為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2017 年 11 月 05 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

我的第一團

識我嘅人都知道我好少放假,以前比較長嘅旅行一係就出席仔女畢業或結婚等人生大事,近年就去探孫。不過,我近年都開始放慢一啲腳步,雖然未必放到長假,但係有時間都會度個長周末。講到外遊,我本身傾向短多過長,因為短途唔使多準備,又唔使錄定電台電視台節目,輕輕鬆鬆可以走一轉。

至於點解會隨團出發去台中尋味,其實最初係一班朋友想一齊去旅行,要住得好食得別緻,加上有啲多年擁躉收到風又話加入,於是我諗起之前訪問過專業旅運,就問吓佢哋可否幫我設計一個特色團。設計好行程之後,旅行社建議不如開放畀公眾參加,成為主題旅遊美食團,咁就促成咗我第一個團。

雖然我唔係帶團,而係隨團旅遊,但畢竟係第一次,所以都做足準備功夫,上月先去行一轉。台北去得多,畀我嘅印象係高樓大廈,但台中完全唔同,風景優美、空氣清新,土壤好可以種出鮮美的蔬果,而且人情味濃,係一個可以完全放鬆慢活嘅地方。

除咗欣賞青蔥美景,我都有考察吓台中嘅經濟發展。台中地處台灣南北交通中心,海路有台中港,航空有清泉崗國際機場,加上高鐵開通,佔有地利優勢,經濟發展理應可以更上一層樓。但由於過去國民黨偏重台北,民進黨又傾向發展高雄,所以台中似乎被冷落咗。不過,由於台北過於擠迫,政府近年積極扶持台中,除咗工業發展,亦大力打造為智慧之都同發展智能製造。經過多年發展,台中市人口已經超過277萬,八月時宣布升格為全台第二大城。

地產理應伴隨經濟發展,但由於2013-15年間台灣建房達到高峰,到2017-18年就出現大型「交屋潮」,估計呢兩年全台每年會有10萬至12萬戶的新屋完工。至於台中市,兩年累計預測有3.6萬多戶。供應增加遇上陸客減少,當地出現一些「讓利」(降低利潤)盤,估計房價要到這些房屋消化完至會有較強支持。不過當地置業人士亦有把握時機入市,「買房意願指數」回升,只要賣方願意「讓利」,需求正逐漸回溫。

台灣進入高鐵時代之後,台北到台中嘅車程縮短至一小時以內,變成一小時生活圈,潛力優厚,近年好多大型投資都首選落戶台中,我睇好佢嘅長線發展。如果你有興趣跟我一齊尋味台中,品嚐私房菜、懷石料理、古早味台菜,仲有少量位,只此一團,可以打去21159828查詢。

台灣進入高鐵時代後,台北到台中的車程縮短至一小時以內,變成一小時生活圈。