為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2017 年 10 月 12 日

林鄭首份施政報告 出爐政策大盤點

特首林鄭月娥領導嘅新政府本周三發表首份《施政報告》,據悉全份報告都由佢於九月底起親自撰寫,雖然期間染感冒未癒,佢堅持每晚挑燈趕工寫好。

《施政報告》製作繁複,唔少繁瑣嘢就由同林鄭幾乎一個餅印嘅左右手特首辦常秘丁葉燕薇,以及中策組聶世蘭兩位女將嘅協助解決,一個星期就完稿,貫徹佢一向「好打得」兼「講到做到」嘅形象之餘,絕對有血有汗。

報告封面顏色沿用林鄭競選時所用嘅淺藍色做主調,其實佢競選特首時,政綱已勾劃出一個未來方向,今次施政報告相信會找數。當中最有看頭,要算林鄭形容為現時香港民生「三座大山」之一嘅港鐵車費問題。

林鄭喺競選時,曾提出政府作為港鐵大股東,每年收到四十五億元股息,建議用呢筆錢來補貼市民嘅長途票價。據悉,佢當選後一星期,即同港鐵主席馬時亨商議具體安排,相信喺今次《施政報告》中會出爐。有消息指該計劃不設資產審查,只要每月交通開支超過六百元,並以八達通畀錢嘅人士就受惠,而且有機會涵蓋巴士、港鐵、小巴同渡輪等交通工具。

如以此推算,合資格人士可能多達二、三百萬,參考o依家長者及殘疾人士的兩蚊搭車計劃,已多達一百二十萬人受惠,每年用咗政府十一億元。如果政府將四十幾億股息攞晒出來做補貼,相信受惠人士慳到唔少車費開支。

至於公司老闆亦同樣有糖食,有指林鄭會推行「兩級制利得稅」,公司首二百萬元盈利嘅利得稅率會由百分之十六點五,下調至百分之十或以下,令每年庫房少收五十億元,但就有望大大減輕中小企同初創企業嘅稅務負擔。同時,報告仲會建議重啟活化工廈,跟擁有已活化工廈嘅業主以及各大地產商商討,以優惠租金出租部分樓層用作共享工作間以及文藝活動空間,鼓勵年輕人創業同文化交流。

安老助弱亦係今次《施政報告》嘅亮點,據指報告建議採納安老服務規劃方案嘅建議,將現時推行嘅長者社區照顧服務券計劃加碼幾千張名額,亦會同業界研究輸入菲律賓、印尼等地嘅外勞,加入安老業,應付護理員人手需求不足嘅問題。報告仲建議社署為外傭舉辦安老照顧進修課程,教授剪髮、溝通、衞生護理等知識,推動居家安老,減輕醫療系統負擔。

以往特首發表《施政報告》都會喺立法會隻字不漏咁宣讀,十分冗長,但實事求是嘅林鄭今次破格,只讀施政重點,希望更清晰地將施政理念帶出嚟,同時佢會加長記者會時間,有問必答解答傳媒疑問,至於編輯簡介會則因為同記者會內容重複,將會被取消。

林鄭競選特首時,採用淺藍色做主調,首份《施政報告》都會用番呢隻色,內裏嘅政策亦同競選政綱一脈相承。

 

「好打得」嘅林鄭,搵埋丁葉燕薇(右),以及聶世蘭(左)協助,一星期就完稿。

 

《施政報告》或建議將港鐵畀政府嘅股息,用嚟補貼全港交通工具嘅長途車費。