三爸愛回家
人總要有經歷，先會成長，好似分別修讀藝員訓練班入行嘅黎諾懿、徐榮同張達倫，早年因緣份牽引成為老友，而三兄弟由當年嘅風花雪月，變成今時今日各自擁有美滿家庭，仲做埋人父，Gathering嘅話題，仲變晒講湊仔經。
今次「Paco巨星飯堂」，我就邀請呢「三爸」，去到位於土瓜灣嘅「龍華火焰」，品嘗正宗嘅原條烤魚，細說湊仔經、事業經。
唔止喺《愛·回家》，徐榮、諾懿同達倫（左至右）喺現實中都係好兄弟，
為子女收心
喺TVB即將開拍嘅新劇《BB來了》中，諾懿、徐榮同達倫，三個現實中嘅好兄弟，又攜手合作。單睇劇名，似係為身為男一嘅諾懿度身訂造。今年四月，佢同太太李潔瑩嘅愛情結晶黎峰睿（乳名小春雞）出世，榮升為人父嘅佢，就由Kidult變身成廿四孝慈父。
「小春雞啱啱七個月大，o依家我全部精神，都係希望小朋友健康成長。阿仔出世頭十日係最忙嘅階段，當時真係好辛苦，太太忙住餵人奶，我就負責湊仔。可能因為第一胎嘅關係，我超級緊張，成日有幻聽以為BB喊。之後開始放手畀外父外母照顧。o依家就算一對一湊B，都完全無難度。我仲同阿榮佢哋三個，帶埋小朋友出去玩，交換吓湊仔經。」
育有十一歲囝囝徐朗同兩歲萌爆星B徐心怡（包包）嘅徐榮，就成兩個兄弟嘅育兒專家，「以前佢哋未做爸爸，我哋出親去食飯，我大約十點幾就要走，趕返屋企睇小朋友。早排我哋三個一齊出席公司活動，話完咗去食啲嘢，點知攞車嗰陣唔見咗諾懿，原來佢返咗屋企睇BB！以前我哋三個成日喺屋企gathering真係堅癲！次次每人飲一支威士忌，不醉無歸，o依家就好少飲到咁。」
愛飲酒嘅達倫，十月亦榮升做爹哋後，經常將囝囝Zachary（勁揪雞）掛喺口邊，一副有子萬事足嘅模樣。「我都有幫手湊o架！換片就一定唔少得，但佢間唔時就『斟茶』俾我，我已經用毛巾冚住佢個何B仔，但佢真係太勁嘞，咁都請到我『飲茶』。」
我帶「三爸」去到位於土瓜灣嘅「龍華火焰」，品嘗正宗嘅原條烤魚，慢慢分享湊仔經、事業經。
一提囝囝囡囡，諾懿、徐榮同達倫全部都一臉滿足。
升級原條桂花魚（$298），魚肉鮮味，仲有四級辣度可供選擇。
胡椒蟹（時價），可選羔蟹或肉蟹，相當惹味。
冰鎮花雕醉鮑魚（$68/隻、兩隻起），淡淡酒香，帶出鮑魚嘅鮮味。
各有好發展
「三爸」當中，以○二年出道嘅諾懿最幸運，第三部劇《當四葉草碰上劍尖時》已經係男一，近年亦憑住喺《愛·回家》中飾演馬壯爆出，再喺《燦爛的外母》再嘗做男一嘅滋味。有所經歷嘅諾懿感慨咁話：「拍咗四年幾《愛·回家》keep住人氣，早排可以第一次返內地拍網劇，我先發現內地市場好大，製作又好認真，當地政府對拍攝仲好支持添！好似拍一場飛車戲，真係可以封晒成條大橋，然後成架車飛落橋報銷。但係喺香港拍嘢，就好多限制，申請仲好嚴，都幾大對比。」
四十三歲嘅「綠葉王」徐榮，喺過去十年都係處境劇柱躉，其中喺《同事三分親》中嘅「裘俊」，同《愛·回家》嘅「馬強」，就令人印象深刻。「處境劇冇乜反派，演繹方式貼地啲，戲劇性都少啲，到一六年中拍咗《巨輪II》，我飾演黑幫頭目『馬文泰』，我終於有得做奸人，劇入面有好大發揮，演完好滿足。」
同樣有份拍《愛·回家》、飾演律師「嚴謹」嘅張達倫，喺早前熱播嘅《不懂撒嬌的女人》中亦抽到支好籤，飾演暖男「Oscar」，愛上單親媽媽譚凱琪，「呢個劇有好角色、好劇本，加埋好對手，拍完令我有好大得着。」
諾懿偶有下廚，仲話炮製海鮮係佢嘅必殺技。
曾為跑馬地某知名小館廚師嘅徐榮，話
達倫平時冇厘正經，但抱住囝囝Zachary，就成個穩重晒。
難得休息，徐榮同妻兒即嚟個開心全家福。
小春雞啱啱七個月大，諾懿又喺ig晒幸福。
兄弟拍住上
講到最想挑戰嘅角色，諾懿就話：「我想試吓做聾啞人士，只靠眼神、演技同肢體動作，去贏取觀眾嘅歡心。冇言語嘅輔助，其實好有難度。」
達倫即笑老死：「你平日說話咁多肢體動作，不如試吓做傷殘人士，咪仲有挑戰性！」話畢，佢隨即轉用認真tone話：「我就想拍啲勵志片，用情感去打動人，發放正能量。」
徐榮立即接上：「咁不如拍番一套盲、聾、啞三兄弟，一生互助大家嘅溫情勵志戲啦！」
一聽到呢個idea，諾懿即自創戲名為《天水圍的跛與盲》，三兄弟即興度橋，啱晒channel！唔講唔知，原來達倫同徐榮嘅友誼，係由請飲嘢開始，達倫話：「我〇四年讀完訓練班啱啱出嚟，喺一套劇入面扮死屍，瞓喺地幾個鐘都唔郁得，然後阿榮行過嚟問我：『使唔使買杯嘢俾你飲？』佢嗰吓好窩心，我哋咁就做咗好朋友。」
而徐榮同諾懿嘅兄弟情，就由唔怕死、食鴨頭展開，諾懿話：「當年我哋喺橫店拍劇，正值禽流感高峰期，我哋恃住後生唔怕死，約埋一齊去食鴨頭，日日又食又吹吓水，就變得好friend。」
花雕醉蝦（$58），酒香蝦甜。
七味蝦餅（$48），手打製作，非常彈牙。
招牌麻辣雞煲（半隻$178/全隻$258），以秘製香料炮製，麻辣比例啱啱好。
頂級本地手切牛頸脊（$298），牛味濃郁，令人回味。
招牌雞翼（$58），以秘方炮製，味道香辣，外脆內軟。
龍華火焰正宗烤魚海鮮火鍋專門店
地址：九龍土瓜灣北帝街29-35號1樓全層
電話：22345777、29979878
