為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2017 年 10 月 15 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

安老與置業 魚與熊掌同樣重要

香港社會人口老齡化,有報道指醫管局希望透過部分公立醫院提供社區老人評估外展服務,加強醫生喺社區嘅支援,讓出院嘅長者喺安老院舍得到持續嘅適當護理。據聞政府會研究喺有質素嘅安老院舍騰出牀位,提供接近醫院護理嘅服務。假設當外展隊或救護人員到場後如做到基本治理,病情可以控制嘅話病人就無需轉送到醫院留醫。呢個做法聽落唔錯,雖然未知可行性有幾高,但肯定可以改變傳統嘅醫院服務模式。

與此同時,有報道指本地受牙科資助嘅長者僅佔整體合資格人士不足30%,因為使用率低,政府決定今年底將調低受助年齡到65歲或以上,並希望持續為自13年8月至今年2月底完成為成年智障人士提供嘅牙科援助,參與當中嘅牙醫可報名上進修班,學習點為智障人士檢查牙齒,提供拔牙、杜牙根等基本牙科護理,為明年初有機會重開嘅呢個項目作準備。牙科對任何人嚟講比普通護理嘅費用較貴,有理由相信呢個資助項目如成行的話,對受助人士應該實用。

特首林鄭較早前出席完一個經濟論壇後提到,預計首置上車盤單位無論面積、設計同裝潢會以樸實為主,主要希望想幫到相對年輕嘅家庭置業,上車盤係介乎私樓同居屋之間嘅置業階梯,特首話呢項計劃一定唔會出現同居屋重疊嘅情況。據聞政府想透過先導計劃方式,採取官商合作模式,通過優惠價格令發展商喺補地價後,興建項目單位中撥出部分作為首置上車盤。首置上車盤對象會係香港永久性居民,如果屬實就應該幫到首次置業嘅香港永久性居民喇。

有報道話政府將考慮落實引入「兩級利得稅」,將企業頭二百萬元嘅利得稅稅率,由現時百分之十六點五下調到百分之十,估計庫房收入每年將減少數十億元,政府期望可減低中小企及初創企業嘅負擔。希望喺新稅制下,可以鼓勵港人創業或外來投資,政府要面對社會上唔同階層人士嘅訴求,真係要慎重諗到個可以迎合多眾納稅人嘅標準稅制先得。舖租雖然依家普遍回落,喺扣除舖租、人工、及各種扣減額後,就會按逐級遞增嘅稅階被徵稅,剩低畀中小企老闆嘅隨時可能係微利。從我以中小企老闆或已婚納稅人嘅角度去睇,直接退稅、取之於民用之於民嘅稅制都一律值得支持。

特首即將發表施政報告,當中解決年輕人置業上車問題尤其受大眾關心,但本港人口老齡化,安老問題也同樣重要。