為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2017 年 11 月 09 日

泛民怪招阻撓「一地兩檢」 得罪新聞界

極具爭議性嘅「一地兩檢」無約束力議案上周四喺立法會辯論,期間火花四濺。議案將近進入「直路」讓官員總結發言時,自決派朱凱廸為拖延時間,突然出招引用《議事規則》第八十八(一)條,動議要求在場嘅新聞界及公眾人士離開會議廳,讓該個影響深遠嘅議案閉門進行。

朱凱廸係開埠以來,首位根據有關條文企圖逐記者離場嘅議員,此招一出隨即引起嘩聲四起。平日口口聲聲話維護公眾知情權,要求政府增加透明度嘅泛民,去到「一地兩檢」關鍵時刻,竟罔顧新聞採訪自由,豈不是打倒昨日的我?最諷刺嘅係,朱凱廸其實都係記者出身,早年做過《明報》國際版記者,「佢理應明白新聞自由嘅可貴,o依家為達政治目的,調轉槍口踐踏新聞自由。」有資深傳媒人批評說。

有消息話,泛民之所以諗到呢招,其實係建制派點醒。據透露,建制派一早已見到該條文有機會畀泛民鑽空子進行「拉布」,早前已向議事規則委員會提出修改該條文,點知反而令泛民茅塞頓開,靈機一觸用呢招玩嘢。

呢招的而且確令建制派措手不及,加上當時議會亂過亂世佳人,民主黨許智峯大鬧議事廳,一班泛民議員護航唔畀保安逐佢離場,會議根本無法進行,最後立法會主席梁君彥宣布提早休會。

泛民癱瘓議會、阻止「一地兩檢」進行表決嘅目的雖然已達成,但代價好大。朱凱廸該動議引來多個新聞組織群起而攻之,其中記協即日已發聲明譴責,「本會了解朱凱廸議員表明不支持議案,提出動議只為爭取談判機會的手段,然而本會強調新聞自由及公眾知情權,不應成為政治角力籌碼。」新聞行政人員協會亦對朱凱廸做法深表遺憾,譴責佢嘅動議「嚴重損害新聞言論及採訪自由」,破壞本港核心價值,協會更指「難以想像有關動議是由一位民選議員提出」。

火頭處處,民主派會議召集人莫乃光出面「撲火」,聲稱呢招只係戰略性部署,仲寫包單話該動議唔可能獲通過,所以對新聞自由無實際影響。

有泛民中人也認同呢招得不償失,搞到泛民與新聞界關係緊張,亦與香港社會核心價值相違背,最大鑊係公眾未必認同泛民阻「一地兩檢」嘅立場正確。

泛民人士指出,今次唔同政改、國教等風波,「一地兩檢」唔係好貼身,「好多市民覺得一地兩檢方便出入境,無乜唔好,唔明我哋為乜要阻撓。」事實上,不論建制還是泛民做嘅民調都發現,約一半受訪市民支持「一地兩檢」,只有三、四成人反對,「只有當問題出現咗,例如日後有公安喺香港境內執法,市民先會認同我哋今日做嘅嘢。」不過,未等到呢日出現,泛民已要為創先例阻記者採訪議會新聞,蒙上污名。

立法會主席梁君彥宣布休會,泛民癱瘓議會嘅目的雖然已達成,但代價好大。

 

「一地兩檢」議案上周四喺立法會辯論,自決派朱凱廸為拖延時間,出「怪招」動議要求在場記者及公眾人士離場,引起嘩然。

 

許智峯(前中)被主席趕離場,泛民群起護航阻止保安帶走許智峯,現場一片混亂。

 

建制及泛民做嘅民調都發現,約一半受訪市民支持高鐵「一地兩檢」,泛民中人承認

 

建制派就許智峯擾亂議會運作一事,報警求助。