能夠成為影帝，代表演員嘅演技獲公眾認可，除咗有鼓勵作用，最重要就梗係備受肯定。林家棟嘅演技，從佢嘅影帝獎座已經反映到，但喺即將上映嘅《狂獸》中，佢繼續挑戰自己，專登去學潛水，只係為咗處理戲中嘅水底演出同動作場面。

今次「Paco巨星飯堂」，我就誠邀影帝，同埋喺電影中同張晉對戰嘅灰熊（蘇偉泉），去到位於銅鑼灣嘅「米走雞Deluxe」，品嘗特色雞煲，暢談連場水戰背後嘅故事。

影帝家棟同電影新丁灰熊，喺動作鉅片《狂獸》中首度合作，同張晉、余文樂等星級人馬，大鬥演技。

力撐新導

家棟表示，今次參與演出電影，大部分係因為導演李子俊。「我好似Paco你咁，撐新導演！子俊之前做過好多戲嘅副導演，今次係佢第一次做導演，梗係要支持吓！佢喺兩年前就俾我睇呢部戲嘅劇本，你知啦，佢個樣幾咁凶狠o架啦，我咪應承佢演囉，點知應承咗之後先知咁大鑊！

「戲入面好多激烈嘅動作，畫面嘅風格好強烈，我好欣賞子俊諗到喺水底玩，個個就為咗呢部戲，去學潛水。最重點係張晉以前對水有陰影，所以本身好驚水，但都去學潛水，就知個劇本有幾好！」

喺陸地上拍肉搏戲，要打得精采已經有難度；喺水底拍打鬥場面，更加考起演員同導演，今次有資深嘅李忠志擔任動作導演，不論喺海、陸，都有好多出色嘅動作設計，令家棟去學潛水嘅誠意，唔會白白浪費。

我帶兩位嘉賓去到位於銅鑼灣嘅「米走雞Deluxe」，品嘗特色fusion雞煲，再暢談《狂獸》嘅幕後故事。

家棟大讚張晉嘅專業精神，克服自己嘅恐懼拍攝水戰。

喺魚市場拍攝嘅追逐打鬥戲，最令灰熊難忘。

黃金芝士雞煲（$168），雞煲為中菜，融入西餐嘅烹調手法，先用西式低溫慢煮十二小時，煮出芝士濃郁嘅香味，再以中式猛火炒製雞煲作收尾，為中西合璧嘅fusion煲。

火焰麻辣雞煲（$158），以香料而非辣油為主導，用三十多種香料製作，先將雞炒至八、九成熟，再配以玫瑰露酒點火炒香（下圖），將香料精華鎖入雞肉中，做出麻辣嘅感覺。

 

深夜潛水

一講潛水，家棟就話：「喺水底拍戲，我都會恐懼o架！因為有場戲，講我甩咗個氧氣筒，拍嗰晚係深夜三、四點，喺西貢拍，夜晚拍呢啲深海潛水戲，仲恐懼！
「話就話有好多工作人員，但係個個都離我成二、三十呎咁遠，有咩事起嚟，好似有鯊魚扯我落去咁，佢哋點都嚟唔切救我啦！」

克服恐懼，家棟話最羨慕張晉。「呢部戲打嘅比例多，張晉直情係型英帥靚正！佢個造型染金毛，喺片場嘅煞氣好強，一打就更加唔使講，加埋佢場場都搏晒命，真係正！」

貴為影帝級人馬，家棟嘅演技自然不用置疑，而且佢為演繹角色所下嘅苦功，仲好值得後輩學習添！

為咗部戲，家棟特地去學潛水，處理戲中嘅多幕水底演出。

 

家棟喺未上映嘅新作《智齒》中，一樣要應付連串動作場面，仲同日本型男池內博之（圖右）、李安兒子李淳（上圖右）及國內女星劉雅瑟（上圖左）交手。

竹笙墨魚滑（$88），將墨魚膠釀入竹笙中，過程耗時，而高度吸湯汁嘅竹笙，包住彈牙嘅墨魚滑，造出「爆醬」感覺。

鮮炸響鈴（$48）為餐廳自家製，香脆可口。

虎蝦（$98/6隻），每日新鮮運到，蝦肉鮮甜彈牙。

力搏張晉

灰熊喺戲中同張晉嘅對手戲最多，而且仲俾阿晉撳住嚟打。「我喺魚市場同船上面，都要同張晉對打，仲要俾佢撳落水！雖然拍嗰時係夏天，但係拍我喺船上，俾張晉撳落水嗰場戲嗰日，個天好陰，氣溫唔高，拍第一個take嘅時候，我都覺得凍凍哋，但為咗出嚟嘅效果好啲，我哋都拍咗五、六個take。張晉好堅！打得好睇就預咗，但係佢撞親腳都keep住做戲，呢樣真係要學！」

哈哈哈！身邊有咁pro嘅榜樣，令灰熊都唔敢怠慢。「另一場戲要我跳船，由A船跳去B船，兩架船都係全速開緊。志叔（動作導演李忠志）示範跳一次俾我睇，跳完問我得唔得，我實話得o架！但其實我係有啲驚，跟住跳第一次就『墩』到條腰，都要忍住痛跳第二次，好彩嗰個take就OK咗，唔係我實散晒！」

由足球運動員轉型成演員，廿九歲嘅灰熊甚有決心，今次參演電影只係佢踏出嘅第一步。

喺動作導演李忠志（上圖左三）嘅精心設計下，唔只武術高手張晉，其他演員包括灰熊（左圖右），都打得火花四濺。

 

手切新鮮牛頸脊（大$298/小208），鮮味嫩滑。

哈哈蝦中寶（$118），將大蝦釀入溝有露筍和蟹籽嘅手打蝦膠，入口既有豐富蝦味，又有清新嘅感覺。

黑松露魚麵（$138），將黑松露、蟹籽同蛋白加入魚麵打起，入口有好豐富嘅松露香，口感香滑彈牙。

米走雞Deluxe
地址：銅鑼灣渣甸街50號渣甸中心3樓全層
電話：93415931（Whatsapp）