強者經常勇於挑戰自己，張晉喺新戲《狂獸》中，不論造型或動作，都要突破自己，喺導演李子俊嘅精心打造下，成功化身瘋狂刑警。今次「Paco巨星飯堂」，我就邀請電影嘅兩位中堅份子，去到位於銅鑼灣嘅「心燒食堂」，品嘗特色嘅日本料理，細說鏡頭背後嘅故事。

「雙晉（俊）」阿晉同導演子俊，為即將上映嘅《狂獸》傾盡全力，令人對電影加倍期待。

從影突破

電影嘅導演李子俊，雖然今次首次執導，但佢係資深嘅電影人，曾為《聽風者》、《盲探》、《竊聽風雲》系列及《全力扣殺》等電影，擔任副導演。講到電影叫《狂獸》嘅原因，子俊表示：「將人性推到極點，就只會剩番狂性同獸性，喺部戲阿晉身為警察，誓要捉到樂仔（余文樂），而樂仔就搏晒命咁為咗啲黃金，就體現咗嗰兩種人性。」

阿晉嘅造型突出，又紋晒身仲染埋一頭金髮，為咗查案不擇手段，幾近瘋狂的刑警，喺終極預告中，佢仲暴打樂仔嚴刑逼供。佢話：「籌備嗰時，我睇到造型設計都無辦法即刻接受到，我就同編劇傾咗好耐，了解呢個角色因為平時面對太多魔鬼，於是佢就要先將自己變咗魔鬼，咁啲罪犯先會對佢產生恐懼。不過都有啲唔方便，我啲女喺我拍攝嘅時候話，唔鍾意我染金毛，o依家拍完，又話掛住我啲金色頭髮！哈哈！」

不過，阿晉就笑言，從此怕咗染金毛。「因為我漂咗很多次髮，先染到戲入面嗰隻金色，拍嗰陣又補染咗好幾次，我啲頭髮已經damage晒，連梳頭都梳唔到，次次開工都要搽好多護髮油，但每日拍打戲，又要由頭濕到落尾，真係令我好煩惱。」

我帶兩位嘉賓去到位於銅鑼灣嘅「心燒食堂」，喺暢談《狂獸》背後嘅故事同時，又品嘗到特色嘅日式料理，一舉兩得。

飾演警察嘅阿晉，喺戲中應付海量動作場面，有姿勢有實際。

雖然今次係子俊（右二）首次執導，但昔日佢同曾國祥（左一）、樂仔（左二）都合作過，所以溝通一定冇問題。

富山小白蝦（$88/份），每日空運到港，炸至金黃香脆，佐酒一流！

脆炸粟米金磚（$68/份），香甜粟米外層脆卜卜，屬另一佐酒良品。

燒白鱔（$88/串），厚切嘅白鱔加上獨特嘅燒汁，令人忍唔住要encore。

窩心囡囡

講到連場打鬥，阿晉話：「最難忘喺船上面打，一邊演戲仲要承受搖晃嘅感覺，個人完全冇晒方向感，打完都唔知自己喺邊，淨係知道揸實扶手。我記得有一幕，志叔（武術指導李忠志）要我乘住個浪嘅來勢，跳起然後打樂仔，整個動作好講timing，要食到個浪又要打，仲要記對白，所以都拍咗幾個take。」

雖然要由頭打到落尾，阿晉坦言，辛苦都係值得嘅。「好多場打戲都好難忘，好似喺魚市場追逐嗰場打戲，因為地面又濕又滑，我對腳難免會有瘀傷；另外我同吳樾喺漁船上面打，有成十幾個鐘都要濕身拍打戲，但係嗰時嘅氣溫只得十二度，其實好辛苦！

「我小腿嗰度損咗，但要濕身拍戲，所以拍嘅時候，我要食五種抗生素，防止傷口發炎，但係每晚收工返到屋企，我個女知道我痛，就幫我貼膠布，嗰一刻真係咩都抵番晒。」

雖然戲中嘅金毛造型唔得囡囡歡心，但阿晉喺飯敍當日嘅「鬢辮Look」（小圖），就出自太太蔡少芬手筆，髮型師只係幫佢維持靚look，咁一眾「女王」就最Like啦！

阿晉（右）同樂仔嘅精采對打，上船下海，令身為武術高手嘅前者都話，係從影以來一大挑戰。

拍攝動作場面，難免會受傷，但係阿晉經常喺戲中下海演出，令佢小腿嘅皮外傷，成日傷上加傷。

 

海膽意粉（$198/碟），原板上海膽配上溫泉蛋，加埋意粉入口，鮮甜又唔dry。

心燒龍串鳳（$48/串），為蝦乾釀雞翼，香脆雞翼帶淡淡鹹香。

水底真情

子俊就話，喺拍攝前已經想喺極端天氣下拍水底打鬥戰，「嗰時我覺得自己嘅想法太癲，但提出之後，Paco（監製）同啲演員都大力支持。阿晉同家棟完全唔識潛水，但係為咗部戲，佢哋都進行密集式潛水訓練，為角色做足準備。」

劇組成員間仲好和諧有愛，子俊不忘感激一眾演員。「為咗整部電影營造一種特殊氣氛，故事入面唔少場景，都喺大雨情況下發生，後段更加有暴風雨中潛水嘅場面。所以由喺香港開拍，到移師無錫拍攝，演員同工作人員，都要喺全身濕透嘅狀態下面工作，有一晚更加喺黃色暴雨警告下，捱更抵夜拍攝，真係好辛苦！我特別要多謝佢哋！尤其啲演員方面，喺拍攝潛水部分時候，由初初唔識潛水，到拍可以徒手潛水，佢哋嘅專業實在令我太感動！」

子俊坦言，今次滿足於挑戰拍「水戰」場面，

喺水深九米嘅巨型水池拍攝，導演盛讚孭重裝備嘅樂仔，專業到全情投入。

燒特級牛脷芯（$68/串），特別juicy。

汁籃蝦（$138/份），鮮蝦配上自家製醬汁，提升味覺層次。

燒松葉蟹蓋配多士（$88/份），鮮香又夠rich。

心燒食堂
地址：銅鑼灣駱克道487-489號駱克駅22-23樓
電話：23838686