為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2017 年 11 月 16 日

疑似新屆人大「鑽石名單」曝光 鄺美雲傳做「汪阿姐2.0」

港區全國人大代表選舉下月十九號舉行,提名期於本月廿四號展開,近日選情快速升溫。政界流傳一份四十人嘅「鑽石名單」,盛傳係獲「祝福」嘅熱門候選人。當中唔少係新面孔,以法律專業人士居多,包括前律師會會長林新強、反佔中旗幟鮮明嘅執業律師陳曼琪,以及香港與內地法律專業聯合會會長陳曉峰等統統榜上有名。

此外,已轉行從事珠寶業嘅前港姐鄺美雲亦上榜。有傳曾做港區人大,兼做咗四屆政協嘅汪阿姐(汪明荃)有意退下火線,有關方面一直喺藝能界物色「汪阿姐2.0」,而鄺美雲近年涉足內地政壇,擔任江西省政協超過十年,又積極玩社團活動,與建制派關係密切。有消息人士說:「鄺美雲呢幾年活躍於建制派,有關方面想搵佢接棒一啲都唔出奇。」
專業才俊盛傳紛紛獲「祝福」,反而早前多位一直有指會競逐嘅「人大二代」,包括人大常委范徐麗泰兒子范駿華、梁劉柔芬女兒梁穎宇,以及「富二代」港協暨奧委會會長霍震霆嘅兒子霍啟剛,有傳可能唔入榜。

細心拆解呢份「鑽石名單」,不難發現今屆人大選舉已換上新嘅「潛規則」,之前盛行「傳位」畀政商界富二代嘅傳統不再,據悉因為中央對「世襲」好有保留。有消息人士透露:「阿爺(中央)唔想人大只係掛個名,入得去嘅都要有政績、有建樹、做到嘢畀人睇先得。」

除「富二代」光環失分外,具有立法會議員身份嘅候選人亦唔再獲得加分。影響所及,一直傳有意選人大嘅經民聯立法會議員梁美芬,不在今次「祝福名單」之上,消息人士續稱:「中央睇見o依家立法會拉布咁嚴重,唔太想立法會議員同時兼任人大,到頭來兩頭唔到岸。」不過已兼任兩職的馬逢國及田北辰則不受影響,有望再坐一會。

「富二代」今屆可能無望晉身國家最高權力機關,但唔代表人大之路會從此閂門,有消息人士透露,政官商富二代下屆再問鼎人大嘅成數較大,「佢哋五年之後再選有助減去世襲色彩,亦可趁呢五年建立政績畀中央睇,下屆參選更加有說服力。」今屆人大選戰係用實力比拼,相信鬥得更加激烈。

港區人大即將換屆,盛傳約十人有意退下火線。政界更流傳一份四十人嘅「鑽石名單」,盛傳係獲「祝福」嘅熱門候選人。

 

鄺美雲盛傳係接替汪阿姐嘅熱門人選,鄺美雲接受本刊查詢時表示,「會繼續備戰拉票。」

 

早年大力反佔中嘅執業律師陳曼琪,今次喺新屆港區人大「鑽石名單」內。