藍同祥仔,都想俾啲新鮮感觀眾。今次宣傳扮『娛樂特首』,係祖藍嘅idea,我哋咁啱又係三個人,出嚟嘅效果都好好。o依家我哋為演唱會度橋,希望到時俾多啲驚喜入場嘅觀眾。」

哈哈哈!呢方面我一定唔會為三位笑星擔心!至於講到驚喜,思捷o依家即刻有嘞!一講到下廚,佢一指我哋面前嘅西班牙海鮮飯話:「我成日都煮Paellao架!煮法好簡單o架咋,一定要用西班牙米,先用洋葱、salami(意大利辣肉腸),傳統啲就用chorizo(西班牙辣肉腸)爆香隻鑊,加米、chicken broth,即係雞湯,然後keep住攪二十分鐘左右,因為唔攪會黐底,期間落啲saffron(番紅花)。到啲飯差唔多熟,先落啲海鮮同其他配料。有啲人會攪十分鐘,加海鮮後就放入焗爐,一樣OK。」

「福祿壽」十周年,思捷、祖藍同祥仔(右至左)就化身娛樂特首,為演唱會宣傳,夠晒話題性!

 

「福祿壽」十周年,思捷、祖藍同祥仔(右至左)就化身娛樂特首,為演唱會宣傳,夠晒話題性!

 

呢個就係「思捷牌」西班牙海鮮飯,賣相十分可人,希望下次可以品嘗埋味道!

 

慢煮牛尾($128),屬主廚安東尼奧從家鄉安達盧西亞帶嚟嘅傳統菜餚,牛尾經慢煮廿四小時,帶橄欖油和紅酒嘅香醇,加上燉到酥爛嘅牛尾散發嘅獨特口感,極具特色。

 

焦糖大米布丁($75),於西班牙叫做Leche con Arroz,主要原料為牛奶和大米,要用西班牙燉飯用嘅米,經不停攪拌煮到米呈粘稠狀,倒出晾涼,再用薄荷葉及肉桂粉點綴,做法簡單但味道無得彈。

 

OM Tapas
地址:尖沙咀棉登徑1號地舖
電話:27221707