張衛健《大帥哥》煞科high爆

創造過唔少收視神話嘅張衛健，好似《西遊記》嘅孫悟空咁，佢就演到成為標記，真係得佢先做到。離巢無綫超過廿年，年頭返嚟「母校」拍攝台慶劇《大帥哥》，真係令人引頸期盼。

喺內地拍劇，係人都知收入高到難以想像，所以重投無綫拍劇，對張衛健嚟講一定有片酬問題；之不過，搵佢回巢嘅戲劇組高層曾勵珍就笑住講：「使乜傾，信我咪得！」東姑相信個價一定同佢喺內地拍劇差好遠啦！不過，飲水思源嘅張衛健，又點會計較酬勞呀？佢只係一心希望再有一套代表作，留喺香港觀眾嘅腦海中啫。

最近《大》劇終於煞科，相對咗幾個月，大家都好唔捨得，特別係男主角張衛健。東姑發現喺煞科宴嗰晚，佢玩得非常之盡興，不停叫囂，當正自己生日會咁款。其實，如果張衛健真係咁唔捨得，東姑建議佢留港拍多啲好劇，因為香港嘅觀眾都好唔捨得佢o架！

《大帥哥》舉行煞科宴，張衛健滿場飛，非常亢奮，見到有人揸機影相，佢仲立即擺出V字手勢。

當晚，幾乎全部工作人員都一齊出席，場面非常墟冚。

趙永洪話同張衛健合作拍劇非常舒服，同埋呢幾個月，喺佢身上學識咗好多嘢。

日對夜對拍劇咁多個月，大家都好唔捨得，趙永洪就趁呢一晚，係咁捉住張衛健影合照，留低回憶。