發展商都嫌新樓貴
一言好奇怪，去高級食肆或時裝店消費，服務員招呼會好啲、店舖裝修會靚啲、地方會企理啲、消費者置身其中梗係會感到舒服啲；但喺香港買樓就不一樣，買層成千萬嘅樓，竟然要排幾個鐘頭隊，又要畀地產經紀不停滋擾，入到售樓處更加冇乜時間畀你考慮，畀咁多錢攞咁嘅待遇，實在係香港社會一大奇觀。
事實上，從經濟角度睇，新樓個售價確實較同區二手樓高咗好多。一言多年地產市場經驗，買樓最重要係Location（位置）、Location、Location，即係話地產價值在於幢樓喺乜嘢地段，唔係話外觀幾靚幾正就得，相同區域嘅樓，價值一般唔會差太遠。
有位發展商老友高層跟一言私底下講，自己做呢行都望新樓而興歎，因為樓價確實較舊樓高一截。坦白講，新樓用料係正啲，外觀通常會較靚，但因為呢少少而每呎多付幾千銀，條數認真襟計，你諗一個千呎單位，每呎畀一千蚊裝修，即係一百萬，已經可以整到間屋幾靚喇。
西九新盤林立，價格愈賣愈貴。
買樓唔係買會所
但近幾年香港發展商通過出神入化嘅推售技巧，以及提升樓宇裝修，加上一個靚靚會所，新樓可以賣貴隔籬只有幾年樓齡嘅樓好多。仲有，新樓要攤分好多會所同公共面積，咁實用率自然較啲舊樓低。
至於豪華會所，隨時一個月都未必去到一次。不過，有發展商售樓高層跟一言講，今時今日，會所好緊要，而且要有咁豪得咁豪，做到成座法國皇宮就最好。
高層就解釋，呢啲全因虛榮心作祟，事關業主有親朋戚友到訪，帶佢哋喺個會所逛逛參觀，喺親友面前炫耀自己住嘅地方幾咁有派頭。而且，自己間屋唔夠闊落唔緊要，索性豪一次，喺會所訂個房招呼親友，你話幾咁體面。站在一言立場，又唔係住喺會所，為咗虛榮心而每呎畀多幾千蚊，值唔值就真係見仁見智。
會所係新樓一大賣點。
關之琳炒樓善變
小弟始終認為，幢樓價值在於地點位置，因為裝修係可以改，但地點就冇得變。就好似山頂南區，呢啲先係實至名歸嘅豪宅，住喺度嘅人非富則貴，又或知名人士，個價較一般住宅高好多都合理。
好似大美人關之琳，年前就將佢淺水灣南灣道十六號A嘅雙號數洋房放售，初期叫價約莫兩億銀，但眼見豪宅價爆升，後尾將放盤價提高到兩億五，點知又真係有人願意畀；關小姐心雄下再度反價，索性要到三億銀，間屋約莫四千七呎，即係話每呎高達六萬銀。買家畀佢嚇窒，轉移目標，最後用兩億三買入咗旁邊間大屋。
女人都係善變，不過咁，關之琳喺買樓投資方面回報確實唔差，你話佢有眼光好，有運氣又好，佢喺物業市場確實有一定戰績。關小姐原本喺銅鑼灣有間舖，大概一年前將佢出售，大賺超過一億；至於依家住緊嘅南灣道大屋，○七年以一億一千四百萬買入，短短兩年幾時間，已經升值成倍。
關芝琳投資有道，南灣幢樓（右二）兩年升值成倍。
朱立基細佬深藏不露
講開豪宅，呢排搞到滿城風雨嘅天匯買賣，幕後老細朱立基背景曝晒光，外界先知道原來朱立基係咁有錢，而且仲係香港人。地產經紀「通天」有個朋友，跟朱立基細佬朱立業有啲工作往來，之前唔知佢有個咁有米大佬，以為佢都係一般小型投資者。
話說朱立業同老婆劉佳麗二千年以三百三十五萬，買入北角海峰園一個八百三十四呎單位，供咗差不多十年，今年初突然將個單位按畀財務公司。喺財務公司做按揭，通常貪佢按得成數高啲，批核容易啲，但就要捱貴息；所以正常嚟講，按揭多數畀銀行做，畀得財務公司，都係有啲困難。於是乎通天個老友就以為，朱立業都唔慌多錢得去邊。
點知原來朱立業大佬咁有來頭，係越南大富豪，單單喺香港投資嘅物業都值幾十億，用嘅更加係私人投資銀行。查實以朱立基咁有錢，唔好話借錢畀弟妹，就係向銀行單聲，銀行都爭住借錢畀朱立業喇。
