為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2017 年 10 月 21 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

三十二蜢Live

三十二年嘅變化,肯定比十年廿年為甚,但係一見到草蜢三子,三十二年情依舊,嚟緊十一月又喺紅館舉行演唱會,真係人生幾何!

今次「Paco巨星飯堂」,我就誠邀蔡一智、蔡一傑同蘇志威,去到位於灣仔嘅「車氏粵菜軒」,品嘗餐廳最新嘅「車氏川粵料理」菜式,細說三十二年情,再公開演唱會驚喜。

藉着入行三十二年,草蜢舉行《LIVE GOES ON演唱會》,三子更視之為畢業典禮,決定施展渾身解數。

 

「新人」出爐

演唱會以《LIVE GOES ON》為主題,阿智話有雙重意義。「第一係生活無論遇到好事定壞事,都要繼續迎難而上;第二係草蜢堅持咗一段長時間,但往後仍然會做live performance俾大家睇。我哋一九八五年出道,啱啱有記者講,喺剛過去嘅十二年,我哋開咗十個完全唔同嘅演唱會,咁喺一七年嘅十一月,作一個總結就最好啦!

「LIVE GOES ON寓意過往咁長嘅時間,我哋用嚟鍛煉同訓練自己,呢個演唱會係我哋嘅畢業典禮,好似party咁。我哋會廣邀好友同fans,見證我哋畢業,大家睇住我哋成長,喺舞台上我哋學咗好多,所以要正式宣布,二〇一八年我哋會正式加入樂壇!希望出年年尾可以攞到新人獎、組合金獎。」

講到並肩三十二年,蘇老闆話最緊要係:「一份堅持!由出道到o依家,我哋堅持以組合形式表演。其實當年我哋見到樂壇只有男、女歌手同樂隊,但係就冇歌唱組合,於是我哋組成草蜢去參加『新秀』,目的唔係為咗入娛樂圈,而係俾香港人知道,有歌唱組合呢個choice。從嗰時開始,我哋就堅持到o依家,咁就三十二年嘞!」

三十二年來,草蜢嘅金曲數之不盡,所以連開show嘅rundown、細節,都十分嚴謹。傑仔話:「譬如有啲歌我好想唱,係要八讀通過,包括音樂總監、演唱會總監、概念同服裝總監,加埋林珊珊同佢哋兩個,最後先到我,因為我哋係團體,一齊做、一齊創作,大家一齊傾先可以inspire到對方,自己個人嘅諗法,唔係好想做就做到。」

我帶草蜢去到位於灣仔嘅「車氏粵菜軒」,品嘗餐廳最新嘅「車氏川粵料理」菜式,大談音樂、Keep fit經。

 

草蜢話今次嘅美術總監朱祖兒,為佢哋喺歐洲搜羅特色布料,設計獨特舞台look,令人耳目一新。

 

黃金粟米($88/例),皮脆內甜,最啱佐酒。

 

蒜泥白肉($88/例),香辣惹味。

 

皮蛋伴青椒($88/例),清新涼菜,夠晒開胃。

 

Keep fit秘法

o依家三子狀態大勇,原來係因為各有獨門秘方操肌減磅,蘇老闆話:「係勤力、勤力再勤力!仲要戒口,我唔食肥膩嘢,又已經開始戒鹽戒糖,連澱粉質都少食咗。運動就梗係日日有做,最長會做個幾鐘gym,然後跑步同游水,總共三個幾鐘。最緊要係口戒得要清,唔係好難搞。」

阿智就瘦咗足足十八磅,「我一直keep住演唱會嘅狀態,慣性運動有瑜伽、跑步、做gym同游水,獨門秘方係一邊行山一邊唱歌,所以同我一齊行山啲人好有耳福,可以聽住我唱歌;行樓梯唱歌就可以練氣,幫到演唱會唱live嗰陣,無論跳得幾震盪都冇問題。飲食方面我一直都唔食紅肉,食嘅都係quality food,所以唔使戒口。」

傑仔就表示:「我鍾意游水,可以練氣;跳繩就可以幫到身體,仲玩埋器械,每日不停練三個半鐘,由頭到腳逐part練。雖然我本身唔鍾意跑步,但o依家夜晚都會去跑,因為練到腿部肌肉,對跳舞有幫助。我唔食油膩嘢,又唔食零食,平時食多啲蔬菜,食好少好少澱粉質,都OK嘅。」

要保持fit爆身形,三子各有獨門秘訣,但都離唔開勤力運動,有付出先有收穫。

 

操肌以外,傑仔仲食得相當清淡。

 

 

 

蟹肉瑤柱涼瓜羹($68/位),以沖繩涼瓜製作,為川菜之間嘅清淡湯羹。

 

鹽燒芝士鮑魚($180/隻),選用南非新鮮鮑魚,配上淡芝士炙燒,既鮮且原汁原味。

 

辣子雞($258/半隻),以四川傳統手法炮製,雞肉保持juicy。

 

碌友情卡

今次開show,除咗預計以內嘅精采,傑仔預告:「我哋三個都會有solo部分,嘉賓就睇吓到時邊啲friend有mood上嚟一齊玩啦!」

雖然傑仔大賣關子,但其實草蜢嘅新歌都邀請咗一班好友crossover,阿智話:「古天樂平時少唱歌,今次佢唱之餘,仲幫我哋結他伴奏;Chilam都有唱,靚靚做監製,仲有周汶錡,仲話要返去教囝囝唱;伍詠薇話隻歌好好un好好跳,又問邊個作曲,佢竟然唔知我識作曲囉!我個仔聽一次就識唱,但我唔會錄佢,費事佢突然話要做歌星,同我爭飯食。」

新歌感染力強,蘇老闆就話:「我相信有啲人聽草蜢嘅歌,都會勾起一啲回憶,咁今次大家可以喺呢個演唱會,搵到往日嘅美好回憶。就好似我每次聽到許冠傑嘅歌,都會諗起自己幾歲嗰陣,喺屋企同朋友玩嘅點滴,我未必好清楚記得嗰時玩乜嘢,但係就好記得嗰種開心嘅感覺。」

出晒名人緣好嘅草蜢,喺錄新歌〈Live Goes On〉時,請嚟唔少好友友情發聲,包括古天樂、蘇永康、葛民輝同鄭伊健等。

 

 

 

 

 

蝦子生根柚皮($128/例),極考功力嘅工夫菜,相當鮮甜。

 

水煮西班牙黑豚肉($218/例),爽口嘅黑豚肉煮得入味,啖啖都係香辣嘅味道。

 

車氏招牌酸菜魚($268/半份),酸辣度啱啱好,桂花魚非常嫩滑。

 

車氏粵菜軒
地址:灣仔駱克道54-62號博匯大廈4樓
電話:25281123