為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2017 年 12 月 24 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

「慢」遊台中

早前提過同尊賞假期合作安排「台中尋味之旅」,旅程已經喺十一月尾圓滿結束,今回就同東周讀者分享吓旅程點滴,順道同大家更新一下台中近年嘅發展。

民以食為天,台灣美食多如繁星,今次就試咗鱘龍魚宴、甕缸雞、日式懷石料理、季節限定嘅手摘甜柿同地道小食。講到最有傳統古早風味嘅菜式肯定係甕缸雞,餐廳堅持源用傳統做法,用特製甕缸作為烤爐,以龍眼木做火材,將甕缸燒到一定温度,以土燜烤。想喺香港品嚐如此地道嘅甕缸雞?難!因為要烤到脆卜卜即刻食先夠過癮,絕非一般電爐可做到皮脆肉嫩、肉汁四濺嘅效果,真係一試難忘!記住台中嘅物價比台北更低,「尋味」成本完全揮低香港。

今趟最舒閒嘅行程就肯定係包船遊覽嘅日月潭,皆因每個城市人心中都有一片綠洲,我都唔例外,不論長短假期都想到郊外吸收吓維他命D。聽導遊講,日月潭係台灣八大景之一,自清朝起就頗具名氣,全因一年四季景色都各有千秋。早喺清朝就有詩人細膩刻畫日月潭嘅湖色風光,首聯「山中有水水中山,山自凌空水自閒」,真係貼切得令人拍案叫絕,負能量一掃而空!

行程其中一間酒店就正正喺日月潭湖邊嘅涵碧樓。涵碧樓係過百年歷史嘅五星級度假酒店,上世紀進出涵碧樓都係帝王將相,好似1923年日本皇太子裕仁訪台都指定喺涵碧樓休息,所以今趟可以話係住真正嘅「帝王級」酒店。雖然涵碧樓已經多次翻新,但禪式建築豎立喺波光粼粼嘅日月潭湖邊,氣勢依然磅礡。

我以前去台灣旅遊一定首選台北,一直以為台中係稍為落後嘅旅遊區,但睇番今年一月歐睿信息公布嘅全球百大旅遊目的地城市,台中成功打入百大,排名全球第97,旅遊人次達198萬人次,比前年上升8%。台中除咗係熱門旅遊地區,亦係本地人心目中移居嘅理想地,台中市自2015年起年淨遷入量由7,000多躍增至1.4萬人。貼地啲聽當地人講,台中天氣比台北穩定,而且工作機遇亦唔輸蝕,房價更加平一大截,比人多擠迫嘅台北更「宜居」。

今次係以隨團形式同各團友輕鬆「慢」遊台中,返香港後好多朋友問我,團友們係咪都以旅遊為名,攞貼士為實呢?事實正正相反,成個旅程大家都非常享受旅行社悉心安排嘅行程。團友中不乏半退休人士,可以話去勻全世界,台中都去過幾次,今次見到我呢個團以美食行先,所選餐廳夠特別,大家至報名參加。今次尋得開心,佢哋叫我一路尋落去,佢哋會一路追隨做鐵腳。

我今年已第二次造訪台中,上次喺旅途中因為同孫女facetime嘅緣故,應承咗孫女帶埋佢去台中,所以年尾將會嚟個家族旅行,三度訪台!

今次已是陸叔今年第二次到台中,感覺上其風景及美食都十分吸引。