為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2017 年 12 月 14 日

「公職王」擁土木工程師資格 鄭若驊料掌律政司

政圈盛傳律政司司長袁國強短期內辭職,而佢繼任人終於呼之欲出,就係資深大律師鄭若驊,有傳政府正等待中央審批,最快下月履新。其實早喺特首林鄭月娥組班時,鄭若驊已經係律政司司長大熱,只不過一度未能成事,但似乎林鄭真係好有誠意,終於打動鄭若驊加入熱廚房。

鄭若驊來頭猛,八七年獲大律師資格,○○年晉升為資深大律師,最擅長處理建築業、國際投資爭議相關嘅法律事務,並有豐富嘅國際仲裁及調解經驗。○八年,佢通過全球選舉成為首位出任特許仲裁學會主席嘅亞洲女性,喺任香港國際仲裁中心主席期間,促進中港兩地仲裁合作,因此與內地關係良好。

佢喺國際仲裁界聲望高,去年海牙國際仲裁法庭否決中國對南海嘅主權,鄭若驊公開批評呢個判決令人產生疑問或爭議,敢言作風令佢獲得中央信任,司法界也敬重佢。

雖然論刑事檢控經驗佢唔算多,但公職經驗豐富,熟悉政府及公共政策嘅運作。佢曾出任交通諮詢委員會主席,為興建新道路出謀獻策,○八年處理的士要求加價事件表現淡定,大獲政府與業界好評。佢同時擁有土木工程師資格,曾經與林鄭處理中環填海官司大獲全勝,林鄭對佢讚不絕口,曾表示如果政府再遇到具爭議性嘅案件,鄭若驊係政府首選嘅代表律師,可見林鄭有幾器重佢。

本身係資深大律師嘅行政會議成員湯家驊話,鄭若驊的確係律政司理想人選,「如果由佢接任,對本港繼續發展仲裁行業有好大幫助。」湯家驊指出,鄭若驊無強烈嘅政治色彩,唔會咁易畀人覺得司法有政治考慮。

但鄭若驊上任後都要處理唔少燙手山芋,首要當然係高鐵一地兩檢,政府嘅「三步走」方案,已走出第一步,早前已與內地簽署《合作安排》,下一步係由人大批准及確認《合作安排》,最後一步就係返番立法會進行本地立法工作,呢關係最難闖嘅,到時點樣與立法會議員討價還價最考起佢嘅政治智慧。

鄭若驊來頭猛、公職多多,喺法律界及仲裁界聲望高,係理想嘅律政司司長人選。

 

盛傳袁國強將於短期內辭職,做番老本行私人執業。

 

高鐵一地兩檢將進行本地立法,係下任律政司司長最棘手處理嘅難題。