近日《溏心風爆3》熱播，七十四歲老戲骨夏雨，早前就率先開口，於接受訪問時重提十年前《溏心風暴》爭視帝時敗於陳豪，令他至今仍「條氣唔係好順」。

雖然被前輩點名，不過陳豪就看來全不上心，生活如常十級幸福！日前下午，他就和老婆陳茵媺，帶三名子女齊齊中環出巡睇醫生。剛剛一歲半的細囡小公主Camilla，就被父母輪流抱抱，仲眼仔碌碌望鏡say hi，暖爸抱着這位「前世情人」，自然開心到笑晒口。

陳豪抱細女，陳茵媺就一手各拖一個仔，夫婦齊心合力，闔家齊齊整整中環出巡。

人氣勁旺

早前，咖啡王子陳豪以「星級店長」身份，於自己開設的首間期間限定Pop-up Store「Blooms」，親自現身吸客，做人肉生招牌親手沖咖啡，人氣勁旺！

不過，出名是廿四孝老公和父親的他，一有時間當然要陪太太和三個小朋友。

日前下午三時左右，噴泉頭的陳豪，一身運動裝、戴黑超帶妻兒，現身中環皇后大道中萬年大廈。兩夫婦和外傭，分工拖抱三名分別四歲的大仔梓燁（Aiden）、即將三歲的二仔浩鋒（Nathan）及二十個月的大細女凱婷，人妻笑笑口拋下一句「Happy New Year!」就急步上樓，相信是趕時間睇醫生。

陳豪單手抱着「前世情人」，man爆揮手打招呼，小公主就口擘擘極為趣緻。

上車時轉由媽媽抱，細女凱婷更手指指與記者打招呼。