為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2018 年 01 月 07 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

18楓聲

踏入2018年,今年首次嘅「Paco巨星飯堂」,嘉賓份量自然要加碼!修哥胡楓喺下個月三度踏上紅館舞台,以八十六歲之齡舉行演唱會,梗係要誠邀呢位「後生仔」,擔任本專欄喺一八年嘅頭炮嘉賓。

修哥率領老友羅蘭姐、契女方國珊,同為演唱會任音樂總監嘅契仔周啟生,參與飯敍,我就帶四位貴賓,去到位於尖沙咀嘅「阿一海景飯店」,品嘗頂級嘅中式賀年菜,細說呢個破晒紀錄演唱會嘅背後故事。

修哥(右二)正積極籌備喺二月舉行嘅紅館演唱會,仲親自邀請羅蘭姐(右一)擔任嘉賓。而喺修哥眾多嘅契仔契女中,方國珊同周啟生(左一及二)都全力支持,後者仲擔任大會嘅音樂總監。

 

我帶四位嘉賓,去到位於尖沙咀嘅「阿一海景飯店」,品嘗具新年意頭嘅頂級中菜,暢談修哥嘅演唱會籌備工作。

 

親邀羅蘭

為咗喺二月過年前舉行嘅《胡楓86破晒紀錄演唱會2018》準備,同時又要拍攝兩套劇集,修哥全力以赴。

「又要練歌、又要寫稿、又要跑步練氣,都幾操勞o架!啲歌詞都幾難記,我又唔想睇住字幕機唱歌,因為睇住唱,就冇咁有感情,如果到時真係唔記得,就用啲笑聲冚過去啦!我首首都係飲歌,而且我會揀啲適合長者聽嘅歌,我啲觀眾都係上咗年紀嘅人。」

我相信,修哥嘅粉絲又點止得上咗年紀嘅長者?而佢嘅演唱會,就正正係一家人嘅合家歡節目。「我一班孫仔、孫女,都會上台獻唱,佢哋有啲人中文唔係幾好,o依家都把握時間惡補緊,平時我都有叫啲仔女,教啲孫兒學中文同普通話o架。」

除咗孫仔孫女,貴為圈中嘅「大眾契爺」,修哥開演唱會,一眾重量級契仔契女,又點會唔撐場?「我七十歲開演唱會,到八十歲又開多一次,已經碌咗好多人情卡,今次八十六歲再開,請嘉賓就留俾搞手何麗全啦!我淨係親自請咗我老友羅蘭咋!」

羅蘭姐就話:「我同修哥咁老友,佢開到聲我就一定應承!對上一次我去紅館做嘉賓,係劉德華請我去嘅,嗰時只係上台講吓同佢攞獎嘅感受同趣事。雖然今次未知要做啲乜,但係我同修哥未試過喺紅館同台合作,所以我都好期待。」

喺劇集中不難見到修哥同羅蘭姐合作,但一轉到紅館舞台,就係首次見到兩寶同台演出,已經令人想像到時觀眾熱烈嘅反應。

 

講到契爺,啟生同國珊都真心俾like,前者除咗聽修哥嘅idea,仲已經準備緊豐富嘅音樂,為演唱會錦上添花。

 

「仔女」力撐

喺眾多嘅契仔契女中,周啟生同方國珊就率先力撐修哥。阿生就擔任今次演唱會嘅音樂總監,但係佢話:「契爺先係總指揮官,我只係輔助佢o架啫,最重要係做出嚟契爺係舒服、開心,咁我就滿足嘞!

「o依家契爺隔一陣就打俾我,話(模仿修哥):『阿⋯⋯阿⋯⋯啟生呀,演唱會呢⋯⋯』跟住就俾啲新嘅idea我,有時我就唔聲唔聲,睇吓佢會唔會唔記得,點知佢全部都記得晒,真係好精靈!」

至於身為區議員嘅國珊,就落力為契爺宣傳。「喺契爺落實開演唱會之前,已經有市民問我佢幾時會開騷,契爺嘅fans男女老幼都有,我一早已經拎咗啲海報,俾區內嘅小巴貼,宣傳一下。

「但係之後又有街坊話,好難買到飛,o依家已經一票難求,可想而知契爺幾咁有號召力。」

修哥話全因何麗全(右一)嘅提議,先有今次演唱會嘅出現,所以佢將邀請嘉賓嘅重任,一併交俾後者。

 

清淡養生

籌備演唱會嘅同時,修哥仲趕拍緊兩個劇集,年輕人都可能會吃不消,但佢仲游刃有餘,「我噚晚仲拍到〇四(凌晨四點),不過無論拍到幾點,我有幾攰都好,我都會係咁行唔會坐低,未拍到我嘅話,咪圍住個廠行囉。咁樣先可以令血氣運行,坐喺度反而唔好。

「食嘢呢,我就會食多啲菜,食少啲肉,菜係每餐不可或缺嘅。如果嗰餐我食咗肉,咁就唔會食飯o架嘞!總之要食得清淡!但係今日有咁多好菜式,我都要破例食多啲啲!」

哈哈哈!修哥真係鬼馬!但我十分贊同佢食得清淡嘅飲食模式,羅蘭姐都係咁話:「o依家我都唔係點食飯,夜晚已經唔食好耐,只係食菜、冬瓜,加幾塊肉片咁。初初咁食嘅時候,到夜晚十一點零鐘,個肚就話俾我聽我餓嘞,要靠意志力去堅持唔食嘢,撐過三日就會習慣,堅持到幾個月,連個肚腩都會細咗!」

除咗減肚腩,羅蘭姐拍劇有時都要捱更抵夜,佢都有night modeo架。「有啲人會飲咖啡或者濃茶,但係我飲呢啲會瞓唔着,所以唔會咁做;仲有一樣嘢係唔做得嘅,就係食煎炸油膩嘢,除咗熱氣之外,雖然我都成幾廿歲人,但食咗煎炸嘢一樣會生啲一粒粒,咁就唔好睇啦!」

古法鮑羅萬有($988/例),集鮑魚、乾貝、花膠、蠔豉、海蔘等食材,經燜煮後非常入味,盡顯功架。

 

金雞同報喜($538),係脆皮龍崗雞,外脆內juicy。

 

豐饒喜富足( 原價$300/位,現優惠價$240 /位),為波蘭鵝掌伴唐生菜配鮑魚,係必點推介。

 

龍馬精神($208/位),即豉椒馬蹄炒原隻乳龍蝦,豉椒嘅惹味拿捏得宜,更突出乳龍蝦嘅鮮甜。

 

竹垂報三多($138/位),係紅燒竹笙雞絲遼參羹,用料味道夾得剛好。

 

大富大貴炒飯($228),粒粒分明嘅飯粒,配上新鮮嘅配料,毫無油膩感,極考功夫。

 

獨顯佔鰲頭($98/隻),即百花炸釀蟹鉗,啖啖肉,相當彈牙。

 

財源滾滾 (煎堆碌碌、$39/碟),炸得香脆,除意頭外仲為味覺帶嚟刺激。

 

喺今個月十號就踏入八十六歲嘅修哥,演唱會主題為《胡楓86破晒紀錄演唱會2018》,夠晒貼切。

 

 

 

修哥先後喺〇二年同一二年,喺紅館舉行演唱會,兩次都同觀眾玩成一片,而且嘉賓陣容仲係巨星級人馬添!

 

阿一海景飯店(尖沙咀)
地址:尖沙咀彌敦道63號iSQUARE國際廣場29樓
電話:23280983