徐濠縈（阿徐）除了出名熱愛跑步，更出名鍾情着衫扮靚，自〇九開設了自家時裝店Liger後，她很快便成為了時尚界的活躍份子，更被封為「潮流教母」，經常獲邀出席或參與跟時裝潮流有關的活動。

曾表示不太愛說話的阿徐，日前鮮有地接受香港知專設計學院的邀請，為學院一個時裝展覽開幕禮論壇擔任嘉賓。期間，她除坦言時裝是其必需品外；身家豐厚的她，還透露買衫要計過度過；更自爆因個人太注重衣着，令朋友甚至愛女康堤皆感到壓力。

大概出席論壇的學生們，亦甚少看到如此言談甚歡的阿徐，尾聲時，觀眾席上竟有人向着講台，情不自禁地高舉中指贈興，心情相當hyper！

日前，徐濠縈（右二）與i.t創意總監Wallace Kwan（左二）及時裝設計師Harrison Wong（左一），為知專設計學院舉行的時裝資料館開幕禮論壇「玩味•時裝」擔任嘉賓，吸引了七百名學生捧場。

言談甚歡

身為「潮流教母」的徐濠縈（阿徐），雖然經常獲邀出席時尚活動，但曾聲言不愛說話，也不懂說話的她，卻是相關講座或論壇的稀客，故日前，她罕有地為知專設計學院舉行的時裝資料館開幕禮論壇「玩味•時裝」擔任嘉賓，大談時裝經，即吸引了七百名學生撐場，逼爆該校的綜藝館。近一小時的論壇，學生對阿徐在台上的言談，似乎聽得十分興奮，有人更在眾嘉賓謝幕時，於觀眾席上突然向着講台，舉起兩隻中指贈興！

論壇期間，阿徐表示，自小已喜歡時裝。「我細個好鍾意跟媽咪行街，行街真係好開心！同埋音樂對我影響幾大，會睇啲外國歌星點着衫、着乜嘢牌子，然後模仿佢哋。對我嚟講，時裝係必需品，每日我都會以好開心、好興奮嘅心情去裝扮自己，甚至用時裝去影響人哋、分享畀人。」

接着，她又稱現時的時尚資訊，主要來自社交網。「我少睇咗好多雜誌，主要都係睇電話，睇人哋（潮流達人或時尚名人）嘅社交網頁即時動向，廿四小時喺度追，資訊係好快嘅，但好快又唔記得咗。」

縱使，她有一個「樂壇吸金王」老公陳奕迅，又沉醉於着衫扮靚，但卻並非外界所指的「購物狂」。「我買衫唔會即刻買，尤其是去旅行，咁多靚嘢、正嘢賣，好容易衝動o架嘛，啲朋友都話：『你都要諗？諗乜嘢呀？』但我就會返屋企或者返酒店冷靜吓，諗清楚先，真係掛住先會買。我有時係寧願買啲比較貴嘅衫，即係就算件衫六萬蚊，如果真係掛住，就會欣賞同珍惜佢嘅價值，買咗之後唔會隨意『pad』埋一邊。」

談到外地的時尚和潮人打扮，阿徐表示最欣賞日本人和英國人。「我喺英國，對眼好忙；日本人呢，連頭髮到妝容都可以去到好犀利——我已經着得好誇，都唔夠佢哋嚟！」

阿徐坦言，個人打扮有時會令女兒康堤有壓力，「佢會問：『你個嘴做乜咁紅嚟接我放學呀？』」司儀森美亦忍不住笑起來。

各嘉賓謝幕時，台下學生即報以熱烈掌聲，有人更在此時突然高舉中指，表現相當hyper。