五年、十年⋯⋯都係一個值得紀念嘅里程碑，五年下來，組合Robyn & Kendy（R&K）經過小清新翻唱，到推出自家創作，漸趨成熟。喺今個月底，佢哋將會喺伊館，舉行入行首個售票音樂會，為佢哋嘅音樂歷程作一個小回顧。

我帶兩位嘉賓，去到位於銅鑼灣嘅「金公館」，品嘗特色嘅川菜，暢談佢哋嘅音樂經。

即將舉行入行五年以來首個售票音樂會，Robyn（左）& Kendy（右）現正積極籌備，準備喺12月29號，向樂迷展示最佳狀態。

清新蛻變

R&K喺一一年於Youtube上載翻唱短片，網友極速爆Like，兩位女孩子喺一二年入行後，除咗繼續為唔少令人耳熟能詳嘅歌曲，注入「小清新」嘅靈魂，亦有推出原創歌曲，今次嘅音樂會，正好作為佢哋嘅回顧。

Robyn（葉晴晴）表示：「我哋個音樂會叫『Reflection』，因為我哋想同樂迷回顧每一個時期嘅Robyn & Kendy。雖然五年唔係一段好長嘅時間，但係我哋已經有好大嘅變化，由初時拎住ukulele自彈自唱，到攞晒啲杯杯碟碟做樂器，再到今年加埋電子元素落去⋯⋯無論係邊種形式，都代表咗我哋。」

Kendy（孫曉慧）即時補充：「音樂會喺伊館舉行，我哋想觀眾入場嘅時候，有一種去咗我哋屋企嘅感覺，喺最舒服嘅狀態下聽我哋嘅歌。為咗呢個音樂會，我哋啱啱仲出埋新歌〈世界對我們〉，喺MV入面仲有新嘅形象。」

我帶R&K去到位於銅鑼灣嘅「金公館」，品嘗特色嘅川菜，Kendy仲話，食辣有助開聲添！

為咗音樂會，Robyn話自己同Kendy已經精選咗一批新嘅翻唱歌，秉承R&K嘅傳統，佢哋喺飯敍時仲率先清唱Snow Patrol嘅名曲〈Chasing Cars〉，即scan右下角嘅QR code欣賞吓！

Kendy被拍檔稱為廚神外，佢連開聲秘方都相當特別，係以威士忌加陳皮及暖水，佢話飲咗即令聲更靚。

音樂會名為《Reflection Live》，係R&K五年音樂路嘅回顧。

加添新意

多年嚟R&K嘅精采翻唱歌，如〈你是我的女人〉、〈思念是一種病〉等，佢哋表示都有機會喺音樂會上，現場演繹俾樂迷欣賞，Kendy仲話：「我哋好想誠邀其中一位原唱者，擔任音樂會嘅嘉賓，o依家好用心咁以誠意打動佢，希望到時會有驚喜！」

Robyn就話：「翻唱歌係Robyn & Kendy嘅一部份，所以除咗唱過嘅歌，我哋會揀一啲之前未公開唱過嘅翻唱歌，使出一啲冇使出過嘅招數。」

跟住兩位就即席清唱Snow Patrol嘅名曲〈Chasing Cars〉，大show靚聲。開show在即，R&K密鑼緊鼓練歌外，Kendy仲有獨門方法開聲。「我會用暖水溝威士忌，再加塊陳皮飲，飲咗即刻開聲！」

 

Kendy表示，新歌〈世界對我們〉係佢哋最熱血嘅作品，所以連MV都以「紅孩兒」為造型。

愛澱粉質嘅Robyn（右），一周會做六日運動，「跑腳」包括湯怡（左）及馮允謙（中）等。

同拍檔一樣有腹肌嘅Kendy，做高難度瑜伽動作，毫無難度。

到會廚神

哈哈哈！估唔到Kendy同我一樣，對威士忌情有獨鍾，Robyn再爆料：「Kendy煮嘢食都好叻o架！」前者就表示：「我鍾意煮餸、煮pasta，但煮得最多係Paella（西班牙海鮮燴飯），通常啲friend開party，我就煮一大鍋做到會，加番紅花同海鮮煮就已經好好味。」

相比Kendy嘅精湛廚藝，Robyn就擅長食多啲。「我好鍾意食澱粉質，好多時錄音都要喺studio樓下買麵包，食咗先有力唱歌。最鍾意食北方嗰啲麵、餃子同饅頭！我一個禮拜做六日運動，跑步、瑜伽同circuit training都有，咁就可以抵消番！」

餐廳以三國故事作主題，連菜式名稱都跟足個theme！呢個水淹七軍（$268），即係麻辣水煮桂花魚，魚肉加上雞紅、四川苕粉、大豆芽等，以快速燒煮，然後淋上高溫紅油，保持魚片鮮辣及香辣 。

金縷玉衣（$88），係蒜泥白肉，非常惹味。

霸王項羽（$188）係霸王炒辣子雞，以大量子彈椒、青紅花椒粒、腰果，配以鮮嫩雞丁，以高溫快速脆炸，故能入味及香脆。

呢個青城山杏汁燉白肺湯，取名空城之計（$58/位），落足料燉四小時，滋陰潤肺。

雁塔題名（$268/隻）係樟茶鴨，鴨肉鮮嫩juicy。

招牌口水雞取名瓦口天蕩（$388/隻），麻辣度配合得啱啱好！

木牛流馬（$98）係蒜片牛仔粒，一口size食得夠痛快，佐酒最啱！

草船借箭（$288）係川辣串串蝦，整個presentation貼晒題，蝦鮮味美。

金公館
地址：銅鑼灣謝斐道379-389號特麗樓1樓全層及地下5號舖
電話：25286189