女主播大解放 嘉倩BB吊帶背心受訪搶鏡

近期唔少主播離巢搵真銀，超多粉絲嘅無綫靚女前主播陳嘉倩早前離開大台，關於佢嘅去向眾說紛紜，一時傳會重返校園，一時傳會投身銀行界，最近傳聞開始明朗化，有指佢即將去港台開咪做主持。嘉倩BB安頓落嚟前，先要曝光保持人氣，最近就接受一個網媒專訪，引起極大迴響，事關喺大台密密實實嘅佢，今次大解放，着咗吊帶背心配外套受訪，實行健康地性感，睇到網民嘩嘩聲。

嘉倩BB喺訪問中話，鏡頭後嘅自己其實可以玩得「癲癲地」，只係因為要做主播先扮到一本正經。佢又話，喺大台幾年得到唔少觀眾支持，經常收到小禮物，包括花、信、蛋糕等等，令佢好開心。

有消息指，嘉倩BB下月會去港台，主持一個講述潮流與環保關係嘅節目《大氣候》，聽講佢拍攝咗宣傳片，會做番電視台天氣女郎，預告《大氣候》會造成一股熱氣旋，搞到一眾粉絲都好心急等睇佢嘅風采。

無綫靚女前主播陳嘉倩着咗吊帶背心配外套受訪，實行健康地性感，睇到網民嘩嘩聲。