一個月後，陳欣健便踏入73歲了。

幾個月前，他接拍了網劇《反黑》。播出後，國內點擊率衝破17億，令他攀上另一個事業高峰。

「我幾日前去江門拎了一個影視貢獻獎， Boxing Day 喺麥花臣開演唱會，之後會籌備幾個網劇，明年會去美加、星馬、廣東省巡迴登台，年中書展又會出自傳。」

名利雙收，更令他贏多一隻鹹蛋。

「呢兩年我長駐廣州住酒店，接待員從來冇睬過我，o依家就會主動合照。平日朝早去食粥，問親侍應攞鹹蛋都話冇，最近幾次我一行入去，問都冇問我，就會主動放隻鹹蛋喺我枱面。」

這個故事，陳欣健可能告訴了愛妻尤情一百次，只因尤情近五年患了腦退化症，記憶有時只能保留幾秒鐘或者幾分鐘，過後即忘，會問完又問。

「但求佢擁有5秒鐘嘅清醒，嗰一刻能夠令佢覺得快樂，已經足夠。」

有時候，同度一分一秒，原來是一件奢侈的事。

 

幾秒快樂

訪問前幾天，一名同事遇見陳欣健陪同太太行逛太古城，挽手相依，不離不棄。

「我嗰日係陪佢去行超市，買下衫，等佢開心吓，呢啲都係佢以前生活嘅記憶，等佢個腦一路有啲刺激俾佢。如果聽日問番佢，佢可能根本唔記得去過太古城。」

這一年間，尤情試過夢遊，半夜三更離家不知去向，險象環生。

「有次凌晨佢瞓瞓下，突然開門出咗街遊蕩，好在俾看更發現通知我哋。第二次佢半夜喺屋企門口條街，跌到全身污糟邋遢。我哋惟有將大門加多把鎖，費事佢失驚無神走咗出去，唔識返屋企。

「我因為擔心佢半夜會開煤氣爐點火，又唔記得熄火，每晚我都瞓得唔好，一聽到小小聲，我就以為佢有事，會即刻彈起身衝出廳望吓。如是者幾年，我嘅睡眠質素好差。」

想延緩病情惡化，留住同衾共枕的甜蜜回憶，陳欣健經常會拿出舊相簿，逐張逐張跟太太重溫。有時她會記得那時那處那模樣，有時卻早已忘記得一乾二淨。

「即使我付出了100% ，只會有1%機會令佢在睇相時刻，換取到幾秒鐘嘅快樂，都係好吖！」

陳欣健和兩名女兒，不時會陪尤情打麻雀消遣，鬆章是少不免的指定動作。「明明佢輸咗，會照俾錢佢，等佢以為自己贏咗，最緊要佢開心。」

 

每年生日，陳欣健都同太太在家中慶祝，看月前的生日照，笑得開懷，跟當年的美艷，不同味道。