邊個話男女之間冇真友情？今次「Paco巨星飯堂」就有一對好朋友：田蕊妮（阿田）見證坤哥吳業坤入行到走紅，仲喺唔同嘅劇集交手，培養出真友情。

佢哋仲喺TVB五十周年台慶劇《誇世代》中，繼續合作，擦出火花。我就特別邀請佢哋，同劇中拍檔蔣家旻，去到位於銅鑼灣嘅高質鐵板燒餐廳「鹽澤」，品嘗高級嘅鐵板燒，細說「誇」背後嘅真感情。

坤哥、阿田同家旻（左至右）喺《誇世代》中各有發揮，為觀眾帶嚟不少笑聲。

靈魂交換

阿田和家旻都好耐無見，而吳業坤則是首次認識，估唔到獲阿田賜名「坤哥」的他，甫見面已經有笑位。

阿田話：「佢嗰時參加歌唱比賽，我係MC，佢梗係無大無細o架啦！（咁大膽？）（坤哥：「嗰時未敢嘅！」）嗰時見佢戇吓戇吓，日日返到嚟綵排唱歌都係咁，咪叫佢阿哥，叫吓叫吓就變咗坤哥囉！點知佢真係以為自己係阿哥！」

坤哥就扮認真話：「真係以為係，娛樂圈係個大染缸嚟嘛！」

哈哈哈！阿田就繼續劇透，表示除有Bobby同坤哥靈魂調轉外，原來佢一樣有同其他角色交換靈魂，「中間我又會突然間同張繼聰靈魂調轉o架！即係調嚟調去，編劇唔亂嗰吓勁吖嘛！我喺入面演個小女人『凌潔茹』，係個奴性好強嘅老婆，老公話一就一話二就二，聽晒老公點。（咁非常好喎！）對我嚟講係一個新嘗試嚟。（但係你本身係咁o架！）你真係了解我呀！哈哈！我同個個講冇人信我呀！（我梗係知啦！）你就知啦！不過要我做番我自己都好難o架！哈哈！」

家旻就介紹自己演的「楊紫惠」貪慕虛榮，「坤哥佢有追我，但我當佢係兵，我個人比較鍾意走捷徑，見有錢仔就溝，其中一個係張繼聰。」

我帶三位嘉賓去到全港數一數二嘅鐵板燒餐廳，位於銅鑼灣嘅「鹽澤」，品嘗頂級嘅鐵板燒，暢談鏡頭以外嘅趣事。

阿田喺劇中罕有地飾演小女人，對「老公」歐陽震華千依百順，而後者就同坤哥嘅角色靈魂互換，引發連串故事。

 

前菜三點（$85/份）：日本大和芋配梅子醬、紅酒慢煮八爪魚及

有機番茄沙律（$88），選用自家製香檳配拌有機番茄，清新開胃。

活帆立貝（$240），將帶子以大火煎香，外脆內juicy。

份外有緣

至於坤哥就笑指，劇中嘅Bobby用佢演嘅「包豹」身體去溝阿田。「阿田要幻想係我去做戲，都應該幾辛苦嘅，又去食燭光晚餐，又好sweet咁睇戲，仲望住講情深說話。如果真係要我去演，我真係驚戲假情真囉！（阿田：「係呀！對住我做戲好難抽離！」）我對上嗰幾部戲都抽離唔到呀！

「其實由《巨聲》開始都抽離唔到。（阿田：「對上嗰部戲佢喺天台度，我搣佢啲手指整死佢嘅，佢一路抽離唔到，日日上天台跳落嚟呀！」）講我死咗會纏住你！（阿田：「所以你依家纏住我呀！」）」

睇佢哋你一言我一語，妙語連珠，以為「田坤」已經講完，點知仲有「下半場」。阿田話：「纏到叫我幫你帶劇本，又要幫你買凍檸茶走甜，再嚟嘅話，我自己本身泰拳都打得好唔錯吓，唔使我老公出手囉！」

「坤哥」之名係阿田所起，二人私交甚篤，妙語連珠。

成日話要「食好西」嘅坤哥，飯腳包括阿田，仲有剛為人母嘅賴慰玲。

張繼聰同阿田會有靈魂互換嘅情節外，同家旻都有親熱嘅戲份。

西班牙紅蝦四吃（$480），將蝦身煎香，蝦頭煮麵豉湯，蝦膏配搭稻庭烏冬，蝦腳烘乾炒成小食。我同阿田都特別推介蝦膏稻庭烏冬，食出鮮味！

 

香脆洋芋平政魚（$220），除去平政魚嘅厚身魚皮，加上一層秘製醬汁黏實薯片，喺鐵板上以大火煎香，添加層次。

重遇真身

講番劇情，阿田最深刻就首推跟「老公」真身重遇嘅一刻，佢話拍嘅時候都好感動。「我一路以嚟眼見嘅坤哥，其實個靈魂係Bobby嚟家嘛！但我『老公』失蹤咗咁耐，突然喺我面前出現喎！我好感動之餘，我又係咁打佢！因為接受唔到呢件事，佢走咗咁耐，突然話返嚟就返嚟，嗰段時間好辛苦o架嘛又裝備好自己，又學識點樣獨立，所以呢場戲心情係好複雜幾得意嘅，希望觀眾都可以留意吓（你演技唔使講啦！）都唔係o架！我拍時自己都好感動呀！」

而坤哥亦自爆有場同麥明詩嘅感情戲，要被對方狂打，「佢真係拳拳到肉咁打落嚟，都打咗4、5個Shot，可能佢俾咗錢導演啦！」

被網友指為「偽毒」嘅坤哥，喺劇中難逃「當兵」嘅命運，其中一名「娘娘」就係家旻。

劇中大把好戲之人，包括邵美琪﹙右﹚。

家旻喺劇中同陳豪及麥明詩，有唔少對手戲。

日本A5佐賀和牛（$1,320/200g），嫩滑多汁。

煙燻黑毛豬（$360），以蘋果木煙燻過嘅黑毛豬，煎至六、七成熟，肉質嫩滑，仲有香濃嘅煙燻香味。

鐵板香草法國乳鴿（$200），嚴選法國進口嘅優質乳鴿，煎香後入口啖啖肉，嫩滑多汁。

鹽澤
地址：銅鑼灣耀華街38號Zing！28及29樓
電話：24023318