為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2017 年 11 月 02 日

瑪麗換肝風波 「白色巨塔」再掀人事角力

港大肝膽胰外科臨牀副教授、瑪麗醫院兼職醫生吳國際被指為一宗換肝手術「監場」期間中途離場,到一間私家醫院進行另一宗已預約嘅手術。當時瑪麗嘅病人已經開肚,無耐屍肝亦到埗,但主刀醫生仍決定暫停手術,等咗三小時吳國際折返先繼續手術。

連日嚟有人爆料指,涉事病人手術後已清醒,但一度發燒,手指發黑。有人透露,換肝病人通常兩星期就可以康復出院,而今次嘅屍肝來自三十幾歲嘅死者,肝功能良好,但病人換咗肝大半個月,仍未完全康復,進度較「不理想」,懷疑與手術被延誤有關。

吳國際離開醫院前,有無向手術團隊交代原因至今仍眾說紛紜,呢個亦係院方調查小組調查重點。吳雖然唔係全職員工,小組未必有權作出處分,但有權要佢交代事件經過,以判斷係咪有人擅離職守。據了解,吳國際嘅兼職合約無訂明工時,原因係換肝手術通常係突如其來,好難定明。合約都無規定,佢一定要全程當值。

今次「白色巨塔」嘅風波,除咗反映公院兼職醫生嘅制度問題,也可能曝露咗呢個全港唯一換肝小組嘅人事角力。據悉,有醫護喺手術後五日,向瑪麗醫院通報先揭發事件,加上最近接連有人向傳媒爆料指病人康復進度差,「篤背脊」味濃。

吳國際斷斷續續喺瑪麗服務十五年,一○年曾離巢私人執業,舊年該院外科第二把交椅、瑪麗肝臟移植小組前主任陳詩正辭職,換肝小組嘅十一名醫生逾半不足十年年資,蜀中乏大將下,吳國際以「外援」身份「回巢」做兼職醫生,吳坦言私人執業嘅收入高過公院不止四倍,回流難免影響總收入。

據悉,吳國際為人低調直率,與換肝小組成員關係一般。有醫生透露,佢喺鄧桂思事件上曾得罪同行,當年鄧桂思疑因為聯合醫院漏開抗乙肝藥,之後送去瑪麗醫治,吳國際曾喺電台節目中解釋,揭發聯合「漏開藥」卻無通報醫管局,係因為覺得責任上應該由聯合醫院自行通報,有醫生指出:「佢都有責任第一時間通知醫管局,但呢番言論就將所有責任推卸畀聯合醫院,連部分瑪麗醫護都覺得佢失言。」

消息人士唔排除吳國際係被同僚「篤背脊」,「佢唔係主刀,其實主刀嘅判斷都有問題,點解少人講?」今次主刀係港大外科學系助理教授黃楚琳,有五年換肝手術經驗,基本上有能力獨立做手術。「如果佢無信心,其實可以叫上頭派人協助。」消息人士說。

該院肝臟移植中心總監盧寵茂亦認為,黃楚琳嘅處理方法也有斟酌之處,「佢點解唔同手術室內其他護士、麻醉科醫生溝通好,推遲為病人開肚?」

盧寵茂(左)及吳國際(右)係換肝小組嘅主將,但前者要兼顧深圳醫院,後者就只係兼職醫生。

 

瑪麗醫院肝臟移植中心係本港唯一嘅換肝醫療團隊,但近年資深醫生逐一離巢,令人關注小組係咪青黃不接。

 

換肝係分秒必爭嘅手術,屍肝離開人體愈耐愈容易受感染,以及積聚毒素,今次換肝團隊延誤三個鐘先進行移植,肝質素成疑。

 

鄧桂思疑因聯合醫院開漏抗乙肝藥,送到瑪麗醫院後,由盧寵茂(中)及吳國際(左)進行換肝手術。