主頁 > 專欄 > Paco巨星飯堂 > 澳遊樂園 2017 年 10 月 14 日

黃栢高

黃栢高(Paco)，金牌經理人，叱吒樂壇三十年，炮製無數金曲，捧紅不少歌手。近年涉足電影，《行運超人》、《龍咁威》、《殺破狼》等，皆叫好叫座。最新動作，除於本刊主持《Paco巨星飯堂》，每逢周一更在《頭條日報》主持「名人會」專欄，專訪城中名人、紅星。

澳遊樂園

要拉近人與人之間嘅距離，音樂係一個最啱feel嘅渠道，既冇語言限制，亦冇地域規範。今次「Paco巨星飯堂」嘅嘉賓，就係用音樂打破界限嘅例子：陳慧敏﹙慧敏哥﹚同小肥（徐智勇），同樣來自澳門，同樣以音樂打動人心，仲即將先後舉行演唱會，與歌迷同樂。

我帶兩位嘉賓去到位於觀塘嘅「Mini Friday」，一邊品嘗特色嘅西式美點，一邊暢談音樂經。

音樂無分地域，所以小肥同慧敏哥兩把嚟自澳門嘅靚聲，喺香港都走出屬於自己嘅樂與路。

傻瓜組班

一講到演唱會，將於11月1日喺旺角麥花臣場館，舉行香港首個售票演唱會嘅慧敏哥，就相當雀躍。「我希望透過呢個音樂會，俾到大家一股傻勁，繼續做自己喜歡做嘅事，有勇氣繼續行自己嘅路。我覺得『傻』係好事，好似Steve Jobs話齋，只有瘋狂到想改變世界嘅人，先可以改變世界。唔係話我想改變世界，但係要堅持自己嘅信念，都係要有傻勁先做得到。」

入行七年，慧敏哥對自己嘅音樂，要求仍然嚴謹，為咗今次嘅演唱會，佢特別邀請著名演唱會監製康家俊擔任創作總監，RubberBand嘅阿偉就擔任音樂總監，仲有佢唔少「巨聲幫」嘅好友，都力撐呢個香港「首唱」。「好多朋友都仗義幫忙，出心又出力，好似Alfred（許廷鏗）、阿Mag（林欣彤）、阿肥同李拾壹，佢哋知道我第一次喺香港開騷，仲緊張過我，又俾好多建議，令我好溫暖。鄧小巧又第一時間話會嚟捧場，坤哥（吳業坤）又用私己買十張飛，呢啲人情真係唔知點還，特別係坤坤，佢曾經開騷，知道過程有幾吃力，所以佢話會加大力度支持我，我真係好感動！」

為咗不負樂迷同好友，慧敏哥話除咗唱自己嘅歌，仲會精挑鄧小巧、林欣彤等嘅歌曲。「我會唱一啲大家未聽過嘅歌，一啲嚟自唔同年代嘅粵語經典歌，最有意思嘅一首，係我寫俾阿Mag嘅demo歌，當時她有段時間唔舒服，我就寫咗呢首歌，裏面有好多大家之間經歷，到時我會同佢合唱。」

我帶兩位嘉賓去到位於觀塘嘅「Mini Friday」，一邊品嘗令人有驚喜嘅西式美點，一邊暢談音樂經。

入行以嚟首次喺香港舉行售票演唱會，慧敏哥自言要以最佳狀態會樂迷。

早前為拍新歌《我們叫傻瓜》嘅MV，慧敏哥喺酷熱天氣下又唱又跳，盡顯佢口中嘅「傻勁」。

原個番茄沙律（$98），原個番茄配上露筍啫喱及乾番茄等配料，味道清新。

迷你三色沙律蛋糕（$98），分別為紅菜頭、芒果及牛油果口味，既有特色又開胃。

牛油果蟹肉沙律（$108），以青瓜包裹沙律，配上酸酸甜甜嘅芒果醬汁，鮮味！

一月一曲

慧敏哥開show在即，小肥就會等到明年二月，先以歌會樂迷。「依家rundown已經有初步想法，我已經好積極咁做運動，耐力好緊要，喺台上需要嘅能力多過腹肌，所以我做運動係為咗狀態好啲。上次演唱會我操到好fit，自己都感覺到喺台上有無限嘅精力！」

今年小肥落力實行一個計劃，「喺2017年，我每個月都喺網上平台出一首歌，每次都會搞一個小型嘅live show，作為打歌嘅一部分。開始實行嘅時候，我都冇諗過出碟或者開show，不過依家就會喺一月出碟，當係紀念我一整年嘅工作，然後二月就喺澳門開show。」

講到澳門，除咗音樂，少不免令人聯想到美食。我每次都會去位於氹仔嘅「達榮」，歎一碗麵條彈牙嘅香蔥撈麵，小肥就話：「我推介吓街頭小食，有一檔近大堂斜路嘅雞蛋仔，不論外形同餡料都係香蕉，外脆內軟，去澳門一定要食！」

將於明年二月舉行演唱會嘅小肥，仍然念念不忘初入行時，同樂迷打成一片嘅音樂會，仲話好享受同現場觀眾作零距離交流。

為咗保持狀態，跑步係小肥生活不可或缺嘅一部分。

除咗地道嘅澳門街頭小食，小肥都有喺ig推介其他地方嘅美食。

威靈頓牛柳（$328），酥皮下為八安士牛柳，一啖品嘗到唔同層次。

香草焗慢煮牛肋骨（$288），牛肋骨經十八小時慢煮處理，肉質鮮美Juicy。

黑松露野菌意大利飯（$138），意大利飯沾滿松露芳香，實為味覺嘅享受。

推介澳食

一聽小肥推介嘅香蕉雞蛋仔，慧敏哥都有好介紹：「喺永樂戲院隔籬嘅車仔檔，有一檔係賣雞絲翅嘅，我由細食到大，喺第二度絕對食唔到！呢檔嘅雞絲翅，就算擺耐咗都唔會變水，湯底落足料煲，好濃稠！而且仲好重鮮味，啲雞絲係好有心機撕o架！要留意番，檔仔有兩個人煮翅，如果你見到係由一個冇咗一隻手嘅師傅煮，就一定要幫襯！我覺得呢個係真正嘅師傅，煮得特別好食！」

慧敏哥愈講愈high，繼續推介。「仲有『金利』同『金城』嘅『雞米雙汁』！我就鍾意去『金利』多啲，雙汁係咖喱汁同牛腩汁，而米粉同雞都好滑，啲米粉係幼細到不得了，加埋雙汁真係好好食！」

小肥補充解說：「兩間嘅辣椒醬都好香，加埋落個雞米度食，直情upgrade晒。我就鍾意食『金城』多啲，呢兩間餐廳係兄弟檔，一間開早一間開晏，我就食早開嗰間，係朝早七點到晏晝一點嘅。」