為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2017 年 11 月 05 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

名牌劇力

實力同名氣,好多時都係相輔相成。能夠集李司棋、蘇玉華同謝君豪三大享負盛名嘅演技派,即將公演嘅舞台劇《小城風光》,背後梗係有更深層嘅意思。舞台劇係三位加上一眾舞台表演藝術家,對香港戲劇大師King Sir鍾景輝嘅致敬作,匯集咁多高手,必然劇力萬鈞!

今次「Paco巨星飯堂」,我就邀請司棋姐、阿蘇同君豪,去到位於觀塘嘅「La. Tomokuo Japanese & Western Cuisine」,品嘗特色西日fusion菜式,細說致敬作背後嘅故事。

集阿蘇、司棋姐同君豪嘅舞台劇《小城風光》,係一眾舞台表演藝術家,對King Sir鍾景輝致敬嘅禮物,而且亦極具叫座力,即使加場後共公演十三場,仍然係一票難求。

 

集體致敬

今次舞台劇喺新光戲院公演,外界反應熱烈,仲破演出場地嘅舞台劇售票速度,o依家加開到十三場。君豪表示:「今年係King Sir嘅八十大壽,所以我哋呢班徒子徒孫就決定演呢個劇,向佢致敬。而揀呢個劇嘅原因,除咗因為劇本同King Sir一樣『八十大壽』,仲因為呢個劇係佢喺美國讀完書,第一個引入香港嘅劇本,有雙重意義。

「今次嘅導演張之珏同傅月美,都係King Sir嘅學生,張之珏仲特別喺新西蘭返嚟導呢個劇。o依家King Sir間唔中都會突擊檢查,因為呢個劇佢做過、導過、睇過好多次,仲用嚟做過教材添,所以我一定要將劇本背到滾瓜爛熟。」

阿蘇話:「劇本表面上講嘅係小城嘅故事,關於我同司棋姐兩個家庭嘅平凡生活,但實際上涉獵好廣,喺美國贏過普立兹文學獎,好有文學價值。我覺得觀眾睇咗會啟發到思考,入面有好多人生哲理。」

司棋姐曾經同King Sir喺舞台劇《金池塘》中合作,同導演張之珏又係中學同學,感情深厚。「我好感激King Sir引領我去戲劇之路,咁又點可以唔參演呢個劇呢?而且角色好有趣,唔係一板一眼嘅,而且仲有細路女嘅幻想添!(謝:「司棋姐演得好嬌俏o架!」)」

我帶三位嘉賓去到位於觀塘嘅「La. Tomokuo Japanese & Western Cuisine」,品嘗西日特色料理,再暢談演戲經。

 

舞台劇除咗同King Sir一樣「八十大壽」,劇本仲係由King Sir引入香港,別具意義。

 

 

 

吞拿魚他他($128),他他醬令吞拿魚更見鮮味,入口即溶。

 

蟹肉牛油果沙律($118),鮮甜嘅蟹肉配合rich嘅牛油果,十分清新。

 

凱撒沙律配温泉蛋($82),糅合西餐與日本料理於一身。

 

演技挑戰

三位係被公認嘅好戲之人,但佢哋都話,今次嘅演出係對佢哋嘅演技大挑戰,阿蘇話:「因為『劇場主義』,有場戲我同司棋姐喺冇布景、冇道具嘅情況下,演繹兩個屋企嘅日常生活,由朝早六點鐘起身開始,又要煮早餐、烘多士、沖咖啡⋯⋯喺演出嘅同時又要兼顧對白,所以好有難度。」

司棋姐補充:「講對白之餘,我哋要留意對方『煮』到咩情況,掌握番節奏,挑戰性好大,所以要練好耐。不過當我見君豪啲超長對白,就覺得我都OK,(轉向君豪)你應該收幾部戲嘅人工啦!」

君豪話:「今次我嘅角色叫『舞台監督』,即係說書人,描述成個故事,之前我話要背劇本背到滾瓜爛熟,因為我好多對白都有成四五版紙,唔可以唔付出200%努力。」

雖然司棋姐謙稱自己演舞台劇只係BB班,但佢同阿蘇都係出色演技派,今次佢哋異口同聲表示,劇中嘅默劇演出,對佢哋嘅演技實屬一大挑戰。

 

今周五(3日)正式公演,所以君豪、司棋姐同阿蘇,加上一班好戲之人如黃文慧(下圖中),正如火如荼排練中。

 

 

 

黑松露長通粉($228),香氣四溢。

 

水牛城雞翼($92),外脆內軟,肉汁豐富。

 

清淡養生

演技精湛以外,阿蘇係圈中著名嘅「美女廚神」,但佢o依家暫時歸於清淡。「我好鍾意食生嘢,夠新鮮就唔使煮得太熟。平時喺屋企得兩個人,我會食得好清淡,整家常小菜,要到宴客先會花多啲心思。」

講到清淡,Fit咗嘅司棋姐都有一番見解。「o依家我晚飯通常都唔食飯,澱粉質都唔食,清淡啲只係食沙律,年紀大就唔需要咁多澱粉。夜晚嗰餐唔食飯之後,我就瘦咗好多,但我日頭照keep住食嘅,但飯嘅話我就食糙米。」

君豪對兩位女士嘅清淡飲食論,大表贊同。「我都唔會食得太濃味,魚、海鮮就最好,配合埋做運動,就成個人都健康晒。不過近排要排戲,楊英偉成日整好嘢食,又叫好多外賣,實在太大引誘!」

君豪話King Sir係自己嘅恩師,今次佢首次演出呢個劇目,係佢在學時期King Sir引用過嘅教材。

 

今年大獲好評嘅舞台劇《謊言》,喺阿蘇稍作休息後,會喺明年載譽回歸。

 

舞台劇之後,司棋姐除咗去馬來西亞登台兼旅遊,佢再次同夏雨哥合作嘅TVB重頭劇《溏心風暴3》,亦即將喺下月首播。

 

加拿大豬鞍($268),夠晒juicy,配上芥末醬更能加添味道層次。

 

蒜片鮮蜆意粉($158),鮮香美味。

 

烤楓糖羊架($218),帶少少楓糖甜味,令羊肉更有特色。

 

La. Tomokuo Japanese & Western Cuisine
地址:觀塘駿業街56號中海日升中心1樓G舖
電話:28062252