哪對CP（couple）唔鬧交？有時情人或夫妻相處，適當嘅「爭執」反而係生活情趣，好似年紀輕輕就成婚嘅杜志烜（Tom@Mr.）同太太何思諺（Leanne）咁，六年前結婚唔被外界看好，但六年下來，佢哋恩愛如昔，囝囝杜杜仲已經係K3生。早前佢哋為拍攝真人show，遠赴烽火之地伊朗，令二人都有特別感受。

我帶呢對CP嘉賓，去到位於銅鑼灣嘅「Cafe de Paris Est. in Korea」，品嘗喺韓國大熱嘅甜點，分享喺極地嘅深刻體驗。

 

意圖縮沙

真人show嘅特點，係夠貼地、真實，今次Tom同Leanne，為咗節目搭成十幾個鐘飛機，去到神秘國度伊朗，Tom話：「今次係喺誤打誤撞之下被邀，去呢個目的地，係因為當地俾人嘅印象，係好多恐怖襲擊，但真實嘅情況係點？真係去到先會知。」

Leanne表示：「我鍾意去唔同嘅地方遊歷，體驗各地嘅生活，就算o依家結咗婚咁耐都冇變，所以就算喺我哋出發之前，德黑蘭發生恐怖襲擊，佢（一指Tom）想唔去，我都堅持要出發，不過我哋都冇話俾其他屋企人知。」

Tom續說：「咁屋企有小朋友，要顧慮嘅嘢多咗，嗰時仲發埋黃色旅遊警示⋯⋯但係一去到當地，我就發現之前嘅顧慮都唔成立。去到伊朗先發現，當地人好多都好好人，我同清真寺嘅主持人交流，發現佢哋好respect其他民族嘅文化，同外界所講嘅好唔同。」

我帶呢對CP嘉賓，去到位於銅鑼灣嘅「Cafe de Paris Est. in Korea」，品嘗喺韓國大熱嘅甜點，分享佢哋喺伊朗嘅深刻體驗。

喺Tom同Leanne出發去伊朗前，德黑蘭發生恐怖襲擊，令Tom一度興起縮沙念頭，但後來佢靠太太克服恐懼，先有今次嘅難忘之旅。

 

啖啖芒果蟹肉牛油果醬三文治（$52），芒果同牛油果醬更能帶出蟹肉嘅鮮甜。

芒果杯（$98）選用菲律賓芒果炮製，鮮甜以外，加埋韓國忌廉同芒果沙冰，令味覺刺激更上一層。

餐廳hit爆韓國，嚟到香港開分店，呢個士多啤梨杯（$128），用上韓國士多啤梨加上韓國忌廉，夠晒原汁原味。

揭開面紗

Tom表示：「今次攝製隊揀我哋去伊朗，其實係有另一個深層意思，透過我哋喺一個咁極地嘅地方生活，同我哋早婚一樣，外界都已經有晒標籤，伊朗係『戰亂之地』；我哋就係『早婚夫妻』，但實質嘅我哋係handle到組織家庭嘅過程，實際嘅伊朗都唔似新聞報道所講咁恐怖。」

Leanne喺身旁附和老公，Tom續道：「有一幕我哋喺伊斯法罕一個大型市集拍，忽然有個八十幾歲嘅叔叔走過嚟，話帶我哋去玩，體驗伊朗人真正嘅夜生活。夜晚十點後，伊朗男人有咩夜生活吖？原來係去一個好似搏擊會嘅地方，啲參賽者全部都係好大隻嘅大漢，喺個擂台上fing鐵鏈同舉盾牌，我就覺得好無聊嘞。但呢個活動，原來係伊朗男人發洩精力嘅活動，仲可以減低犯罪率，因為當地冇酒吧冇K唱，呢個已經係佢哋嘅娛樂。」

Tom話伊朗予人嘅神秘感覺，同佢哋夫婦二人俾外間嘅錯覺一樣，但兩者嘅相似之處，佢就話要觀眾留意節目喎。

Tom同Leanne外，另有四對夫婦參與拍攝嘅ViuTV實況節目《婚姻五重奏》，將於2018年1月14日起，逢星期日晚9：30播出。

巧克力火鍋（一人set $118/兩人set $228）係餐廳嘅冬日新菜式，來自比利時嘅朱古力「湯底」，兩個人食更加暖笠笠。

火山芒芒（$52）係另一道以芒果為主角嘅甜點，今次配上海綿蛋糕、忌廉、曲奇，展現唔同嘅層次感。

西柚汁（$58）即叫即榨，仲有啖啖西柚肉，多一重享受。

飲「洗腳水」

伊朗之旅令Tom夫婦都有特別體驗，講到當地飲食，Tom就話：「我哋去嘅時候，撞正伊朗人嘅齋戒月，本來我想體驗埋齋戒，但係後來都同隊crew一齊食嘢。啲食物好似當地咁dry，有好乾嘅雞，仲有佢（一指Leanne）飲咗一啖就隊俾我嘅蒜奶，佢哋叫『大蒜乳酪』，係蒜茸加牛奶同芝士，當地人當汽水咁飲，係傳統嘅飲料。

「咁我入鄉隨俗吖嘛，但係味道真係⋯⋯我覺得似千年冇洗腳，一洗就係嗰杯『洗腳水』，都係一個好難忘嘅味道嚟嘅。」

Leanne就話：「我鍾意飲茶，當地人一日就飲成十幾杯茶，所以佢哋啲茶葉係唔會出口嘅。不過伊朗人通常會含住粒方糖飲茶，味道偏甜。」

Tom鏡頭下嘅Leanne，更有神采。

雖然Tom同Leanne結婚時不被外界看好，但o依家二人嘅愛情結晶杜杜，已經讀緊K3，仲識喺鏡頭前擺甫士，盡得父母真傳。

巴馬火腿忌廉芝士比高（$48），食材味道配合得啱啱好。

Caffe Latte（$41），最啱喺冬日低溫下，仔細品味。

Cafe de Paris Est. in Korea
地址：銅鑼灣登龍街18號V Point地下5號舖
電話：64362181