為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 投資樂園 2017 年 10 月 06 日

林一鳴

本地資深股市及樓市投資者,重點研究波浪理論、財技和投資心理學等,擅長用故事形式比喻市況和分析經濟熱話。

用數學為年輕人說句公道話

有很多與我差不多年紀的中年人,總愛用自己的角度來看今天的年輕人,例如「你哋去少幾次日本就買到樓了」、「阿叔當年都是六七個人住百幾呎,捱吓捱吓就會儲夠錢買樓」、「俾多啲獅子山精神啦」等,句句說話都獨當一面,夭心夭肺。到底今天的實情是怎樣?現在就讓我從數學分析,看清楚真實情況。

假設有一位年輕人,名字叫陳小明。

陳小明絕對是成人世界「百中無一」頂級乖仔︰出世唔夠三個月就懂得念晒26個英文字母,幼兒園已經學緊五國語言,小學加中學十二年都係全班頭幾名,跑步游水學界代表,三種樂器考到八級,再加上奧數、辯論隊、朗誦等一大堆唔知係乜的金獎銀獎,總共超過三百張證書和獎狀,十幾幅牆都貼唔晒……DSE成績也考得不錯,全部都是5分以上,有兩三科更是5*和5**。

陳小明順利進入大學之後,繼續全心努力讀書,連女朋友都唔識番一個半個,亦唔會理乜嘢黃絲藍絲。結果以優異成績畢業,畢業後唔去玩就馬上返工,起薪點每月15,000元,比起其他同學已算不錯;根據大學聯校就業資料數據庫,就算是四大會計師事務所,增聘新人起薪亦只有14,000元。

進入職場的陳小明,每天返工朝八晚十,工作表現年年攞A,每年加薪百分之十,增幅多過九成香港打工仔。他唔去日本旅行,手機舊款兩年也不換,唔炒股票唔炒Bitcoin,連續十年保持儲蓄,每月扣除俾家用和必須開支外,一出糧就將30%的薪金儲起來。

如果你係阿媽,生到一個好似陳小明咁嘅乖仔,應該每日都要劏雞還神;如果你係港女,遇到一個好似陳小明咁嘅好男人,應該唔拍拖都立刻嫁俾佢。不過以香港人的標準,以上全都不是重點……重點是他在職場捱了十年,可以買得起港樓,可以有樓有高潮嗎?

這是數學問題,大家可看一下附圖之計算:陳小明每年薪金儲蓄30%,全部放在穩健投資,每年回報率5%(已經跑贏金管局和强積金),經過十年艱苦努力,都只係儲蓄到113萬;就算全部用作首期,以最高按揭為樓價六成計算,可以買到金額是282萬,應該只夠買個車位。

所以他必須借埋二按,但在金管局壓力測試之下,最後也只可買到四百多萬的納米劏房樓;若他不甘心,也可找個跟他一樣「百中無一」的女朋友,不過兩個「百中無一」的人要碰在一起,機會率就是萬分之一。