梁朝偉男神跌Watt

近期香港影圈興番拍六十年代傳奇人物嘅故事，繼早前上映嘅《追龍》之後，最近翁子光執導嘅新作《風再起時》（前名︰全球通緝令），同樣係講昔日華探長嘅事迹。

早排，《風》片喺內地舉行咗開鏡儀式，呢套電影陣容強勁，包括：梁朝偉（偉仔）、郭富城、杜鵑、譚耀文、何啟南等，當然唔少得翁子光嘅女友何佩瑜（Jeana）啦！大家梗係想知Jeana做乜角色？佢嘅角色就係一眾港女夢寐以求嘅偉仔老婆。開鏡當日，Jeana同偉仔分別着咗復古婚紗同禮服，能夠扮演偉仔老婆嘅Jeana好興奮咁同東姑講，畀對方嘅電眼迷暈：「第一日開工拍我哋係老夫老妻，梁生一埋位，五秒即action，好想佢畀多五秒我warm up，佢對電眼太犀利，咁少時間紓緩唔到件事。」其實，Jeana大可叫男友加戲，吓嘩！

不過，東姑就覺得偉仔開鏡日，好似不在狀態，個樣烏眉瞌睡，額頭仲多咗幾條皺紋，同平時大家見到嘅男神真係好大分別囉。

梁朝偉嘅一身白色禮服雖然帶點英氣，但係佢嘅精神狀態就唔係太好囉；反而佢身邊嘅「綠葉王」何啟南就容光煥發。

能夠喺電影中扮演偉仔嘅老婆，Jeana勁興奮，佢仲話已經畀對方嘅電眼迷暈咗添。

郭富城嘅探長造型有型有款，做咗老竇嘅佢果然零舍醒神！