數近年香港嘅代表劇集，一定有《老表》系列一份，題材貼地又貼身，自然易令觀眾產生共鳴。系列第三部《老表，畢業喇！》正在熱播，我就特別邀請繼續集策劃、故事同主演三職於一身嘅王祖藍，率領戲中飾演大學生嘅林欣彤（Mag）同細細粒（陳嘉佳），擔任今次「Paco巨星飯堂」嘅嘉賓。

我帶三位嘉賓去到位於觀塘嘅「京饌」，品嘗有水準嘅京菜，暢談劇集背後嘅故事。

阿Mag、祖藍同細細粒喺劇集《老表，畢業喇！》中，發放正能量，以歡笑化解怨氣。

做「精神領袖」

《老表》系列由祖藍一手打造，上兩輯分別講中港矛盾同香港矛盾，今次祖藍認為教育話題夠熾熱，所以就決定用嚟做主題。「不過今次唔係拍一間學校或者一班家長，而係一班未來嘅教師，故事講佢哋本身讀緊大學嘅教育系，即係又要教又要學。」

繼續身兼多職嘅祖藍笑稱：「我今次係負責做精神領袖，劇本就交畀龍文康（編劇）寫，繼續不負責任地飛紙仔。蔡少芬打俾我話：『王祖藍，你搵我嗰時話會出齊劇本o架！唔會飛紙仔嘅？點解o依家每場都唔會唔飛紙仔o架？

「我到o依家都好內疚，覺得無做好監督工作。上集《老表，你好hea！》嗰陣，我搵咗三個熟落嘅香港編劇幫手，但近年因為多咗其他製作，所以今次冇足夠嘅人手。後來連編劇都話頂唔到，所以今次係一個好好嘅學習。」

講到劇中角色，祖藍表示：「我負責揸流攤！《老表》拍攝嘅時候，內地綜藝《奔跑吧！兄弟》同時都進行緊，加上我又要度其他劇本，根本兼顧唔到演員部份。今次我只係睇咗故事大綱，其他細節以至後期，都要放手俾其他同事接手。

「所以今集係呢個系列中甩碌甩得最勁嘅，一來好多嘢都好遲先決定，譬如本身想搵張敬軒同王菀之，但最後佢哋真係度唔到期，臨開機先定到欣宜，而佢個角色本身係諗住搵張繼聰演，劇本就要將男角改成女角，導致後來嘅骨牌效應。」

我帶三位嘉賓去到位於觀塘嘅「京饌」，品嘗有水準嘅特色京菜，暢談拍攝劇集背後嘅故事。

阿Mag、祖藍同細細粒喺劇集《老表，畢業喇！》中，發放正能量，以歡笑化解怨氣。

玫瑰香燻素鵝（$68），每一口都有淡淡玫瑰香。

京味燒羊肉（$148），羊肉外脆內軟，全無羶味。

醉鴨肝（$148），酒香四溢。

冧咀「小鮮肉」

以往兩輯嘅「鐵膽」郭晉安，今次會扮校長「杜明治」，祖藍說：「安仔呢個熱血唐僧，繼第一輯之後，再同湯盈盈分手！」

而阿Mag同細細粒，就分別飾演教育系大學生，而阿Mag更有一對唱家班父母。「蔣志光老師做我爸爸，韋綺姍前輩就係我媽咪，現實中我哋一家人都係歌手，佢哋等埋位嘅時候，成日會唱歌，好正o架！」

細細粒就話自己喺劇中似孔雀，「我係阿Mag嘅同學，個個鏡頭都扮到好似孔雀咁靚，因為我喺戲裏面係個無限幻想嘅人，我仲以為老闆（祖藍）繼上一輯我同阿Bob激嘴後，唔會寫呢啲戲俾我，點知今次又有得錫小鮮肉BabyJohn（蔡瀚億），可惜兩個都係人夫。」

細細粒繼續爆料：「阿Mag都係暗戀BabyJohn，但就連咀都無得掂！今次拍kiss戲，都有少少尷尬，但BabyJohn同我講，佢之前喺《29+1》都有kiss過欣宜，咁我先無咁緊張。」

阿Mag同細細粒喺拍攝劇集之時，各有難忘事，但佢哋異口同聲話，好享受整個過程。

繼阿Bob之後，細細粒同BabyJohn今次喺劇中有咀嘴戲，二人都有做足準備功夫。

今集有最強新女將蔡少芬（左二），加上細細粒、張文慈、阿Mag同吳沚默（左至右），甚具新鮮感。

北京填鴨（$380/隻），選用十二両重鴨製作，皮脆肉嫩。

紅燒雅片魚頭（$588），為傳統京菜，製作工序繁複，需預訂。

激讚私廚神

事業得意，祖藍同太太李亞男嘅感情一樣令人艷羨。二人喺一五年結婚後，太太密密為佢作出改變，「結婚之前，我老婆咩都唔識煮，仲俾人話係『地獄廚神』，但係結婚之後，佢為咗我就努力學煮嘢食，我好鍾意食住家飯，尤其係飲湯，於是佢就學。」

祖男話，亞男婚後除跟外母學整上海菜，又跟奶奶學煲靚湯，o依家中西菜都煮得頭頭是道。「佢會睇書，又會上網睇片搵recipe，o依家成日行街巿同超巿搵食材，食飯都會研究人哋啲煮法。我會成日叫朋友返嚟屋企食飯，佢好叻o架，我同老婆去餐廳食過一次咋，佢返屋企就識整番出嚟！」

哈哈哈！呢個「靚太廚房」，只係祖藍親友限定，係咪好羨慕先？

講新作，祖藍都不忘搞搞笑，但一講起「老婆廚房」，佢就幸福晒恩愛。

 

祖藍話近年李亞男努力學烹飪，而且多得外父教導，除咗鮑魚﹙上圖﹚，太太連豆沙鍋餅都識整。

頤園美點（$98），以清朝皇室嘅甜點作藍本，相當精緻。

極品蜜汁金華火腿（$188），口感層次豐富。

鮮露筍百合雞頭米（$98），雞頭米狀似茨實，配合露筍、百合，極之清新。

京饌
地址：九龍觀塘道418號創紀之城第五期（APM）3樓1號舖
電話：35801882