為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2017 年 12 月 28 日

戴啟思挑機林定國 爭做大律師公會揸fit人

大律師公會一月十八日改選,有「民權大狀」之稱嘅戴啟思,日前突然開專頁,宣布組成內閣參選下屆大律師公會,明挑或會競逐連任嘅現任主席林定國。泛民近年一再失落大律師公會主席之位,o岩o岩經歷喪女之痛嘅重量級大狀戴啟思,今次收拾心情企圖代泛民重奪大律師公會話事權。

有大律師話,戴啟思參選嘅導火線可能係「一地兩檢」爭議。唔少泛民中人不滿大律師公會喺呢件事上遲遲唔表態,身為大狀嘅公民黨黨員郭榮鏗曾就呢件事向公會發炮,結果公會要出三十五頁紙聲明反駁,轟郭榮鏗說法偏頗兼中傷公會,火藥味濃。「呢件事唔少泛民中人都不滿,有人亦不滿林定國無參加過業界黑衣遊行。」

戴啟思唔係首次參選,佢○五至○六年更出任過大律師公會主席,○一年曾向該會時任主席梁家傑挑機。今次再披戰衣,戴啟思特意搵埋刑事案專家駱應淦、港大法律學院教授陳文敏等猛人做執委,「其實主席每年都換屆,但普遍會連任一年,前後做兩年。如果畀戴啟思撼莊成功,執掌一年嘅林定國,將變成回歸後在任年期最短嘅主席,公會就有望由泛民人士揸莊。」該名大律師說。

戴啟思任職英國駐黎巴嫩大使館嘅三十歲女兒莉碧嘉,十二月中被黎巴嫩警方發現被棄屍街頭,疑遭姦殺。事後,戴啟思一家發聲明表示仍在努力接受喪女事實,諗唔到幾日後就傳出佢參選嘅消息,「如果林定國唔加把勁箍票,個主席位都有啲危,始終大狀界嘅黃絲都唔少。」該名大律師續說。

大律師公會前主席湯家驊話,類似嘅挑機事件,以往都發生過,好似七幾年,列顯倫因不滿時任主席沈澄嘅處事作風決定參選,但傳統上極少出現政治光譜之爭。他擔心,該會換屆變成政治角力場,「輸贏唔重要,只怕將社會撕裂氣氛帶入公會。」

林定國(左)做咗一年大律師公會主席,按傳統極可能角逐連任,但遇上戴啟思(右)挑機,連任遇暗湧。

 

戴啟思(左一)日前喺專頁宣布,與駱應淦(左二)、陳文敏(左三)等猛人組成內閣,明挑或會競逐連任嘅現任主席林定國。