為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2017 年 12 月 17 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

零售虛實新時代

政府公布最新零售數據,本港零售總銷貨值由今年3月起重拾升軌,其中第三季經季節性調整總銷貨值,估計較第二季上升2.7%。十月零售業總銷貨值為375億元,按年上升3.9%。政府指受惠於樂觀嘅消費情緒及訪港旅遊業持續復甦,零售業銷售保持增長,短期內仍有支持。

今年消費市道回暖,香港零售業界對聖誕新年生意充滿憧憬,但另一方面,網購成風確實會對實體店的生意構成影響。以前聖誕新年係零售商嘅重頭節日,但內地電商推動「雙十一」節,令中港零售業提早進入旺季強攻模式。舊年雙十一全日成交額1,207億人民幣,今年只用咗13個小時就超越舊年,有機構统計今年單日全網總銷售額達到2,539.7億人民幣,一共產生13.8億個包裹,即係13億中國人每人平均超過一包。

近期消費市道確有回暖趨勢,零售總銷貨值自三月起已重拾升軌。

美國「黑色星期五」和感恩節嘅網上銷售亦破咗紀錄,全美一百家電商嘅網上銷售額達到79億美元,按年上升17.9%。

話雖如此,香港零售業有見於經濟數據理想,對於嚟緊嘅聖誕銷售情況感到樂觀,香港零售業管理協會嘅會員預料可以喺聖誕期間錄得5%銷售增幅,明年整體前景仍然保持樂觀。我認為雖然電子商貿的確改變咗消費行為,但目前不論中國還是美國,零售仍然主要來自實體店舖。而且好多零售商已經部署結合線上線下,虛實並重。

實體店喺某些產品方面較有優勢,例如高檔衣服鞋類、奢侈品等,去店舖揀選同試清楚仍然係消費者首選,問題係零售商能否提供網購做唔到嘅顧客體驗。好似過往代工生產奢侈品牌手袋小皮具為主業嘅時代集團(1023),近年就轉戰中港零售市場。面對網購,時代集團實體店嘅銷售數字仍然有驚喜,喺剛過去嘅雙十一都能夠錄得增長。

截至六月底,集團擁有兩個自家品牌以及三個歐美品牌嘅中港獨家分銷經營權。集團並繼續留意歐美品牌嘅收購機會,最近再攞到皮革品牌a.testoni同睡衣品牌Jockey嘅內地經營權,將透過目前46間分店及計劃於今個財年開設嘅15間分店主攻內地市場。集團計劃日後將撇除派息後約50%至55%純利用作收購國際品牌之用。

上一財政年度內零售業務佔時代集團營業額近一成,但集團計劃逐步提升零售業務比例。年度內零售業務收入因為渠道結構改善及店舖效率提升而增長33%,並且轉虧為盈。實體店以外,集團會繼續採用全渠道(Omni-channel)銷售,令線上線下業務產生互補及協同效應,亦會擴大對內地網上銷售渠道嘅投資,預計今年網上收入將可提升30%。

虛實雙線發展,係未來零售業嘅發展大方向。阿里巴巴同實體連鎖通路上海百聯簽署戰略合作,又開設盒馬無現金超市,由線上走到線下,虛則實之。馬雲稱今年為阿里巴巴新零售元年,可以預見零售虛實新時代才剛揭開序幕。