鄧麗欣巡視業務

最近，鄧麗欣（Stephy）每次出嚟嘅話題，一定係講佢前男友方力申（小方），一係話復合，一係就講身家。早排，小方畀老竇踢爆話投資買畫同物業，估計已坐擁過億身家，於是個個都追住Stephy問投資心得。不過，Stephy就同東姑講：「呢個數字都是係我嘅目標，佢有咁多錢呀？我就冇計（自己有幾多）。」

Stephy話以前小方有介紹佢買畫欣賞同收藏，估計畫作已經升值，但冇諗過出售。「除非我好唔掂，希望唔會啦！」佢o依家就將投資集中喺物業同內地時裝生意上，最近東姑喺上水火車站，就撞到Stephy返上去內地處理生意。呢日，佢一身運動裝，同幾位助手，帶咗好多行李，準備上火車；而心情非常靚嘅佢，好似開籠雀咁款，不停講兼指手劃腳，好鬼high！睇嚟，Stephy上面盤生意應該賺到笑，分分鐘勝過小方份身家。

喺上水火車站等火車嘅Stephy，相信係返上去內地處理生意。

 

Stephy呢日心情靚靚，笑容滿面，兼且表情多多，仲好似有講唔完嘅話題。