為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2017 年 11 月 12 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

極Hot師兄弟

男人就似醇酒,要經過歲月洗禮先更見醇厚。就如今次「Paco巨星飯堂」嘅嘉賓許志安同沈震軒(Sammy)咁,後者近日正式加盟「太陽娛樂」,而安仔則喺歌、影界大展拳腳,師兄弟喺歷練過後,更加Hot!

我帶兩位嘉賓去到位於Hotel Icon嘅「天外天」,以精緻嘅高級中菜,同呢對同門師兄弟,暢談大計!

成為同門師兄弟,安仔同Sammy惺惺相惜,師弟仲話以同師兄合作為其中一個目標添。

 

操Fit迎挑戰

今次飯敍嘅特別之處,係安仔興起擔任客席主持,要了解一下Sammy呢位師弟。「o依家加盟咗『太陽娛樂』,你有咩計劃呀?」

對於師兄嘅提問,Sammy恭敬回答:「主要都係睇公司嘅安排,而我就好希望喺樂壇同影壇都有代表作,所以我會令自己隨時ready。(安仔:「睇你呢身肌肉都ready晒啦!」)嘩!你開concert嗰陣咪仲犀利!呢啲係要付出努力嘅成果,之前我每日起碼做兩個鐘gym,而嗰時仲要兼顧一套內地電影的拍攝。其實都幾慘,因為劇組每次放飯,啲嘢食都勁油勁好味,我就自己喺側邊食藜麥,所以每次放飯,對我嚟講都係地獄。」

o依家Sammy操得一副靚肌,要keep住都要下一番苦功。「主要係食嘢要食得乾淨啲,例如炸豬扒、可樂嗰啲,基本上就唔食得。操肌嗰一排,我淨係食西蘭花、雞胸肉同埋雞蛋,全部都係要用水烚,仲要係無糖無鹽同埋冇油,所以嗰排心情都會比較差。o依家雖然唔使食到咁清,但係都唔可以太放縱,唔係就前功盡廢。」

機會只係留俾有準備嘅人,Sammy將自己準備得咁好,只要一有機會,佢要喺影壇大放異彩,絕非偶然。

我帶兩位嘉賓去到位於Hotel Icon嘅「天外天」,品嘗時令嘅中式佳餚。

 

為隆重其事,Sammy喺加盟「太陽娛樂」嘅記招上,即席展身手。

 

加入新公司,Sammy仲俾多一個新挑戰自己,操fit body迎接新工作,唔會錯失任何機會。

 

脆皮炸子雞($278半隻/$518全隻),選用油脂均勻嘅三黃雞,不斷澆油至雞身,令炸子雞皮脆肉嫰,香味撲鼻。

 

XO醬百合蘆筍炒鮑角($498),要求純熟刀工,先將南非鮑魚切成角粒,再加入百合、蘆荀及自家製XO醬快炒,令鮑魚肉質處於最嫩滑狀態。

 

桂花梨伴黑醋豬柳($258),師傅選用黑毛豬豬柳,切成小粒炸香,再拌以意大利黑醋,與紅糖水漬過嘅清甜梨肉一同入口,層次豐富。

 

唱作要夠Deep

我欣賞Sammy嘅地方,仲有佢嘅靚聲同音樂造詣,所以繼〈打不死〉後,佢再有新歌面世,同樣係由佢親自作曲嘅〈我很好〉,以初戀為題材。Sammy話靈感係半夜來襲:「有一晚我瞓到半夜,一扎醒就有晒melody同歌詞『我真的很好⋯⋯』,我就喺呢五個字嘅基礎上,寫咗呢首歌嘅國語版本〈我真的很好〉出嚟。(安仔:「點解湧出嚟嘅歌詞係國語呢?」)因為我嘅初戀情人係台灣人,我夢到自己同佢講我真係好好,叫佢唔使擔心我。

「而首歌嘅廣東歌詞,內容比較貼近現今男女感情觀,大家都為生活寄情工作,忽略咗感情;又或者係借工作忘記傷痛。國語版就會比較浪漫啲,講一對初戀情人,喺偶然嘅機會下再次相遇,好多當年拍拖嘅回憶湧出嚟,而呢啲都係我求學時期嘅回憶。」

除了嘗試作曲作詞,今次〈我很好〉MV,Sammy亦有份參與意見。「MV用咗兩日拍攝,我請咗Nikki(周麗淇)做女主角,仲幫手同我合唱國語版,佢咁忙都為我兩脇插刀,真係唔話得!」

機會只係留俾有準備嘅人,所以Sammy話要保持至fit狀態,創事業高峰。

 

Sammy同周麗淇私交甚篤,喺友情急call下,後者除咗擔任前者嘅MV女主角,仲獻聲合唱〈我很好〉嘅國語版〈我真的很好〉。

 

 

 

陳皮豆豉蝦球($278),陳皮味濃,與豆豉鹹香,加入爽滑蝦球同炒,口感一流。

 

沙參玉竹圓肉燉鷓鴣($238),落足料燉四小時,為初秋保健湯水,健脾養肺,補而不燥。

 

MV變狂獸

師弟仲話:「o依家我最希望係為師兄寫歌,最好可以同佢合唱!」哈哈哈!一定有機會!

而安仔都係滿腦子大計,喺逐步實行之際,早前佢為電影《狂獸》嘅同名主題曲拍MV,為貫徹電影嘅主題,成個MV由構思到拍攝,都係由電影嘅導演李子俊操刀。「我同導演識咗好耐,所以有佢策劃,我就一定放心,我喺MV入面有兩個造型,一個係平常look,另一個就係狂獸look,要靠特技化妝幫手。」

喺拍攝前一個禮拜,安仔就要去為面部輪廓做倒模,「拍嗰陣仲要用四個鐘去化特技妝,成塊面俾人搽晒有化學成份嘅膠水,搞到又乸又痛!嗰陣熱辣辣,但化妝車個冷氣又突然間壞咗,我同特技化妝師都大汗疊細汗。今次係我入行以嚟,第一次接觸特技化妝,喺搞完一大輪之後,我見到自己變成『狂獸』個樣,就覺得辛苦係值得嘅。」

正籌備新專輯嘅安仔,仲會為迪士尼新片配音,年尾忙到不可開交。

 

擔任今集專欄嘅客席主持,令安仔憶起昔日主持《K100通訊站》嘅日子,佢仲表示,當時喺麥劍秋同鄺佐輝兩位前輩嘅提點下,獲益良多。

 

為咗突出MV造型,安仔既借助特技化妝,又大晒肌肉,雙管齊下營造最佳效果。

 

 

 

茗茶布甸($98/位),包括茉莉茶朱古力布甸、鐵觀音茶布甸、綠茶布甸(前至後),以茶為主題,分別用淡鐵觀音茶製成大菜糕、日本綠茶製成香滑布甸及香濃朱古力加茉莉花茶製作慕絲。

 

欖角陳皮生焗龍躉球煲($438),先爆香蒜肉粒、薑粒及乾蔥,再放入已調味嘅龍躉球、欖角陳皮到瓦煲中,開大火焗五分鐘,香氣十足。

 

黑松露蛋白龍蝦球($318/位),選用本地珍珠龍蝦,去殼拆肉後加入清湯炒香,然後配上鮮奶蛋白及黑松露,矜貴滋味。

 

天外天
地址:尖沙咀科學館道17號維港薈28樓
電話:34001318